નવી દિલ્હી, તા.૨૨: વીમા દાવાઓ અને કંપનીઓ વચ્ચેના વિવાદોમાં સુપ્રીમ કોર્ટે એક મોટો અને કડક નિર્ણય સંભળાવ્યો છે. દેશની સર્વોચ્ચ અદાલતે નેશનલ કન્ઝ્યુમર ડિસ્પ્યુટ્સ રિડ્રેસલ કમિશન (NCDRC) ના એ આદેશને રદ કરી દીધો છે જેમાં ન્યૂ ઈન્ડિયા એશ્યોરન્સ કંપની લિમિટેડને રૂ. ૨.૪ કરોડનો અગ્નિ વીમા દાવો ચૂકવવાનો હુકમ કરવામાં આવ્યો હતો. સુપ્રીમ કોર્ટે સ્પષ્ટ શબ્દોમાં જણાવ્યું છે કે વીમા કંપની દ્વારા આ દાવો નકારવાનો નિર્ણય સંપૂર્ણપણે વ્યાજબી અને ન્યાયસંગત હતો, કારણ કે આ કોઈ સામાન્ય અકસ્માત ન હતો પરંતુ આગ પાછળનું સત્ય કંઈક અલગ જ હતું.

જસ્ટિસ સંજય કુમાર અને જસ્ટિસ સંજીવ સચદેવાની બેન્ચે વીમા કંપનીની અપીલને ગ્રાહ્ય રાખતા આ મહત્વપૂર્ણ ચુકાદો આપ્યો છે. અદાલતે અવલોકન કર્યું હતું કે વીમાધારકે પોતાના દાવાને પાસ કરાવવા માટે સંબંધિત સત્તાવાળાઓ સમક્ષ ખોટી અને ભ્રામક માહિતી રજૂ કરી હતી, જે વીમા પોલિસીની મૂળભૂત શરતો અને નિયમોનું સીધું ઉલ્લંઘન છે. કાયદાકીય તપાસમાં એ સ્પષ્ટ થયા બાદ કે આગ સંજોગોવશાત્ નહીં પરંતુ જાણી જોઈને લગાવવામાં આવી હતી અને દાવામાં વિસંગતતાઓ હતી, કોર્ટે વીમા કંપનીના નિર્ણયને માન્ય રાખ્યો છે.

ખોટી માહિતી આપવી વીમા પોલિસીની શરતોનું ઉલ્લંઘન

કોર્ટની બેન્ચે ચુકાદામાં નોંધ્યું હતું કે વીમા કરાર વિશ્વાસના પાયા પર ચાલે છે, અને જો કોઈ ગ્રાહક કે વીમાધારક ખોટા દસ્તાવેજો કે ખોટી માહિતી રજૂ કરીને ક્લેમ મેળવવાનો પ્રયાસ કરે, તો તે કાનૂની રીતે અસ્વીકાર્ય છે. આ ચુકાદાથી એવા તમામ લોકો માટે કડક સંદેશ ગયો છે જેઓ વીમાના નામે ખોટા દાવાઓ રજૂ કરે છે. સુપ્રીમ કોર્ટના આ સીમાચિહ્નરૂપ નિર્ણયથી ન્યૂ ઈન્ડિયા એશ્યોરન્સ કંપનીને મોટી રાહત મળી છે અને વીમા ક્ષેત્રે પારદર્શિતા જાળવવા પર વધુ ભાર મૂકવામાં આવ્યો છે.