<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 19th November 2026

વૃંદાવનમાં ૪૫૪ વૃક્ષો કાપવાના કેસમાં સુપ્રીમ કોર્ટનો કડક આદેશ : ૯.૪૬ હેક્ટર જમીન જંગલ જાહેર કરવી પડશે

રૂ. ૪.૫૪ કરોડના દંડ ઉપરાંત પાંચ સેવાભાવી સંસ્થાઓને રૂ. ૫૦ લાખ આપવાની શરત : આઠ અઠવાડિયાની સમયમર્યાદા

નવી દિલ્હી: મથુરા–વૃંદાવનના દાલમિયા ફાર્મ્સ વિસ્તારમાં ગેરકાયદેસર રીતે ૪૫૪ વૃક્ષો કાપવાના કેસમાં સુપ્રીમ કોર્ટે મહત્વપૂર્ણ આદેશ આપ્યો છે. વળતરરૂપે વૃક્ષારોપણ માટે રાજ્ય સરકારને સોંપાયેલી ૯.૪૬ હેક્ટર જમીનને આઠ અઠવાડિયામાં સત્તાવાર રીતે જંગલ જાહેર કરવાનો આદેશ અપાયો છે. અદાલતે જવાબદાર વેપારીને વધુ રૂ. ૫૦ લાખ સેવાભાવી સંસ્થાઓને આપવાની શરત પણ મૂકી છે.

 

સપ્ટેમ્બર ૨૦૨૪માં વૃંદાવનના દાલમિયા ફાર્મ્સ વિસ્તારમાં રિયલ એસ્ટેટ કોલોની વિકસાવવા માટે જેસીબી મશીનો દ્વારા રાતોરાત ૪૫૪ વૃક્ષો કાપવામાં આવ્યાં હતાં. તેમાં ૩૨ વૃક્ષો સંરક્ષિત વનવિસ્તારની રસ્તાકિનારાની જમીન ઉપર હતાં.

 

આ વિસ્તાર પર્યાવરણની દૃષ્ટિએ સંવેદનશીલ તાજ ટ્રેપેઝિયમ ઝોનમાં આવે છે, જ્યાં વૃક્ષો અને પર્યાવરણનું વિશેષ સંરક્ષણ જરૂરી છે.

 

સુપ્રીમ કોર્ટે માર્ચ ૨૦૨૫માં જવાબદાર શંકર અગ્રવાલ ઉર્ફે શિવશંકર અગ્રવાલ ઉપર દરેક વૃક્ષદીઠ રૂ. એક લાખ લેખે કુલ રૂ. ૪.૫૪ કરોડનો દંડ લાદ્યો હતો.

 

વેપારી તરફથી વરિષ્ઠ વકીલ મુકુલ રોહતગીએ અદાલતને જણાવ્યું કે તેમના અસીલે રૂ. બે કરોડ ખર્ચીને ૯.૪૬ હેક્ટર જમીન ખરીદી રાજ્ય સરકારને વળતરરૂપે વૃક્ષારોપણ માટે સોંપી દીધી છે. ઉપરાંત છોડ ઉછેરવા અને તેમની દેખરેખ માટે આશરે રૂ. ૫૦ લાખનો ખર્ચ પણ કરાયો છે. અગ્રવાલને લગભગ એક મહિનો જેલમાં રહેવું પડ્યું હોવાનું પણ રજૂ કરાયું હતું.

 

મુખ્ય ન્યાયાધીશ સૂર્યકાંતની અધ્યક્ષતાવાળી ખંડપીઠે સ્પષ્ટ કર્યું કે સોંપાયેલી જમીનને સત્તાવાર વનવિસ્તાર જાહેર કરવામાં આવે. અદાલતની કેન્દ્રીય સશક્ત સમિતિ આ જમીનનું નિરીક્ષણ કરીને વૃક્ષારોપણ અંગે પાલન અહેવાલ આપશે.

 

અદાલતે અગાઉ જમા કરાયેલા રૂ. ૪.૫૪ કરોડનો ઉપયોગ મથુરા–વૃંદાવનમાં વૃક્ષારોપણ માટે કરવાનો નિર્દેશ પણ આપ્યો છે.

 

વેપારીએ ચાર અઠવાડિયામાં વિધવાઓ, નિરાધારો અને બીમાર વ્યક્તિઓના કલ્યાણ માટે કાર્યરત પાંચ સરકારી અથવા સરકારી સહાયપ્રાપ્ત સંસ્થાઓને રૂ. ૧૦ લાખ લેખે કુલ રૂ. ૫૦ લાખ આપવાના રહેશે. આ શરત પૂર્ણ થાય તો તેમની સામેની અદાલતના અવમાનનાની કાર્યવાહી સમાપ્ત કરવામાં આવશે.

 

આ ચુકાદાનો મહત્વનો અર્થ એ છે કે માત્ર દંડ ભરી દેવાથી પર્યાવરણને થયેલું નુકસાન પૂરું થયું ગણાશે નહીં. વળતરરૂપે ફાળવેલી જમીનનું વન તરીકે કાનૂની રક્ષણ અને વૃક્ષારોપણની દેખરેખ પણ જરૂરી રહેશે. 

(11:33 PM IST)