તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
થાઈલેન્ડમાં મજા કરવા ગયેલા ત્રણ ઈન્ડિયન્સ માર ખાઈને અધમૂઆ થઈ ગયા
સસ્તું ટુર પેકેજ ઓફર કરનારા લોકોએ થાઈલેન્ડ બોલાવ્યા બાદ બંધક બનાવી ઉંધા લટકાવીને ફટકાર્યા, છોડવા માટે ૭૦ લાખની ખંડણી માગી
દુબઈ,તા.૦૧: થાઈલેન્ડ ફરવા જતાં ઘણા ઈન્ડિયન્સ આમ તો ત્યાં અલગ જ પ્રકારની મોજમજા કરવા માટે જતા હોય છે પરંતુ સસ્તામાં થાઈલેન્ડની ટ્રીપ કરવાની લાલચ ત્રણ ઈન્ડિયન્સને એટલી બધી ભારે પડી ગઈ છે કે હવે તેઓ આખી જિદગી ક્યારેય થાઈલેન્ડ જવાનું નામ નહીં લે. બેંગકોક પોસ્ટના એક રિપોર્ટ અનુસાર આ ત્રણેય ઈન્ડિયન્સને ઓછા ભાવનાં થાઈલેન્ડની સ્પેશિયલ ટ્રીપ કરવાની લાલચ આપીને પટાયા બોલાવવામાં આવ્યા બાદ તેમનું અપહરણ કરીને ઢોર માર મારી ખંડણી માગવામાં આવી હતી.
ગત સોમવારે થાઈલેન્ડની પોલીસને આ અંગે બાતમી મળતા જ એક ટીમ તેમને બચાવવા માટે પહોંચી હતી જ્યાં બે માળના એક મકાનમાં આ ત્રણેય હાથ-પગ બાંધેલી હાલતમાં મળી આવ્યા હતા જેમાંથી બે લોકો તો માત્ર અંડરવિયરમાં હતા. લોકલ પોલીસના જણાવ્યા અનુસાર ત્રણેય વિક્ટિમની ઉંમર ૨૩થી ૨૬ વર્ષ હતી અને સોમવારે સાંજે ચાર વાગ્યે તેમને રેસ્ક્યુ કરાયા હતા. કિડનેપર્સે તેમને મોઢા પર પટ્ટી મારી ઉંધા લટકાવીને ફટકાર્યા બાદ પોતાના ઘરે ફોન કરી પૈસા મગાવવા મજબૂર કર્યા હતા, આ ત્રણેયને એકાદ વીક સુધી ટોર્ચર કરવામાં આવ્યા હતા અને આખરે તેમના પરિવારજનોએ ઈન્ડિયાથી થાઈલેન્ડની પોલીસનો સંપર્ક કરતાં તેમને બચાવી શકાયા હતા.
પીડિતોએ પોલીસને જણાવ્યું હતું કે તેમને સાત દિવસનું ટુર પેકેજ ઓફર કરવામાં આવ્યું હતું જેના માટે દરેકે ૭૦ હજાર બાટ એટલે કે બે લાખ રૂપિયા ચૂકવ્યા હતા. આ પેકેજમાં તેમને કયા પ્રકારની સ્પેશિયલ સર્વિસ મળવાની હતી તેની પોલીસે કોઈ ચોખવટ નથી કરી. ડીલ નક્કી થયા બાદ આ ત્રણેય ઈન્ડિયન્સ ફલાઈટ પકડીને જુલાઈ ૨૧ના રોજ થાઈલેન્ડ પહોંચી ગયા હતા અને એરપોર્ટથી ટેક્સી પકડીને તેઓ પતાયા પહોંચ્યા હતા.
સવારે સાત વાગ્યે તેમને એક રેસ્ટોરાં પાસે પોતાના ટુર ઓપરેટર્સને મળવાનું હતું જ્યાંથી ત્રણેયને વારાફરથી બાઈક પર એક ઘરમાં લઈ જવામાં આવ્યા હતા. ત્યાં પહોંચ્યા બાદ પાંચ લોકોએ તેમના હાથ-પગ બાંધી દીધા હતા અને ઉંધા લટકાવીને ફટકાર્યા હતા. વિક્ટિમ્સનું એવું પણ કહેવું છે કે તેમને ઘૂંટણ પર પર ડંડા મારવામાં આવ્યા હતા અને ખાસ્સી મારઝૂડ કર્યા પછી ઈન્ડિયા ફોન કરી ત્યાંથી ૭૦ લાખ રૂપિયા મગાવવા માટે જણાવાયું હતું. તેમના ફેમિલી મેમ્બર્સ પર પ્રેશર વધારવા માટે તેમને રોજેરોજ ભૂખ્યા રાખીને ટોર્ચર કરાતા હતા અને આ દરમિયાન ત્રણેયને ના તો જમવાનું અપાયું હતું કે ના તો તેમને પેશાબ કરવા પણ જવા દેવાયા હતા.
