લે! હરિયાણા ગામમાં લવ મેરેજ પર બેન ! ઠરાવ પસાર કર્યો
એવું શું થયું કે પંચાયતે લેવો પડ્યો આવો નિર્ણય પંચાયતના મતે આવાં લવ મેરેજ સ્થાનિક રીત-રિવાજો અને પરંપરાઓનું ઉલ્લંઘન કરનારાં છે : આ પંચાયત સત્તાવાર રીતે ચૂંટાયેલી નથી. પણ જ્યારે આ નિર્ણય લેવાયો ત્યારે હિસારના આર્ય નગર ગામના લગભગ હજારેક ગ્રામવાસીઓ હાજર રહ્યા હતા
હિસાર તા.૨૩: લવ મેરેજને સમાજમાં સહજતાથી સ્વીકારવામાં આવતાં નથી. વારંવાર જ્ઞાતિઓ આને લઈને નીતિ-નિયમો બનાવતી હોય છે. હવે આ જ મુદ્દે હરિયાણાના એક ગામમાં એક મહત્ત્વનો નિર્ણય લેવામાં આવ્યો છે. પ્રાપ્ત રિપોર્ટ્સ અનુસાર હિસાર જિલ્લાની એક ગ્રામપંચાયતે પ્રેમ લગ્ન સામે ઠરાવ પસાર કર્યો છે અને આ ઠરાવ અનુસાર એવું કહેવામાં આવ્યું છે કે જે ગામમાં રહેતી કોઇપણ વ્યક્તિ હવે ગામની જ અન્ય વ્યક્તિ સાથે લગ્ન કરી શકશે નહીં. અને જો આવું કરશે તો તેને ગામબહાર કરવામાં આવશે. આમ તો રિપોર્ટ્સ કહે છે કે આ પંચાયત સત્તાવાર રીતે ચૂંટાયેલી નથી. પણ જ્યારે આ નિર્ણય લેવાયો ત્યારે હિસારના આર્ય નગર ગામના લગભગ હજારેક ગ્રામવાસીઓ હાજર રહ્યા હતા. ઉપરથી આ પંચાયતમાં તો કેટલાક લોકોએ એવી પણ દરખાસ્ત મૂકી હતી કે જે કોઈપણ વ્યક્તિ કે પરિવાર હવેથી આવાં પ્રેમ લગ્નને ટેકો આપશે તેની સામે પણ કાર્યવાહી કરવી જોઇએ.
હવે સવાલ એ થાય કે શા માટે આ ગામ માં અચાનક આવો નિર્ણય લેવાની ફરજ પડી હતી. તો તમને જણાવી દઈએ કે આ ગામમાં છેલ્લા કેટલાક મહિનાઓમાં ત્રણ ત્રણ પ્રેમલગ્ન થયાં છે. અમ ઉપરાઉપરી ગામના ને ગામના લોકો લગ્નગ્રંથિથી જોડાતાં કુલવંત ગોસલાના અધ્યક્ષસ્થાને લગભગ ૧૦૦૦ લોકોની એક ગામપંચાયત બોલાવવામાં આવી હતી અને આ પંચાયતમાં સર્વાનુમતે નિર્ણય લેવાયો કે ગામની તમામ યુવતીઓને ગામની દીકરીઓ માનવામાં આવે છે, તેથી આપણા ગામમાં રહેતા યુવક-યુવતીઓ પરસ્પર લગ્ન નહીં કરી શકે, અને જો તેઓ લગ્ન કરશે તો ગામબહાર કરવામાં આવશે.
પંચાયતના મતે આવાં લવ મેરેજ સ્થાનિક રીત-રિવાજો અને પરંપરાઓનું ઉલ્લંઘન કરનારાં છે. પંચાયતે એમ પણ જણાવ્યું છે કે ગામમાં કોઈ કપલ પ્રેમલગ્ન ન કરે તે મુદ્દે નજર રાખવા માટે એક ખાસ કમિટીનું પણ ગઠન કરી દેવામાં આવ્યું છે. એક ગ્રામ્યવાસીએ જણાવ્યું કે, ગામની દરેક ગર્લ્સ આમારા માટે દીકરી સમાન છે. હવે આ લવ મેરેજની જાણે એક નવી જ શરૂ થઈ ગઈ છે. જે આમારા ગામમાં ચાલતા આવતા સામાજિક રિવાજોની વિરુદ્ધ છે, અને આખું ગામ તેનો વિરોધ કરવા માટે એક સાથે આવ્યું છે
જોકે, ગામપંચાયત (Haryana) દ્વારા લેવાયેલ આ નિર્ણયની દેશભરમાં ભારે ટીકા પણ થઈ રહી છે. આખરે આ ટીકાઓના વરસાદ વચ્ચે સ્થાનિક ગ્રામ પંચાયતે સ્પષ્ટતા કરી છે કે આ નિર્ણય સાથે તેમને કોઈ લેવાદેવા નથી અને આ તુઘલકી ફરમાન સંપૂર્ણપણે સામાજિક સ્તરે બોલાવાયેલી પંચાયત દ્વારા લેવામાં આવ્યું છે. એટલે જ હવે એ જોવાનું રહે છે કે કાનૂની અને બંધારણીય અધિકારોનો અનાદર કરતા આવા નિર્ણય સામે પ્રશાસન કોઈ પગલાં ભરે છે કે કેમ.
(10:08 AM IST)
છેલ્લા 8 દિવસમાં સૌથી લોકપ્રિય 
