​મુંબઈ : દેશમાં હજુ રાષ્ટ્રીય કક્ષાની સ્પર્ધાત્મક પરીક્ષાઓના પેપર લીક અને ગેરરીતિઓના વિવાદોની શાહી સુકાઈ નથી, ત્યાં વધુ એક પ્રતિષ્ઠિત સરકારી પરીક્ષાના પેપર લીક કાંડનો પર્દાફાશ થતાં શૈક્ષણિક આલમ કંપારી ઉઠી છે. મહારાષ્ટ્ર રાજ્ય શિક્ષક પાત્રતા પરીક્ષા (TET) ૨૦૨૬ ના આયોજનના બરાબર એક દિવસ પૂર્વે ભિવંડી પોલીસ અને સ્થાનિક ક્રાઈમ બ્રાન્ચે સંયુક્ત ઓપરેશન હાથ ધરીને એક મસમોટા આંતરરાજ્ય રેકેટનો પર્દાફાશ કર્યો છે. પોલીસે પરીક્ષાની આગલી રાત્રે જ ભિવંડી વિસ્તારમાંથી ત્રણ રીઢા સાગરીતોને રંગેહાથ દબોચી લીધા છે. પ્રાથમિક તપાસમાં બહાર આવ્યું છે કે, આ આખી ટોળકી દેશની રાજધાની દિલ્હીથી પેપર મેળવીને અહીં સ્થાનિક સ્તરે અંદાજે દોઢ કરોડ રૂપિયાના તોતિંગ મૂલ્યે વેચવાની પેરવીમાં હતી, પરંતુ સોદો પાર પડે તે પહેલાં જ પોલીસે બાતમીના આધારે ત્રાટકીને સમગ્ર નેટવર્કને વેરવિખેર કરી નાખ્યું છે.

​પોલીસના ઉચ્ચ અધિકારીઓ પાસેથી મળતી વિગતો અનુસાર, પકડાયેલા ત્રણેય આરોપીઓ બિહાર અને હરિયાણાના વતની છે અને તેઓ લાંબા સમયથી સ્પર્ધાત્મક પરીક્ષાઓના પેપર લીક કરતી ગેંગ સાથે સંકળાયેલા છે. ગુપ્તચરો પાસેથી મળેલી ચોક્કસ વિગતોના આધારે પોલીસે ભિવંડીના એક ગુપ્ત ઠેકાણે દરોડો પાડ્યો હતો, જ્યાં આ શખ્સો પરીક્ષાના ઉમેદવારો અથવા વચેટીયાઓ સાથે દોઢ કરોડ રૂપિયાની ફાઈનલ ડીલ કરવાની ફિરાકમાં હતા. તેમની પાસેથી પરીક્ષાને લગતી કેટલીક વાંધાજનક સામગ્રી, મોબાઈલ ફોન અને અન્ય દસ્તાવેજો પણ જપ્ત કરવામાં આવ્યા છે. પોલીસ હવે એ દિશામાં તપાસ ચલાવી રહી છે કે દિલ્હીમાં આ પેપરના મૂળ તાર કયા મોટા માથાઓ સાથે જોડાયેલા છે અને અગાઉ તેઓએ કઈ કઈ પરીક્ષાઓમાં આ પ્રકારે સેંધ મારી છે.

​બીજી તરફ, પરીક્ષાના બરાબર ૨૪ કલાક પહેલાં જ પેપર લીકની આ ગંભીર ઘટના સામે આવતા શૈક્ષણિક તંત્ર અને સરકારમાં ભારે દોડધામ મચી ગઈ હતી. ઘટનાની સંવેદનશીલતા અને પરીક્ષાની પારદર્શકતા જોખમાય તેવી પૂરેપૂરી શક્યતાઓને ધ્યાનમાં રાખીને મહારાષ્ટ્ર રાજ્ય પરીક્ષા પરિષદે તાત્કાલિક આપાતકાલીન બેઠક બોલાવી હતી. ત્યારબાદ પરિષદ દ્વારા સત્તાવાર રીતે જાહેરાત કરવામાં આવી છે કે ૨૮ જૂનના રોજ યોજાનારી સમગ્ર રાજ્યની TET પરીક્ષાને હાલ પૂરતી સ્થગિત (પોસ્ટપોન) કરવામાં આવે છે. આ આકસ્મિક નિર્ણયના કારણે રાજ્યભરના અંદાજે ૧,૦૨૮ જેટલા પરીક્ષા કેન્દ્રો પ્રભાવિત થયા છે અને લાખો ઉમેદવારો અટવાયા છે. આગામી સમયમાં નવી તારીખોની જાહેરાત કરવામાં આવશે તેમ સત્તાવાળાઓએ જણાવ્યું છે.