ચેન્નાઈ, તા.૪: તમિલનાડુના રાજકીય ઈતિહાસમાં આજે એક નવો સૂર્યોદય જોવા મળી રહ્યો છે. રૂપેરી પડદે ધૂમ મચાવનાર થલાપતિ વિજયે હવે રાજકારણના મેદાનમાં પણ પોતાની અજેય શક્‍તિનું પ્રદર્શન કર્યું છે. ૨૦૨૬ની વિધાનસભા ચૂંટણીના પ્રારંભિક વલણોમાં તેમની પાર્ટી, તમિલગા વેટ્રી કઝગમ, ૧૦૦થી વધુ બેઠકો પર લીડ જાળવી રાખીને રાજ્‍યમાં સૌથી મોટા ઉલટફેરના સંકેતો આપી રહી છે. વર્ષોથી સત્તા પર રહેલા પ્રાદેશિક પક્ષો DMK અને AIADMK માટે આ પરિણામો એક મોટા આંચકા સમાન છે, કારણ કે જનતાએ પરંપરાગત રાજનીતિને બદલે વિજયના નવા વિઝનને પસંદ કર્યું હોય તેવું સ્‍પષ્ટ દેખાય છે.

આ પ્રચંડ સફળતા પાછળ TVK ના ઢંઢેરામાં અપાયેલા સાત ભયંકર વચનોએ ચાવીરૂપ ભૂમિકા ભજવી છે. મહિલાઓને માસિક રૂ.૨,૫૦૦ની સહાય અને વર્ષે ૬ મફત સિલિન્‍ડરની જાહેરાતે ગળહિણીઓના મન જીતી લીધા છે. વળી, અન્નન સીર થિટ્ટમ હેઠળ લગ્ન પ્રસંગે ૮ ગ્રામ સોનું અને રેશમી સાડી આપવાનું વચન સીધું જ ભાવનાત્‍મક સ્‍તરે લોકો સાથે જોડાઈ ગયું છે. શિક્ષણ ક્ષેત્રે ધોરણ ૧ થી ૧૨ના વિદ્યાર્થીઓને વાર્ષિક રૂ.૧૫,૦૦૦ની ગ્રાન્‍ટ આપવાના નિર્ણયને વાલીઓએ હોંશે હોંશે વધાવી લીધો છે, જે મતોના ધોધમાં રૂપાંતરિત થયો છે.

માત્ર મહિલાઓ જ નહીં, પણ રાજ્‍યના ખેડૂતો અને બેરોજગાર યુવાનો માટે પણ વિજય તારણહાર બનીને ઉભર્યા છે. નાના ખેડૂતોનું સંપૂર્ણ દેવું માફ કરવાની જાહેરાત અને તાાતકો માટે માસિક રૂ.૪,૦૦૦નું બેરોજગારી ભથ્‍થું એવા મુદ્દાઓ સાબિત થયા જેણે રાજ્‍યના ગ્રામીણ અને શહેરી બંને વિસ્‍તારોમાં TVK ની પકડ મજબૂત કરી દીધી છે. ચેન્નાઈના રસ્‍તાઓ પર અત્‍યારે વિજયના સમર્થકોનો અભૂતપૂર્વ ઉત્‍સાહ જોવા મળી રહ્યો છે. જો આ વલણો અંતિમ પરિણામોમાં બદલાશે, તો તમિલનાડુમાં દાયકાઓ જૂની દ્વિ-પક્ષીય રાજનીતિનો અંત આવશે અને એક નવા સુપરસ્‍ટાર યુગની શરૂઆત થશે.