પેશાવર : પાકિસ્તાનનો ઉત્તર-પશ્ચિમ સરહદી વિસ્તાર ફરી એકવાર ભયાનક આતંકવાદી હુમલાઓથી લોહીલુહાણ થઈ ગયો છે. અશાંત ગણાતા ખૈબર પખ્તુનખ્વા પ્રાંતમાં સોમવારે એક હૃદયકંપાવનારો આઈઈડી (IED) વિસ્ફોટ અને રહસ્યમય ડ્રોન હુમલો થતાં આખા દેશની સુરક્ષા એજન્સીઓ પર ગંભીર પ્રશ્નાર્થ ચિહ્નો ઉભા થયા છે. દક્ષિણ વઝીરિસ્તાનના વાના શહેરના એક વ્યસ્ત બજારમાં થયેલા બ્લાસ્ટમાં એક વગદાર આદિવાસી વડા (ટ્રાઇબલ ચીફ) સહિત ત્રણ લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે અન્ય એક જિલ્લામાં ઘર પર થયેલા હવાઈ હુમલામાં આખો પરિવાર લોહીલુહાણ થયો છે. આ હુમલાઓને કારણે સમગ્ર સરહદી વિસ્તારમાં ભારે દહેશત અને આક્રોશનો માહોલ છે.

બજાર વચ્ચે આદિવાસી વડાના વાહનને નિશાન બનાવી બોમ્બ ધડાકો કરાયો

જિલ્લા પોલીસ અધિકારી મોહમ્મદ તાહિર શાહ વઝીરના જણાવ્યા અનુસાર, પ્રથમ લોહિયાળ ઘટના દક્ષિણ વઝીરિસ્તાનના વાના શહેરના મુખ્ય બજારમાં આવેલા ગુલશન પ્લાઝા નજીક બની હતી. અહમદઝાઈ આદિવાસી કુળના પ્રતિષ્ઠિત વડા મલિક તારિક પોતાના કાફલા અને વાહન સાથે બજાર વિસ્તારમાંથી પસાર થઈ રહ્યા હતા, બરાબર તે જ સમયે રસ્તા કિનારે પ્લાન્ટ કરાયેલા રિમોટ-કંટ્રોલ આઈઈડી (IED) માં જોરદાર વિસ્ફોટ થયો હતો.

આ આત્મઘાતી કક્ષાનો વિસ્ફોટ એટલો શક્તિશાળી હતો કે મલિક તારિક સહિત ત્રણ લોકોના શરીરના ટુકડા થઈ ગયા હતા અને તેઓ ત્યાં જ મૃત્યુ પામ્યા હતા, જ્યારે અન્ય ચાર રાહદારીઓ ગંભીર રીતે ઘાયલ થયા હતા. ધડાકાના પગલે આખા બજારમાં નાસભાગ મચી ગઈ હતી અને ગભરાટના કારણે વેપારીઓએ તાત્કાલિક દુકાનો અને બજારો બંધ કરી દીધા હતા.

બીજી આફત: રહસ્યમય ડ્રોન હુમલામાં આખો પરિવાર ઘાયલ

હજુ આ બોમ્બ ધડાકાની ગુંજ શાંત થઈ ન હતી, ત્યાં જ ખૈબર પખ્તુનખ્વાના જ બાજૌર જિલ્લામાંથી વધુ એક ચોંકાવનારી ઘટના સામે આવી. અહીં એક રહેણાંક મકાન પર આકાશમાંથી અચાનક શંકાસ્પદ ડ્રોન હુમલો (Drone Strike) કરવામાં આવ્યો હતો. આ હવાઈ હુમલામાં ઘરની અંદર હાજર એક જ પરિવારના છ સભ્યો ગંભીર રીતે દાઝી જવાથી અને કાટમાળ નીચે દબાવાથી ઘાયલ થયા છે. સ્થાનિક બચાવ ટીમોએ તમામ ઈજાગ્રસ્તોને તાત્કાલિક ખારના જિલ્લા મુખ્યાલયની હોસ્પિટલમાં એડમિટ કર્યા છે, જ્યાં કેટલાકની હાલત અત્યંત નાજુક હોવાનું કહેવાય છે.

પ્રતિબંધિત આતંકી સંગઠન TTP પર શંકાની સોય

આ ભયાનક ડબલ હુમલાની જવાબદારી હજુ સુધી કોઈ આતંકવાદી સંગઠને સત્તાવાર રીતે સ્વીકારી નથી. જોકે, પાકિસ્તાની ગુપ્તચર એજન્સીઓ અને સરકારની શંકાની સોય પ્રતિબંધિત સંગઠન તહરીક-એ-તાલિબાન પાકિસ્તાન (TTP) તરફ છે. સત્તાવાર અહેવાલો મુજબ, નવેમ્બર ૨૦૨૨ માં પાકિસ્તાન સરકાર અને ટ્ટીપી (TTP) વચ્ચેનો યુદ્ધવિરામ કરાર તૂટ્યા બાદથી, આ સંગઠન સતત સરકારી ઈન્ફ્રાસ્ટ્રક્ચર, પોલીસ ચોકીઓ અને નાગરિકોને નિશાન બનાવી રહ્યું છે. આ અગાઉ બન્નુ પોલીસ કેમ્પને પણ ૧,૫૦૦ કિલો વિસ્ફોટકો ભરેલી ટ્રકથી ઉડાવી દેવાયો હતો જેમાં ૧૫ સૈનિકો શહીદ થયા હતા. આ સતત થઈ રહેલા હુમલાઓથી સ્થાનિક નાગરિકોમાં પાકિસ્તાન સેનાની સુરક્ષા નીતિઓ સામે ભારે રોષ જોવા મળી રહ્યો છે.