કોલકાતા: પશ્ચિમ બંગાળના રાજકીય ઇતિહાસમાં મુખ્યમંત્રી તરીકેની ધુરા સંભાળ્યા બાદ સુવેન્દુ અધિકારી શનિવારે તેમની પ્રથમ સત્તાવાર જિલ્લા મુલાકાતે નીકળ્યા હતા. સીએમ સુવેન્દુ સીધા જ દક્ષિણ ૨૪ પરગણાના ડાયમંડ હાર્બર પહોંચ્યા હતા, જે તૃણમૂલ કોંગ્રેસ (TMC) ના રાષ્ટ્રીય મહાસચિવ અને મમતા બેનર્જીના ભત્રીજા અભિષેક બેનર્જીનો અભેદ્ય ગઢ માનવામાં આવે છે. અહીં તેમણે એક ભવ્ય રાજકીય જાહેર સભાને સંબોધિત કરતા સુપરહિટ ફિલ્મના અંદાજમાં ગર્જના કરી હતી કે, "પુષ્પા ક્યાં છે?". સીએમ સુવેન્દુનો આ ઈશારો સ્થાનિક ટીએમસી નેતા જહાંગીર ખાન તરફ હતો, જેના કારણે ફાલ્ટાના રાજકારણમાં ભારે ગરમાવો આવી ગયો છે.

'ચૂંટણી પતવા દો, કહેવાતા પુષ્પાને જેલના સળિયા પાછળ ધકેલી દઈશ'

ડાયમંડ હાર્બર લોકસભા હેઠળની ફાલ્ટા વિધાનસભા બેઠક પર આગામી ૨૧ મેના રોજ ફરીથી મતદાન (Re-polling) થવાનું છે. ભાજપના ઉમેદવારના સમર્થનમાં સભા ગજવતા સીએમ સુવેન્દુ અધિકારીએ ટીએમસીના દબંગ નેતા જહાંગીર ખાન પર સીધું નિશાન સાધ્યું હતું. તેમણે કડક શબ્દોમાં ચેતવણી આપતા કહ્યું કે, "તાજેતરની ચૂંટણીઓ દરમિયાન પોતાની સરખામણી 'પુષ્પા' સાથે કરીને ગુંડાગર્દી કરનારા જહાંગીર ખાનનો કેસ હવે હું વ્યક્તિગત રીતે સંભાળીશ. આ ચૂંટણીઓ પૂર્ણ થતાં જ ફાલ્ટાના તમામ ગુંડાઓ અને બદમાશોને જેલના સળિયા પાછળ ધકેલી દેવાની જવાબદારી હવે મારી છે."

આઈપીએસ 'સિંઘમ' સામે ટીએમસી નેતાએ કહ્યું હતું- 'હું પુષ્પા છું, ઝૂકેગા નહીં'

હકીકતમાં, આ વિવાદ પાછળ એક બહુ જ રસપ્રદ વાર્તા છે. ૨૯ એપ્રિલે ફાલ્ટામાં થયેલી ચૂંટણી દરમિયાન ભારે હિંસા, ઈવીએમ (EVM) સાથે ચેડાં અને મતદારોને ધમકાવવાના આરોપો બાદ ચૂંટણી પંચે ત્યાંનું મતદાન રદ કર્યું હતું. તે સમયે ચૂંટણી પંચ દ્વારા બંગાળમાં ખાસ પોલીસ નિરીક્ષક તરીકે ઉત્તર પ્રદેશ કેડરના કડક IPS અધિકારી અજય પાલ શર્માને મૂકવામાં આવ્યા હતા, જેમના કડક અંદાજને કારણે લોકો તેમને 'સિંઘમ' કહેતા હતા. એક વાયરલ વીડિયોમાં આ સિંઘમ ઓફિસર જહાંગીર ખાનના પરિવારને ધમકી ન આપવા અને રડવા ન બેસવાની ચેતવણી આપતા દેખાયા હતા, જેના જવાબમાં ટીએમસી નેતા જહાંગીર ખાને વટથી કહ્યું હતું કે, "જો તમે સિંઘમ છો, તો હું પુષ્પા છું... ક્યારેય નમશે નહીં!"

ડાયમંડ હાર્બરમાં ૧૦ વર્ષથી લોકશાહીની હત્યા થઈ: સુવેન્દુ અધિકારી

મુખ્યમંત્રી સુવેન્દુ અધિકારીએ જનમેદનીને સંબોધતા ગંભીર આક્ષેપ કર્યો હતો કે, જ્યારથી બંગાળના રાજકારણમાં 'ભૈપો' (અભિષેક બેનર્જી) નો પ્રભાવ વધ્યો છે, ત્યારથી ડાયમંડ હાર્બરના સામાન્ય નાગરિકો છેલ્લા ૧૦ વર્ષથી પોતાના મતાધિકારનો મુક્તપણે ઉપયોગ પણ કરી શક્યા નથી. ફાલ્ટામાં થનારું આ પુનઃમતદાન લોકશાહીના અધિકારોને પુનઃસ્થાપિત કરશે. તેમણે વડાપ્રધાન નરેન્દ્ર મોદી અને ગૃહમંત્રી અમિત શાહ દ્વારા બંગાળની જનતાને અપાયેલા તમામ વચનો અને ખાસ વિકાસ પેકેજ આપવાની ખાતરી આપી હતી, સાથે જ ભાજપના કાર્યકરો પર અત્યાચાર કરનારા ટીએમસીના ગુનેગારો સામે જૂની એફઆઈઆર (FIR) ખોલીને કડક કાનૂની પગલાં ભરવા પોલીસને આદેશ આપ્યા હતા.

સૌથી મોટો સસ્પેન્સ: ટીએમસીના સીટિંગ MLA ફૂલોનો ગુલદસ્તો લઈને સીએમની લાઈનમાં ઉભા રહ્યા!

આ હાઈ-પ્રોફાઈલ મુલાકાત દરમિયાન બંગાળના રાજકારણને હચમચાવી દેનારી સૌથી મોટી ઘટના ત્યારે બની જ્યારે ડાયમંડ હાર્બર બેઠકના ટીએમસીના બે વખતના સીટિંગ ધારાસભ્ય પન્નાલાલ હલદર વહીવટી બેઠક સ્થળની બહાર હાથમાં મોટો ગુલદસ્તો લઈને મુખ્યમંત્રી સુવેન્દુ અધિકારીના સ્વાગત માટે કલાકો સુધી રાહ જોતા ઊભેલા જોવા મળ્યા હતા. જો કે, લાંબી મિટિંગના કારણે સીએમ સાથે તેમની સીધી મુલાકાત થઈ શકી ન હતી, પરંતુ મીડિયાના કેમેરા સામે ધારાસભ્ય હલદરે જાહેરમાં સ્વીકાર્યું હતું કે, ખુદ મુખ્યમંત્રી સુવેન્દુ અધિકારીએ તેમને ત્યાં રોકાવા માટે કહ્યું હતું. રાજકીય પંડિતો આ ઘટનાને તૃણમૂલ કોંગ્રેસમાં બહુ મોટા ભંગાણ અને ધારાસભ્ય પન્નાલાલ ટૂંક સમયમાં જ ભાજપમાં જોડાશે તેવા મજબૂત સંકેત તરીકે જોઈ રહ્યા છે.