તહેરાન: ઈરાનના તહેરાનની પૂર્વમાં આવેલા અત્યંત સંવેદનશીલ પારચીન સૈન્ય સંકુલ નજીક છેલ્લા કેટલાક કલાકોમાં અનેક ભયાનક વિસ્ફોટોના અહેવાલો મળ્યા છે, જેનાથી સમગ્ર વિસ્તારમાં તણાવનો માહોલ સર્જાયો છે.

તાજા અહેવાલો અનુસાર, ઈરાનની રાજધાની તહેરાનની પૂર્વ દિશામાં આવેલા અત્યંત સંવેદનશીલ પારચીન સૈન્ય સંકુલની આસપાસના વિસ્તારોમાં છેલ્લા કેટલાક કલાકોમાં ઉપરાછાપરી અનેક ભયાનક વિસ્ફોટો સાંભળવા મળ્યા છે. 

પારચીન લશ્કરી મથક ઈરાનના સંરક્ષણ અને શસ્ત્ર કાર્યક્રમ માટે ખૂબ જ નિર્ણાયક માનવામાં આવે છે, અને તે ભૂતકાળમાં પણ આંતરરાષ્ટ્રીય એજન્સીઓના નિરીક્ષણ હેઠળ રહ્યું છે. 

આ ધડાકાઓ એટલા તીવ્ર હતા કે આસપાસના વિસ્તારોમાં ભયનો માહોલ ફેલાઈ ગયો છે. 

હાલમાં આ વિસ્ફોટો પાછળ કોઈ અકસ્માત છે કે કોઈ બાહ્ય હુમલો, તે અંગે ઈરાન સરકાર કે લશ્કર દ્વારા કોઈ સત્તાવાર નિવેદન બહાર પાડવામાં આવ્યું નથી. 

જોકે, અમેરિકા દ્વારા તાજેતરમાં ઈરાની ઓઈલ પરના પ્રતિબંધો કડક કરવાના અને હોર્મુઝની સામુદ્રધુનીમાં નૌકાદળની જમાવટના ઘટનાક્રમ સાથે આ વિસ્ફોટોને જોડીને જોવામાં આવી રહ્યા છે. 

આ ઘટના બાદ પશ્ચિમ એશિયામાં યુદ્ધ જેવી સ્થિતિ નિર્માણ પામવાની આશંકાઓ વધુ પ્રબળ બની છે અને સમગ્ર વિશ્વની નજર આ વિસ્તાર પર કેન્દ્રિત થઈ છે.