ચંદીગઢ : હરિયાણામાં છેલ્લા બે દાયકાથી પોતાની કાયમી નોકરી માટે સંઘર્ષ કરી રહેલા હજારો મહેમાન શિક્ષકો માટે એક ઐતિહાસિક અને રાહતરૂપ સમાચાર સામે આવ્યા છે. પંજાબ અને હરિયાણા હાઈકોર્ટે હરિયાણા સરકારની નીતિઓને આડે હાથ લેતા સ્પષ્ટ કર્યું છે કે, દાયકાઓથી શિક્ષણ પ્રણાલીમાં પાયાનું કામ કરતા શિક્ષકોને માત્ર કામચલાઉ વ્યવસ્થા ગણી શકાય નહીં. કોર્ટે સરકારને બે મહિનાની અંદર મહેમાન શિક્ષકોના નિયમિતકરણની પ્રક્રિયા પૂર્ણ કરવાનો કડક નિર્દેશ આપ્યો છે.
કોર્ટની ધારદાર ટિપ્પણી: શિક્ષકોનું ગૌરવ સર્વોપરી
ન્યાયાલયે સુનાવણી દરમિયાન ખૂબ જ મહત્વપૂર્ણ ટિપ્પણી કરતા જણાવ્યું હતું કે, શિક્ષકો કોઈ મશીનના 'સ્પેરપાર્ટ્સ' નથી કે જેનો ઉપયોગ જરૂરિયાત મુજબ કરવામાં આવે અને કામ પત્યે ફેંકી દેવામાં આવે. કોર્ટે સ્વીકાર્યું છે કે વર્ષ 2005 થી શાળાઓમાં નિષ્ઠાપૂર્વક સેવા આપી રહેલા આ શિક્ષકો રાષ્ટ્ર નિર્માણના પાયાના પથ્થર સમાન છે. કોર્ટના આ નિર્ણયથી રાજ્યના હજારો શિક્ષકોના ગૌરવ અને અધિકારોની જીત થઈ છે, જેમને અત્યાર સુધી માત્ર 'સ્ટોપ-ગેપ' વ્યવસ્થા હેઠળ રાખવામાં આવ્યા હતા.
2014 ની નીતિને કાનૂની મહોર
હાઈકોર્ટે તેના નિર્ણયમાં વર્ષ 2014ની નીતિને પણ કાનૂની સમર્થન આપ્યું છે, જે અંતર્ગત મહેમાન શિક્ષકોના હિતોનું રક્ષણ કરવાની જોગવાઈ હતી. ગેસ્ટ ટીચર્સ એસોસિએશનના મીડિયા ઈન્ચાર્જ ડૉ. અજય લોહાને આ નિર્ણયને ૨૦ વર્ષના અવિરત સંઘર્ષનો વિજય ગણાવ્યો છે. તેમણે કહ્યું કે, ભાજપ સરકારે ૨૦૧૪માં જે વચન આપ્યું હતું, હવે હાઈકોર્ટના આદેશ બાદ તેને પૂર્ણ કરવાની ઉત્તમ તક સરકાર પાસે આવી છે.
આશાનું નવું કિરણ
શિક્ષક સંગઠનો હવે સરકાર પાસે અપેક્ષા રાખી રહ્યા છે કે, કોઈપણ પ્રકારના વિલંબ કે બહાના વગર કોર્ટના આદેશનો તાત્કાલિક અમલ કરવામાં આવે. આ નિર્ણય માત્ર નોકરીની સુરક્ષાનો જ પ્રશ્ન નથી, પરંતુ હજારો શિક્ષકોના પરિવારો માટે એક નવું જીવન અને ન્યાયનો નવો અધ્યાય છે. હવે જોવાનું એ રહેશે કે સરકાર કોર્ટના આ નિર્દેશને કેટલી ઝડપથી અમલમાં મૂકીને શિક્ષકોને કાયમી નોકરીની ભેટ આપે છે.