​મુંબઈ: રેલવે પ્રવાસીઓની સુરક્ષા સામે ફરી એકવાર મોટા સવાલો ઊભા થયા છે. યશવંતપુરથી બીકાનેર જઈ રહેલી એક્સપ્રેસ ટ્રેનમાં સોલાપુર નજીક મોડી રાત્રે હથિયારધારી લૂંટારુઓએ ભારે આતંક મચાવ્યો હતો. લૂંટારુઓએ ટ્રેનની ચેઈન ખેંચીને તેને અવાવરૂ જગ્યાએ રોકી દીધી હતી અને ત્યારબાદ મુસાફરો પર હુમલો કરી લાખો રૂપિયાની લૂંટ ચલાવીને ફરાર થઈ ગયા છે. આ ઘટનાને પગલે ટ્રેન પ્રવાસીઓમાં ભારે ફફડાટ અને આક્રોશનો માહોલ જોવા મળી રહ્યો છે.
​મોડી રાત્રે ચેઈન પુલિંગ કરીને ટ્રેન રોકી, બોગીઓમાં મચાવી લૂંટફાટ
​મળતી વિગતો અનુસાર, યશવંતપુર-બીકાનેર એક્સપ્રેસ ટ્રેન જ્યારે મહારાષ્ટ્રના સોલાપુર સ્ટેશન નજીકથી પસાર થઈ રહી હતી, ત્યારે અંધારાનો લાભ લઈને લૂંટારુઓએ ટ્રેનનું ચેઈન પુલિંગ કર્યું હતું. ટ્રેન સુમસામ જગ્યાએ ઊભી રહેતા જ અગાઉથી ઘાત લગાવીને બેઠેલા હથિયારધારી બદમાશો ટ્રેનના ડબ્બાઓમાં ઘૂસી ગયા હતા. લૂંટારુઓએ મુસાફરોને હથિયારો બતાવીને ડરાવવાનું શરૂ કર્યું હતું અને તેમની પાસે રહેલા સોના-ચાંદીના દાગીના, કિંમતી મોબાઈલ અને રોકડ રકમની લૂંટ ચલાવી હતી.
​પ્રતિકાર કરનારા મુસાફરોને ઢોર માર માર્યો, ચીસાચીસથી ગુંજી ઉઠી બોગીઓ
​લૂંટ દરમિયાન જે મુસાફરોએ પોતાની કિંમતી વસ્તુઓ બચાવવાનો પ્રયાસ કર્યો અથવા પ્રતિકાર કર્યો, તેમને લૂંટારુઓએ લાકડીઓ અને ધારદાર હથિયારોથી બેરહેમીપૂર્વક માર માર્યો હતો. હુમલામાં કેટલાક મુસાફરો લોહીલુહાણ થયા હોવાના પણ અહેવાલ છે. મોડી રાત્રે બનેલી આ ઘટનાને કારણે ટ્રેનની બોગીઓ મુસાફરોની ચીસાચીસથી ગુંજી ઉઠી હતી. લૂંટની આખી ઘટનાને અંજામ આપીને બદમાશો અંધારાનો લાભ લઈ રેલવે ટ્રેક બાજુથી નાસી છૂટ્યા હતા.
​ 
​આ ઘટના બાદ જ્યારે ટ્રેન આગળના સ્ટેશને પહોંચી ત્યારે ઈજાગ્રસ્ત મુસાફરોને તાત્કાલિક સારવાર આપવામાં આવી હતી. ભોગ બનનાર મુસાફરોએ રેલવે પ્રશાસન અને રેલવે પ્રોટેક્શન ફોર્સ (RPF/GRP) ની સુરક્ષા વ્યવસ્થા સામે ગંભીર સવાલો ઉઠાવ્યા છે. રાત્રિના સમયે ટ્રેનમાં પૂરતો પોલીસ બંદોબસ્ત કેમ નહોતો, તેવો આક્રોશ મુસાફરોએ ઠાલવ્યો હતો. હાલમાં રેલવે પોલીસે અજાણ્યા લૂંટારુઓ વિરુદ્ધ ગુનો નોંધીને તેમની ધરપકડ કરવા માટે અલગ-અલગ ટીમો બનાવીને તપાસના ચક્રો ગતિમાન કર્યા છે.