ચેન્નાઈ: તમિલનાડુના રાજકીય ઇતિહાસમાં રવિવારે એક નવો અધ્યાય લખાયો છે, જ્યારે સુપરસ્ટારમાંથી રાજનેતા બનેલા સી. જોસેફ વિજયે મુખ્યમંત્રી તરીકે પદના શપથ લીધા હતા. આ સમારોહમાં વિજયે વર્ષો જૂની પરંપરાને બાજુ પર મૂકીને સૌને ચોંકાવી દીધા હતા. દક્ષિણ ભારતના દિગ્ગજ નેતાઓ હંમેશા સફેદ વેષ્ટી (ધોતી) અને શર્ટમાં શપથ લેતા આવ્યા છે, પરંતુ વિજયે આધુનિક લુક અપનાવીને સફેદ શર્ટ અને કાળા પેન્ટમાં શપથ ગ્રહણ કર્યા હતા. તેમના આ લુકને યુવા પેઢી સાથે જોડાવાના અને રાજ્યમાં નવીનતા લાવવાના એક મજબૂત સંકેત તરીકે જોવામાં આવી રહ્યો છે.

શપથ ગ્રહણ દરમિયાન એક ક્ષણ એવી પણ આવી જ્યારે રાજ્યપાલ રાજેન્દ્ર વિશ્વનાથ આર્લેકરે વિજયને અટકાવ્યા હતા. ઉત્સાહમાં આવીને વિજયે નિર્ધારિત શપથ વાંચવાને બદલે સીધું જ સંબોધન શરૂ કરી દીધું હતું, જેના પર રાજ્યપાલે તેમને ટકોર કરી માત્ર લેખિત શપથ વાંચવા સૂચના આપી હતી. આ દરમિયાન જ્યારે વિજયે પોતાનું નામ બોલ્યું ત્યારે આખું સ્ટેડિયમ ત્રણ મિનિટ સુધી તાળીઓના ગડગડાટથી ગુંજી ઉઠ્યું હતું. સ્ટેજ પર તેમના માતા-પિતા એસ.એ. ચંદ્રશેખર અને શોભા અત્યંત ભાવુક અવસ્થામાં હાથ જોડીને ઉભેલા જોવા મળ્યા હતા, જે તસવીરો હવે સોશિયલ મીડિયા પર વાયરલ થઈ રહી છે.

આ ભવ્ય કાર્યક્રમમાં રાષ્ટ્રીય સ્તરના નેતાઓમાં માત્ર રાહુલ ગાંધીની હાજરી વિશેષ આકર્ષણનું કેન્દ્ર બની હતી. રાહુલ ગાંધી અને વિજય વચ્ચેની નિકટતા સ્ટેજ પર સ્પષ્ટ દેખાઈ આવતી હતી, જ્યાં વિજયે તેમની સાથે સેલ્ફી પણ લીધી હતી. ઉલ્લેખનીય છે કે વર્ષ ૨૦૦૯માં વિજય કોંગ્રેસમાં જોડાવા ઈચ્છતા હતા, પરંતુ તે સમયે રાહુલ ગાંધીએ તેમને જમીની સ્તરે પોતાની તાકાત સાબિત કરવા સલાહ આપી હતી. આજે તે જ વિજય પોતાની અલગ પાર્ટી બનાવી મુખ્યમંત્રી બન્યા છે, છતાં કોંગ્રેસ પ્રત્યેનો તેમનો ઝુકાવ રાજકીય વર્તુળોમાં ચર્ચાનો વિષય બન્યો છે.

મુખ્યમંત્રી તરીકેની ખુરશી સંભાળતાની સાથે જ જોસેફ વિજયે એક્શન મોડમાં આવીને જનતા માટે ત્રણ મોટા આદેશો જારી કર્યા હતા. તેમણે પોતાના પ્રથમ સત્તાવાર નિર્ણય તરીકે ઘરેલુ ગ્રાહકો માટે ૨૦૦ યુનિટ મફત વીજળીની ફાઈલ પર હસ્તાક્ષર કર્યા હતા, જે તેમનું મુખ્ય ચૂંટણી વચન હતું. આ ઉપરાંત મહિલાઓની સુરક્ષા માટે સ્પેશિયલ ફોર્સની રચના અને રાજ્યને નશામુક્ત બનાવવા માટે એન્ટી-ડ્રગ્સ સ્ક્વોડ સ્થાપવાની જાહેરાત કરીને તેમણે વહીવટી તંત્રને કડક સંદેશ આપ્યો છે. આ આદેશો બાદ રાજ્યના ગરીબ અને મધ્યમ વર્ગમાં ખુશીની લહેર જોવા મળી રહી છે.

શપથ વિધિ પૂર્ણ થયા બાદ મુખ્યમંત્રી વિજય સીધા સચિવાલય પહોંચ્યા હતા અને વિધિવત રીતે પોતાનો કાર્યભાર સંભાળ્યો હતો. સચિવાલયમાં અધિકારીઓએ તેમનું ભવ્ય સ્વાગત કર્યું હતું. વિજયે અત્યંત નમ્રતાપૂર્વક સૌનું અભિવાદન ઝીલ્યું અને મુખ્યમંત્રીની ચેમ્બરમાં બેસતા પહેલા પ્રભુનું સ્મરણ કર્યું હતું. ફિલ્મી પડદે વિજય મેળવ્યા બાદ હવે વાસ્તવિક જીવનના પડકારો અને તમિલનાડુના વિકાસની જવાબદારી તેમના ખભે છે, ત્યારે જનતાને તેમની પાસેથી મોટી આશાઓ છે.