નવી દિલ્હી : રક્ષા અધિકારીઓએ બુધવારે જણાવ્યું હતું કે સર્જન વાઇસ એડમિરલ દિલીપ રાઘવને ડિરેક્ટર જનરલ હોસ્પિટલ સર્વિસિસ (આર્મ્ડ ફોર્સિસ) એટલે કે સશસ્ત્ર દળોની તબીબી સેવાઓના મહાનિર્દેશક તરીકેનો પદભાર સંભાળી લીધો છે. તેમની આ નિમણૂકથી સશસ્ત્ર દળોમાં આરોગ્ય અને તબીબી વ્યવસ્થા વધુ મજબૂત બનશે.

દિલીપ રાઘવને વર્ષ 1985માં પૂણે સ્થિત પ્રતિષ્ઠિત આર્મ્ડ ફોર્સિસ મેડિકલ કોલેજ (એએફએમસી) માં પ્રવેશ મેળવ્યો હતો અને 1989માં તેમનો એમબીબીએસ અભ્યાસ પૂર્ણ કર્યો હતો. ડિસેમ્બર 1989માં તેઓ ભારતીય નૌકાદળમાં કમિશન્ડ થયા હતા. અધિકારીઓના જણાવ્યા અનુસાર, તેમની કારકિર્દી દરમિયાન તેમણે આઈએનએસ જમુના પર કમિશનિંગ મેડિકલ ઓફિસર અને આઈએનએસ માંડોવીમાં મેડિકલ ઓફિસર સહિતની અનેક મહત્વપૂર્ણ તબીબી અને શૈક્ષણિક જવાબદારીઓ સંભાળી છે.

દિલીપ રાઘવને વર્ષ 1998માં એએફએમસી પૂણેમાંથી ઈએનટીમાં એમએસ પૂર્ણ કર્યું અને ત્યારબાદ ચેન્નાઈની મદ્રાસ ઈએનટી રિસર્ચ ફાઉન્ડેશનમાંથી ઈએનટી માઈક્રોસર્જરી અને કોક્લિયર ઈમ્પ્લાન્ટ સર્જરીમાં બે વર્ષની ફેલોશિપ મેળવી હતી. તેમણે આઈએનએચએસ અશ્વિની અને એએફએમસી પૂણેમાં વિશેષજ્ઞ અને શૈક્ષણિક પદો પર સેવાઓ આપી હતી તથા એએફએમસી પૂણે ખાતે બાયોનિક ઈયર સેન્ટરની સ્થાપનામાં મુખ્ય ભૂમિકા ભજવી હતી.

તેમણે 2018 થી 2021 સુધી એએફએમસી પૂણેમાં ઈએનટી વિભાગના પ્રોફેસર અને વડા તરીકે સેવાઓ આપી હતી. આ ઉપરાંત તેમણે સદર્ન નેવલ કમાન્ડના કમાન્ડ મેડિકલ ઓફિસર અને મુંબઈ સ્થિત આઈએનએચએસ અશ્વિનીના કમાન્ડિંગ ઓફિસર તરીકેની મહત્વની જવાબદારીઓ પણ નિભાવી હતી. તેમના કમાન્ડિંગ ઓફિસર તરીકેના કાર્યકાળ દરમિયાન આઈએનએચએસ અશ્વિનીને સર્વશ્રેષ્ઠ કમાન્ડ હોસ્પિટલ માટે રક્ષા મંત્રી ટ્રોફી એનાયત કરવામાં આવી હતી.