નવી દિલ્હી : દિલ્હીમાં વિશેષ સઘન પુનરાવર્તન (SIR) અભિયાન અંતર્ગત મતદાર યાદીમાંથી મોટા પ્રમાણમાં નામ કમી કરવા સામે દાખલ કરવામાં આવેલી અરજી પર સુપ્રીમ કોર્ટે મહત્વપૂર્ણ સુનાવણી હાથ ધરી છે. સર્વોચ્ચ અદાલતે ચૂંટણી પંચ ઓફ ઇન્ડિયા (ECI) ને સ્પષ્ટપણે જણાવ્યું છે કે પંચ ફોર્મ ૬, ૭ અને ૮ માં કોઈ ફેરફાર કરી શકે નહીં અને ફોર્મ સબમિટ કરવા માટે કોઈ કટ-ઓફ તારીખનો કડક આગ્રહ ન રાખતા સતત ફોર્મ સ્વીકારવાનું ચાલુ રાખવું જોઈએ.

મુખ્ય ન્યાયાધીશ સૂર્ય કાંત, ન્યાયાધીશ જોગમાલ્ય બાગચી અને ન્યાયાધીશ વી. મોહનાની બેંચ સમક્ષ આ કેસની સુનાવણી હાથ ધરવામાં આવી હતી. સુનાવણી દરમિયાન અરજદારો તરફથી એડવોકેટ પ્રશાંત ભૂષણ અને ચૂંટણી પંચ તરફથી સિનિયર એડવોકેટ ડી. એસ. નાયડુ હાજર રહ્યા હતા. અદાલતે નોંધ્યું હતું કે 'લોજિકલ ડિસ્ક્રિપ્સી' (તાર્કિક વિસંગતતા) કેટેગરીની કાયદેસરતા અને વ્યાપક ઉપયોગ અંગે પાછળથી વધુ વિગતવાર પરીક્ષણ કરવામાં આવશે, અને બિહાર કે બંગાળના અગાઉના વચગાળાના આદેશો આ ચોક્કસ મુદ્દે કોઈ બંધનકર્તા પૂર્વજ્રુષ્ટા (પ્રિસિડેન્ટ) નથી.

કોર્ટે ટિપ્પણી કરી હતી કે દિલ્હી જેવા મહાનગરોમાં મજૂરો, દૈનિક વેતન મેળવનારા અને ફેરીયાઓ રોજગારી અર્થે સતત સ્થળાંતર કરતા હોય છે, તેથી આવા કિસ્સાઓમાં જવાબ માત્ર નાગરિકો પર જ ન નાખવો જોઈએ. અદાલતે સૂચન કર્યું હતું કે જે ૪૩ લાખ મતદારો કાયમી ધોરણે સ્થળાંતરિત કે ગેરહાજર દર્શાવવામાં આવ્યા છે, તેમના અંતરાલને ઘટાડવા માટે પંચે સ્થાનિક બૂથ પર યાદીઓ પ્રસિદ્ધ કરવી જોઈએ જેથી નાગરિકો તેમના નજીકના બૂથ લેવલ ઓફિસર (BLO) નો સંપર્ક કરી શકે.

ન્યાયાધીશ બાગચીએ અવલોકન કર્યું હતું કે ફોર્મ ૬ માં એવું ઘોષણાપત્ર માંગવામાં આવે છે કે અરજદારનું નામ ક્યારેય યાદીમાં નહોતું, જે ભૂલભરેલું છે. વૈધાનિક ફોર્મ ૬, ૭ અને ૮ માં ચૂંટણી પંચ દ્વારા ફેરફાર કરી શકાતા નથી. કોર્ટે પંચને નિર્દેશ આપ્યો છે કે જ્યાં સુધી પ્રક્રિયા ચાલી રહી છે ત્યાં સુધી ફોર્મ ૬ કે ફોર્મ ૮ ભરવા પર કોઈ સમયમર્યાદા ન મૂકવી અને વેબસાઈટ તેમજ અખબારોમાં જાહેર નોટિસ આપીને નાગરિકો ગમે ત્યારે ફોર્મ સબમિટ કરી શકે તેવી વ્યવસ્થા સુનિશ્ચિત કરવી. આ મામલાની વધુ સુનાવણી બે અઠવાડિયા બાદ મુલતવી રાખવામાં આવી છે.