આખરે પીડિતોના પરિવારજનોએ થાઈલેન્ડની પોલીસનો સંપર્ક કરતા આ પ્રકરણનો ભાંડો ફુટ્યો હતો, કિડનેપર્સ દુબઈમાં રજિસ્ટર્ડ થયેલા નંબરથી ઈન્ડિયા ફોન કરીને ખંડણી માગી રહ્યા હતા. આ નંબરને થાઈલેન્ડ પોલીસે ટ્રેક કરતાં તેનું લોકેશન શોધી કાઢ્યું હતું અને પોલીસ ત્યાં પહોંચી તે પહેલા જ કિડનેપર્સ બાાઈક લઈને ત્યાંથી નાસી છૂટ્યા હતા. થાઈલેન્ડની પોલીસે એવી પણ વોર્નિગ આપી છે કે સસ્તામાં ટુર પેકેજ ઓફર કરનારા લોકો પોતાનો શિકાર હાથમાં આવતા જ તેને કિડનેપ કરી પૈસા પડાવે છે. આ કેસમાં પોલીસે ગત મંગળવારે પાંચ લોકોની ધરપકડ કરી હતી અને આ પાંચેય પાછા ઈન્ડિયન જ છે જેમના નામ અવતાર સિઘ, જગજિત સિઘ, રામબાલક કુમાર, સુખબિર સિઘ અને કુર્લા સિઘ હોવાનું જણાવાયું છે.
આ પાંચેય થાઈલેન્ડ છોડીને ભાગવાની ફિરાકમાં હતા પરંતુ તે પહેલા જ પોલીસ તેમના સુધી પહોંચી ગઈ હતી. બેંગકોક પોસ્ટના એક રિપોર્ટ અનુસાર આરોપીઓએ પોલીસને એવું જણાવ્યું હતું કે એક પાકિસ્તાનીના કહેવા પર તેમણે ત્રણ લોકોનું અપહરણ કરી તેમને છોડવાના બદલામાં ખંડણી માગી હતી. આ પ્રકરણનો માસ્ટર માઈન્ડ દુબઈમાં બેઠો હોવાની પણ વાતો થઈ રહી છે, પરંતુ આરોપીઓનો દાવો છે કે તેમણે ક્યારેય તેને જોયો નથી. પોતાના બોસ સાથે આરોપીઓએ જે ડીલ કરી હતી તે અનુસાર પૈસા તેને દુબઈમાં ટ્રાન્સફર થવાના હતા જ્યારે અપહરણ કરાયેલા લોકો પાસેથી મળેલી કેશ અને બીજી ચીજવસ્તુઓ પાંચેય આરોપી રાખવાના હતા, તેમના માટે થાઈલેન્ડમાંથી નીકળવાની વ્યવસ્થા પણ તેમનો બોસ જ કરી આપવાનો હતો.
આમ તો ઈલીગલી વિદેશ જવા નીકળેલા કોઈ ઈન્ડિયનને કિડનેપ કરીને માર મારવામાં આવ્યો હોય તેવી અનેક ઘટના ભૂતકાળમાં બની ચૂકી છે જેમાં મોટાભાગના કેસમાં લાખો રૂપિયાની ખંડણી ચૂકવ્યા બાદ પણ લોકોને ઢોર માર મારવામાં આવ્યો હતો. જોકે, સસ્તામાં થાઈલેન્ડ ફરવા જવાની લાલચ આપીને કોઈ ઈન્ડિયનનું અપહરણ કરાયા બાદ ટોર્ચર કરવામાં આવ્યું હોય તેવો આ પહેલો કિસ્સો છે અને થાઈલેન્ડના શોખીનો માટે આ બનાવ આંખ ઉઘાડનારો પણ છે.
(10:06 AM IST)
છેલ્લા 8 દિવસમાં સૌથી લોકપ્રિય 
