કોલકાતા: પશ્ચિમ બંગાળમાં સત્તાના સમીકરણો બદલાતાની સાથે જ મુખ્યમંત્રી સુવેન્દુ અધિકારીએ વહીવટી તંત્ર પર પોતાની પકડ મજબૂત કરવાનું શરૂ કરી દીધું છે. સોમવારે મળેલી પ્રથમ કેબિનેટ બેઠકમાં લેવાયેલા કડક નિર્ણયોએ સમગ્ર રાજ્યના અમલદારશાહીમાં ફફડાટ ફેલાવી દીધો છે. મમતા બેનર્જી સરકાર દ્વારા વિવિધ સરકારી બોર્ડ, નિગમો અને જાહેર ક્ષેત્રના એકમોમાં રાજકીય રીતે નિયુક્ત કરવામાં આવેલા તમામ અધ્યક્ષો અને ડિરેક્ટરોને તાત્કાલિક અસરથી બરતરફ કરવાનો આદેશ અપાયો છે. આટલું જ નહીં, જે અધિકારીઓ 60 વર્ષની વય વટાવ્યા પછી પણ 'સ્પેશિયલ એક્સટેન્શન' પર કામ કરી રહ્યા હતા, તેમની સેવાઓ પણ રાતોરાત સમાપ્ત કરી દેવામાં આવી છે, જે સ્પષ્ટ કરે છે કે નવી સરકાર હવે યુવા અને નવા ચહેરાઓને પ્રાધાન્ય આપવા માંગે છે.

વહીવટી ફેરફારો ઉપરાંત, સુવેન્દુ કેબિનેટે રાષ્ટ્રીય સુરક્ષા અને જનકલ્યાણના મુદ્દે પણ આક્રમક અભિગમ અપનાવ્યો છે. વર્ષોથી અટકેલા ભારત-બાંગ્લાદેશ સરહદ પર વાડ બનાવવાના કામને વેગ આપવા માટે BSFને જમીન ટ્રાન્સફર કરવાની મંજૂરી આપી દેવામાં આવી છે, જેનું કામ 11 મેથી યુદ્ધના ધોરણે શરૂ થશે. આ સાથે જ, પૂર્વ મમતા સરકાર દ્વારા જે કેન્દ્રીય યોજનાઓને રોકવામાં આવી હતી, તેમાંની સૌથી મહત્વકાંક્ષી 'આયુષ્માન ભારત યોજના' હવે બંગાળના ઘરે-ઘરે પહોંચશે. આ નિર્ણયથી લાખો ગરીબ પરિવારોને મફત સારવારનો લાભ મળશે, જે અત્યાર સુધી રાજકીય ખેંચતાણને કારણે વંચિત હતા.

શિક્ષણ અને કાયદાકીય વ્યવસ્થામાં પણ આમૂલ પરિવર્તનના શ્રીગણેશ કરવામાં આવ્યા છે. રાજ્યની સરકારી શાળાઓમાં નોકરીની રાહ જોતા યુવાનો માટે વય મર્યાદામાં 5 વર્ષનો વધારો કરીને સરકારે શિક્ષિત બેરોજગારોને મોટી ભેટ આપી છે. રસપ્રદ વાત એ છે કે, મુખ્યમંત્રીએ અગાઉની સરકાર પર બંધારણીય ઉલ્લંઘનનો આરોપ લગાવતા ભારતીય દંડ સંહિતાને ચુસ્તપણે લાગુ કરવાની અને 2025ની વસ્તી ગણતરી માટે કેન્દ્રની સૂચનાઓનું પાલન કરવાની જાહેરાત કરી છે. આમ, સુવેન્દુ અધિકારીએ પ્રથમ દિવસે જ સાબિત કરી દીધું છે કે બંગાળ હવે 'દીદી'ના માર્ગે નહીં પણ કેન્દ્ર સાથે કદમ મિલાવીને 'નવા બંગાળ'ના માર્ગે ચાલશે.