પટના : બિહારના રાજકારણમાં રવિવારે તે સમયે ભારે હલચલ મચી ગઈ જ્યારે જનશક્તિ જનતા દળ (JJD) પાર્ટીના સુપ્રીમો અને લાલુ પ્રસાદ યાદવના મોટા પુત્ર તેજ પ્રતાપ યાદવે સોશિયલ મીડિયા પર સત્તાવાર પોસ્ટ કરીને બિહાર સરકારના પીએચઇડી (PHED) મંત્રી અને મહુઆ વિધાનસભા બેઠકના ધારાસભ્ય સંજય સિંહ સામે દિલ્હીની એક હોટલમાં યુવતી સાથે દુર્વ્યવહાર તથા શોષણ કરવાનો પ્રયાસ કરવાના અત્યંત ગંભીર આરોપો લગાવ્યા હતા, અને આ મામલો ૨૫ લાખ રૂપિયાના કથિત નાણાકીય વ્યવહાર દ્વારા દબાવી દેવાયાનો દાવો કરતા રાજકીય ગલિયારામાં ભારે ગરમાવો આવી ગયો છે.

ઘટનાની વિગતો આપતા તેજ પ્રતાપ યાદવે પોતાના ઇન્સ્ટાગ્રામ હેન્ડલ પર સનસનાટીભર્યા દાવા કર્યા હતા કે સંજય સિંહ સામે દિલ્હીની હોટલના સ્ટાફની દરમિયાનગીરી બાદ મામલો સપાટી પર આવ્યો હતો, જ્યાં હોટલના કર્મચારીઓએ સમયસૂચકતા દાખવીને પરિસ્થિતિને થાળે પાડી હતી પરંતુ બાદમાં આ પ્રકરણને છુપાવવા માટે મોટો વહીવટ કરવામાં આવ્યો હતો. આ આક્ષેપો સામે આવતા જ રાજકીય વર્તુળોમાં તીખી પ્રતિક્રિયાઓ શરૂ થઈ ગઈ છે અને વિરોધ પક્ષો દ્વારા આ મામલે ઉચ્ચસ્તરીય ન્યાયિક તપાસની માંગ કરવામાં આવી રહી છે, જેના કારણે સરકારની છબી સામે પણ સવાલો ખડા થયા છે.

આ ગંભીર આક્ષેપોનો આક્રમક રીતે જવાબ આપતા મંત્રી સંજય સિંહે તમામ આરોપોને નકારી કાઢ્યા છે અને તેને મંત્રી પરિષદ તેમજ બિહારને બદનામ કરવાનું મોટું રાજકીય કાવત્રું ગણાવ્યું છે, તેમજ પડકાર ફેંકતા નિવેદન આપ્યું હતું કે "જો કોઈ આ આરોપો સાબિત કરી શકે છે, તો હું તાત્કાલિક રાજકારણમાંથી નિવૃત્તિ લઈ લઈશ, જો કોઈની પાસે નક્કર પુરાવા હોય તો તે સાર્વજનિક કરે." સંજય સિંહે વધુમાં ઉમેર્યું હતું કે રાજકીય દ્વેષભાવ અને બદલાની ભાવનાથી પ્રેરાઈને તેમની કારકિર્દીને ડાઘ લગાડવાના હેતુથી આ પ્રકારના પાયાવિહોણા કાવતરાં રચવામાં આવી રહ્યા છે.

આ વિવાદની પૃષ્ઠભૂમિમાં વર્ષ ૨૦૨૫ની મહુઆ વિધાનસભા ચૂંટણીનો ઇતિહાસ જોડાયેલો છે, જ્યાં ચિરાગ પાસવાનની લોક જનશક્તિ પાર્ટી (રામ વિલાસ) ની ટિકિટ પર લડીને સંજય સિંહે તેજ પ્રતાપ યાદવને હરાવ્યા હતા, જ્યારે તેજ પ્રતાપે ૨૦૧૫માં આ જ બેઠક પરથી પોતાની પહેલી ચૂંટણી જીતીને રાજકીય સફર શરૂ કરી હતી. હાલમાં મંત્રી સંજય સિંહ વિરુદ્ધ આવેલા આ વિવાદાસ્પદ આરોપો બાદ બંને નેતાઓ વચ્ચેનો રાજકીય સંઘર્ષ ચરમસીમાએ પહોંચ્યો છે, અને આગામી દિવસોમાં પોલીસ કે અન્ય તપાસ એજન્સીઓ દ્વારા આ મામલે શું પગલાં લેવાય છે તેના પર સૌની નજર ટકેલી છે.