વોશિંગ્ટન : યુનાઇટેડ સ્ટેટ્સમાં હાલમાં એક અદ્રશ્ય દુશ્મન સામે આરોગ્ય તંત્ર જંગ લડી રહ્યું છે. 'સાયક્લોસ્પોરિયાસિસ' નામના પરોપજીવીએ મિશિગન સહિત અનેક રાજ્યોમાં પગપેસારો કરીને સેંકડો લોકોને બીમાર કરી દીધા છે. અત્યાર સુધીમાં ૩૦૦થી વધુ કેસ નોંધાઈ ચૂક્યા છે અને ૨૦ જેટલા લોકોને હોસ્પિટલમાં દાખલ કરવાની ફરજ પડી છે. જોકે કોઈ મૃત્યુ નોંધાયું નથી, પરંતુ મે મહિનાથી શરૂ થયેલો આ ચેપ હવે રફ્તાર પકડી રહ્યો છે, જેના પગલે યુ.એસ. સેન્ટર્સ ફોર ડિસીઝ કંટ્રોલ એન્ડ પ્રિવેન્શન (CDC) એ સક્રિય તપાસ શરૂ કરી છે.
શું છે આ સાયક્લોસ્પોરિયાસિસ?
સાયક્લોસ્પોરિયાસિસ એ એક પ્રકારનું ગંભીર ફૂડ પોઈઝનિંગ છે, જે 'સાયક્લોસ્પોરા કેયેટેનેન્સિસ' નામના સૂક્ષ્મ પરોપજીવીથી ફેલાય છે. આ પરોપજીવી સામાન્ય રીતે માનવ મળમાં જોવા મળે છે અને જ્યારે દૂષિત પાણી કે ખોરાક દ્વારા શરીરમાં પ્રવેશ કરે છે, ત્યારે તે વ્યક્તિને બીમાર પાડે છે. તે હવા કે સ્પર્શ દ્વારા ફેલાતું નથી, પરંતુ દૂષિત ખોરાકનું સેવન સૌથી મોટું જોખમ છે. ખાસ કરીને રાસબેરી, તુલસી, પીસેલા (કોથમીર), વટાણા અને મેસ્ક્લુન લેટીસ જેવા આયાતી ઉત્પાદનો આ પરોપજીવીના વાહક હોવાનું માનવામાં આવે છે.
લક્ષણો અને સાવચેતી
આ ચેપનું સૌથી મુખ્ય અને પીડાદાયક લક્ષણ ગંભીર, પાણીયુક્ત અને 'વિસ્ફોટક' ઝાડા છે. આ ઉપરાંત દર્દીને હળવો તાવ, ઉબકા, પેટમાં સતત ખેંચાણ અને ભૂખ ન લાગવાની સમસ્યા થાય છે. નિષ્ણાતોના મતે, આ બીમારી થોડા દિવસોથી લઈને એક મહિના સુધી રહી શકે છે અને ઘણીવાર સાજા થયા પછી ફરીથી પણ જોવા મળી શકે છે. મિશિગન યુનિવર્સિટીના માઇક્રોબાયોલોજી પ્રોફેસર વર્ન કેરુથર્સ મુજબ, આ પરોપજીવી ક્લોરિન જેવા જીવાણુનાશકો સામે પણ પ્રતિરોધક હોઈ શકે છે, તેથી પાણીમાં પણ તે લાંબા સમય સુધી સક્રિય રહી શકે છે.
વહીવટીતંત્રની તપાસ તેજ
મિશિગન ડિપાર્ટમેન્ટ ઓફ હેલ્થ એન્ડ હ્યુમન સર્વિસીસ અને CDC સંયુક્ત રીતે તપાસ કરી રહ્યા છે કે આ ફાટી નીકળવા પાછળનું ચોક્કસ કારણ શું છે. અત્યાર સુધી કોઈ એક સિંગલ સ્ત્રોત મળી આવ્યો નથી, જેનો અર્થ છે કે વિવિધ રાજ્યોમાં અલગ-અલગ કારણો હોઈ શકે છે. સત્તાવાળાઓએ નાગરિકોને સલાહ આપી છે કે તાજા ફળો અને શાકભાજી ખાતા પહેલા તેને યોગ્ય રીતે સાફ કરવા અને વ્યક્તિગત સ્વચ્છતાનું ખાસ ધ્યાન રાખવું. ઉષ્ણકટિબંધીય પ્રદેશોમાં સામાન્ય ગણાતી આ બીમારી યુ.એસ.માં પણ દર વર્ષે સેંકડો કેસ નોધાવે છે, પરંતુ આ વર્ષે તેમાં નોંધપાત્ર વધારો જોવા મળી રહ્યો છે, જેણે વહીવટીતંત્રને એલર્ટ મોડ પર મૂકી દીધું છે.