મિયામી (ફ્લોરિડા): અમેરિકા જેવા પશ્ચિમી દેશોમાં ઉછરતા ભારતીય મૂળના બાળકો માટે ઘણીવાર પોતાના ધર્મ અને સંસ્કૃતિને સમજવી પડકારજનક હોય છે. આ જિજ્ઞાસુ બાળકોના પ્રશ્નોને વાચા આપવા અને હિન્દુ ધર્મના ગૂઢ રહસ્યોને સરળ શૈલીમાં સમજાવવા માટે ભારતીય મૂળના સોફ્ટવેર એન્જિનિયર રાજ શાહે એક અનોખું પુસ્તક લોન્ચ કર્યું છે. 'ધ વોટ, વાય, એન્ડ હાઉ ઓફ હિન્દુઇઝમ' નામનું આ પુસ્તક નવી પેઢી માટે માર્ગદર્શિકા સમાન બની રહેશે.
કર્મભૂમિ અમેરિકા, પણ માતૃભૂમિ માટે અતૂટ પ્રેમ
વર્ષ 1970 થી અમેરિકામાં સ્થાયી થયેલા રાજ શાહ વ્યવસાયે એન્જિનિયર હોવા છતાં ભારતીય સંસ્કૃતિના પ્રખર હિમાયતી છે. તેમણે અમેરિકાની હિન્દુ યુનિવર્સિટી સહિત અનેક સામાજિક સંસ્થાઓમાં સેવા આપી છે. તેઓ માને છે કે જો બાળકો પોતાના મૂળને સમજશે, તો જ તેઓ આત્મવિશ્વાસ સાથે પોતાના ભવિષ્યને આકાર આપી શકશે.
પુસ્તકની વિશેષતા: છ પરિમાણોમાં જ્ઞાનની વહેણી
આ પુસ્તક માત્ર પ્રશ્નોત્તરી નથી, પણ એક શૈક્ષણિક પ્રવાસ છે. દરેક વિષયને છ અલગ-અલગ વિભાગોમાં વહેંચવામાં આવ્યો છે:
•    સરળ જવાબ: નાના બાળકો માટે માત્ર બે-ત્રણ લીટીમાં સમજૂતી.
•    પૂર્ણ જવાબ: જિજ્ઞાસુ કિશોરો માટે થોડી ઊંડી અને તાર્કિક સમજ.
•    શું તમે જાણો છો?: રસપ્રદ અને અજાણ્યા તથ્યોની માહિતી.
•    આ વિશે વિચારો: બાળકોમાં વિવેચનાત્મક વિચારસરણી (Critical Thinking) ખીલવવા માટેના મુદ્દા.
•    કી ટેકઅવે: આખા પ્રકરણનો ટૂંકો અને સચોટ સારાંશ.
પેઢીઓ વચ્ચેનો સેતુ
પુસ્તકના પ્રકાશકોના જણાવ્યા મુજબ, આ કૃતિ બાળકોને દયા, જવાબદારી અને આદર જેવા સાર્વત્રિક મૂલ્યો શીખવવાની સાથે હિન્દુ ધર્મને માત્ર એક ધર્મ તરીકે નહીં, પણ 'જીવન જીવવાની કલા' તરીકે જોતા શીખવશે. રાજ શાહે એક નિવેદનમાં કહ્યું કે, "આ પુસ્તક બાળકોને તેઓ કોણ છે અને તેમની સાંસ્કૃતિક ઓળખ શું છે, તે બાબતે સ્પષ્ટતા અને ગર્વ અપાવશે."
રાજ શાહ પોતે કેન્સર સર્વાઈવર છે અને તેમની જીવન પ્રત્યેની સકારાત્મક દૃષ્ટિ આ પુસ્તકમાં પણ છલકાય છે. 'અક્ષય પાત્ર' જેવી સંસ્થાઓ સાથે જોડાયેલા શાહનું આ પુસ્તક હવે અમેરિકામાં વસતા હજારો ભારતીય પરિવારો માટે તેમના બાળકોને સંસ્કાર આપવાનું એક સબળ માધ્યમ બનશે.