ચેન્નાઈ:તમિલનાડુના રાજકારણમાં આજે એક નવો ઇતિહાસ રચાયો છે. દક્ષિણ ભારતીય ફિલ્મોના સુપરસ્ટાર અને લોકપ્રિય નેતા 'થલાપતિ' વિજયે રાજ્યના નવા મુખ્યમંત્રી તરીકે શપથ ગ્રહણ કર્યા છે. રાજ્યપાલ દ્વારા તેમને પદ અને ગોપનીયતાના શપથ લેવડાવવામાં આવ્યા હતા. વિજયની સાથે અન્ય 9 વિધાયકોએ પણ મંત્રી તરીકે શપથ લીધા છે, જે સાથે જ રાજ્યમાં નવી સરકારનું ગઠન થયું છે.

સમર્થકોનું ઘોડાપૂર:

શપથવિધિ સમારોહમાં વિજયના હજારો સમર્થકો ઉમટી પડ્યા હતા. 'થલાપતિ'ના નારાઓથી સમગ્ર વાતાવરણ ગુંજી ઉઠ્યું હતું. ફિલ્મી પડદે સુપરહિટ રહ્યા બાદ હવે વિજય સામે રાજ્યના વિકાસ અને પ્રજાના પ્રશ્નો ઉકેલવાનું મોટું લક્ષ્ય છે.

કેબિનેટમાં નવા ચહેરા:

મુખ્યમંત્રી વિજયની આ નવી કેબિનેટમાં સામાજિક સંતુલન જાળવવાનો પ્રયાસ કરવામાં આવ્યો છે. શપથ લેનારા 9 મંત્રીઓમાં વિવિધ ક્ષેત્રના નિષ્ણાતો અને અનુભવી વિધાયકોનો સમાવેશ થાય છે. રાજકીય વિશ્લેષકો માની રહ્યા છે કે વિજયની આ નવી ઇનિંગ તમિલનાડુના રાજકારણમાં મોટા પરિવર્તનો લાવી શકે છે.

પ્રાથમિકતા:

શપથ લીધા બાદ મુખ્યમંત્રીએ ટૂંકું સંબોધન કરતા જણાવ્યું હતું કે, તેમનું લક્ષ્ય પારદર્શક વહીવટ અને છેવાડાના માનવી સુધી સરકારી યોજનાઓ પહોંચાડવાનું રહેશે. ખાસ કરીને શિક્ષણ અને સ્વાસ્થ્ય ક્ષેત્રે તેઓ નવી ક્રાંતિ લાવવા માંગે છે.

તમિલનાડુના આ નવા રાજકીય વળાંક પર અત્યારે સમગ્ર દેશની નજર ટકેલી છે.