.
નવી દિલ્હી | તા.31: રશિયા અને યુક્રેન વચ્ચે ચાલી રહેલા ભીષણ યુદ્ધમાં છેતરપિંડીનો ભોગ બનીને પહોંચેલા અને ત્યાં લડતા લડતા મૃત્યુ પામેલા, ગુમ થયેલા કે ગંભીર રીતે ઘાયલ થયેલા ભારતીય નાગરિકોના પરિવારોની વેદનાને ધ્યાનમાં રાખીને સુપ્રીમ કોર્ટે એક અત્યંત મહત્વપૂર્ણ હુકમ કર્યો છે. મુખ્ય ન્યાયાધીશ સૂર્યકાંત તેમજ ન્યાયાધીશ જોયમલ્યા બાગચી અને વી મોહનાની બનેલી વિશેષ બેન્ચે કેન્દ્ર સરકારને સ્પષ્ટ નિર્દેશ આપ્યો છે કે વિદેશ મંત્રાલય (MEA) માં તાત્કાલિક ધોરણે એક સમર્પિત નોડલ અધિકારીની નિમણૂક કરવામાં આવે. આ અધિકારી અસરગ્રસ્ત પરિવારો સાથે સતત સંકલન સાધીને તેમની તમામ મુશ્કેલીઓનું નિરાકરણ લાવશે. 
અદાલતે સુનાવણી દરમિયાન જણાવ્યું હતું કે વિદેશ મંત્રાલયે માત્ર પત્રવ્યવહાર પૂરતું મર્યાદિત ન રહેતા, મૃત્યુ પામેલા નાગરિકોના મૃતદેહોને પરત લાવવા માટે તેમના પરિવારજનોના ડીએનએ (DNA) મેચિંગની પ્રક્રિયાને ઝડપી અને સરળ બનાવવાની રહેશે. આ ઉપરાંત, રશિયન દૂતાવાસ સમક્ષ પીડિત પરિવારો દ્વારા વળતર મેળવવા માટેના દાવાઓ દાખલ કરવામાં પણ વિદેશ મંત્રાલયે સક્રિય સહકાર આપવો પડશે. પરિવારોને તમામ જરૂરી માહિતી અને લેટેસ્ટ અપડેટ્સ તેમની પોતાની સ્થાનિક ભાષામાં ઉપલબ્ધ કરાવવા માટે પણ આદેશ આપવામાં આવ્યો છે, જેથી ભાષાની અડચણને કારણે કોઈ પરિવાર અંધારામાં ન રહે. 
મહત્વપૂર્ણ નિર્દેશ: રાષ્ટ્રીય કાનૂની સેવા સત્તામંડળ (NALSA) અને સંબંધિત રાજ્ય કાનૂની સેવાઓને પણ આદેશ આપવામાં આવ્યો છે કે તેઓ પીડિત પરિવારોને કાનૂની સહાય પૂરી પાડે, જેથી તેઓ તેમના સ્વજનોના પાર્થિવ દેહને સુરક્ષિત મેળવી શકે અને વળતરના દાવાઓને મજબૂતાઈથી આગળ ધપાવી શકે. 
ઉલ્લેખનીય છે કે, લાલચુ અને ઠગ ટ્રાવેલ એજન્ટો દ્વારા રોજગારી કે અન્ય બહાને છેતરાયા બાદ અનેક નિર્દોષ ભારતીયો આ ખતરનાક યુદ્ધના મોરચે ધકેલી દેવાયા હતા, જ્યાં તેમણે પોતાના પ્રાણ ગુમાવ્યા છે કે પછી તેઓ લાપતા છે. આવા પીડિત પરિવારજનો દ્વારા દાખલ કરવામાં આવેલી અરજી પર સુનાવણી કરતા કોર્ટે આ કડક અને માનવતાવાદી પગલાં ભરવાનો આદેશ આપ્યો છે, જેથી શોકમગ્ન પરિવારજનોને સરકારી તંત્ર તરફથી પૂરતો સહારો મળી શકે.