ચેન્નઈ:  તમિલનાડુના રાજકીય ફલક પર એક નવા યુગનો પ્રારંભ થયો છે. મુખ્યમંત્રી સી. જોસેફ વિજયના નેતૃત્વ હેઠળની નવી સરકારે કાર્યભાર સંભાળતાની સાથે જ મંત્રીમંડળના વિભાગોની મહત્વની ફાળવણી જાહેર કરી દીધી છે. મુખ્યમંત્રીએ રાજ્યના સૌથી પાવરફુલ ગણાતા વિભાગો જેવા કે ગૃહ (પોલીસ), સામાન્ય વહીવટ, જાહેર અને મહિલા તેમજ યુવા કલ્યાણ મંત્રાલયો પોતાની પાસે રાખ્યા છે. આ નિર્ણય દ્વારા વિજયે સ્પષ્ટ સંકેત આપ્યો છે કે રાજ્યની સુરક્ષા, કાયદો-વ્યવસ્થા અને વહીવટી પારદર્શિતા પર તેમનો સીધો અંકુશ રહેશે. સચિવાલય દ્વારા બહાર પાડવામાં આવેલી યાદી મુજબ, મુખ્યમંત્રી સહિત કુલ 10 મંત્રીઓ હવે તમિલનાડુના વિકાસની ગાડી આગળ ધપાવશે.

વિભાગોની આ ફાળવણીમાં અનુભવ અને ક્ષમતાનું સંતુલન જોવા મળ્યું છે. અનુભવી નેતા કે. એ. સેંગોટૈયાનને રાજ્યના નાણાં પ્રધાન બનાવવામાં આવ્યા છે, જેમના ખભે તમિલનાડુની આર્થિક સ્થિતિ સુધારવાની જવાબદારી રહેશે. બીજી તરફ, આધવ અર્જુનને જાહેર બાંધકામ (PWD) અને રમતગમત જેવા મહત્વના વિભાગો સોંપાયા છે. આરોગ્ય ક્ષેત્રે પરિવર્તન લાવવા માટે કે. જી. અરુણરાજને જવાબદારી અપાઈ છે, જ્યારે એન. આનંદ ગ્રામીણ વિકાસ અને જળ સંસાધનનું કામ સંભાળશે. આ ટીમ દ્વારા મુખ્યમંત્રી વિજયે શિક્ષણથી લઈને ઉદ્યોગ સુધીના તમામ ક્ષેત્રોને આવરી લેવાનો પ્રયાસ કર્યો છે.

નવી સરકારના અન્ય મંત્રીઓમાં એસ. કીર્થનાને ઉદ્યોગ મંત્રી તરીકે સ્થાન મળ્યું છે, જે રાજ્યમાં નવા રોકાણો લાવવા માટે કાર્ય કરશે. શાળા શિક્ષણ વિભાગની જવાબદારી રાજમોહનને સોંપવામાં આવી છે, જ્યારે આર. નિર્મલકુમાર ઉર્જા અને કાયદા વિભાગ સંભાળશે. પી. વેંકટરામન ખાદ્ય અને નાગરિક પુરવઠા મંત્રાલય દ્વારા સામાન્ય જનતાની પાયાની જરૂરિયાતો પર ધ્યાન આપશે. મુખ્યમંત્રી વિજયે જે રીતે યુવા અને મહિલા કલ્યાણ વિભાગ પોતાની પાસે રાખ્યો છે, તે દર્શાવે છે કે તેઓ રાજ્યના ભાવિ પેઢી અને મહિલા સશક્તિકરણ માટે વ્યક્તિગત રીતે રસ લઈ રહ્યા છે.