બેંગલુરુ : તમિલનાડુ વિધાનસભા ચૂંટણીના પરિણામો બાદ દક્ષિણ ભારતના રાજકારણમાં ગરમાવો આવ્યો છે. ખાસ કરીને તમિલનાડુના કોંગ્રેસના ધારાસભ્યોને તોડજોડના ડરથી બેંગલુરુ નજીકના ઈગલટન રિસોર્ટમાં ખસેડવામાં આવ્યા હોવાની અટકળો વહેતી થઈ હતી. જોકે, કર્ણાટકના નાયબ મુખ્યમંત્રી અને પ્રદેશ કોંગ્રેસ પ્રમુખ ડી.કે. શિવકુમારે આ તમામ દાવાઓને સખત શબ્દોમાં ફગાવી દીધા છે.
રિસોર્ટ પોલિટિક્સના દાવા પર શિવકુમારનો જવાબ
બેંગલુરુમાં પત્રકારો સાથે વાતચીત કરતા ડી.કે. શિવકુમારે સ્પષ્ટ કર્યું હતું કે, "આ બધી વાતો ખોટી છે. કોઈ પણ ધારાસભ્યો ઈગલટન રિસોર્ટમાં આવ્યા નથી અને મને આવી કોઈ જાણકારી પણ નથી". તેમણે વધુમાં ઉમેર્યું કે તેમણે માત્ર મીડિયા અહેવાલો દ્વારા તમિલનાડુની હિલચાલ વિશે જોયું છે, પરંતુ કોંગ્રેસ હાઈકમાન્ડ તરફથી તેમને આ બાબતે કોઈ પત્રવ્યવહાર કે સૂચના મળી નથી. જો હાઈકમાન્ડ કોઈ નિર્ણય લેશે, તો પક્ષના શિસ્તબદ્ધ કાર્યકર તરીકે તેઓ તેનું પાલન કરશે.
યેદિયુરપ્પાના અભિમાન ઉત્સવ અને ક્રિકેટ ટિકિટ વિવાદ
રાજકીય અટકળો વચ્ચે શિવકુમારે પૂર્વ મુખ્યમંત્રી બી.એસ. યેદિયુરપ્પાના સન્માન માટે આયોજિત 'અભિમાન ઉત્સવ' અંગે પણ પ્રતિક્રિયા આપી હતી. તેમણે કહ્યું કે રાજકીય મતભેદો વ્યક્તિગત સન્માનમાં આડે ન આવવા જોઈએ અને તેમણે યેદિયુરપ્પાના સારા સ્વાસ્થ્ય માટે શુભેચ્છા પાઠવી હતી. બીજી તરફ, કર્ણાટકના ધારાસભ્યોને IPLની ટિકિટોની ફાળવણી અંગે ચાલી રહેલા વિવાદ પર તેમણે ભાજપ પર નિશાન સાધતા કહ્યું કે વિપક્ષ બિનજરૂરી રીતે આ મુદ્દાનું રાજકારણ રમી રહ્યો છે. તેમણે સ્પષ્ટ કર્યું કે તમામ પક્ષોના ધારાસભ્યોની માંગણી મુજબ ટિકિટ ફાળવણીની રજૂઆત કરવામાં આવી હતી.
શનિદેવના દર્શને રવાના
તમામ રાજકીય ગજગ્રાહ વચ્ચે ડી.કે. શિવકુમારે શનિવારે પોંડિચેરી જવાની પુષ્ટિ કરી હતી. તેમણે જણાવ્યું હતું કે, "ઘણા સમયથી હું શનેશ્વર મંદિરના દર્શને જઈ શક્યો નહોતો, તેથી આજે દર્શન કરવા માટે જઈ રહ્યો છું". ઉલ્લેખનીય છે કે તમિલનાડુમાં સરકાર રચવા માટે પક્ષો વચ્ચે ચાલી રહેલી આંતરિક મંત્રણાઓ વચ્ચે શિવકુમારનું આ નિવેદન રિસોર્ટ પોલિટિક્સની ચર્ચાઓ પર પૂર્ણવિરામ મૂકે તેવું માનવામાં આવે છે.