નવી દિલ્હી, તા.૨૮: પશ્ચિમ બંગાળના રાજકારણમાં પક્ષપલટાના વિવાદ વચ્ચે દેશની સર્વોચ્ચ અદાલતે એક અત્યંત મહત્વપૂર્ણ અવલોકન કર્યું છે. સુપ્રીમ કોર્ટે આશા વ્યક્ત કરી છે કે પશ્ચિમ બંગાળ વિધાનસભાના સ્પીકર પક્ષપલટા વિરોધી કાયદા હેઠળ ૧૦ ધારાસભ્યો સામે દાખલ કરવામાં આવેલી ગેરલાયકાતની અરજીઓ પર આગામી ૮ ઓક્ટોબર સુધીમાં યોગ્ય અને ન્યાયિક નિર્ણય લેશે. અદાલતે આ અંગે સ્પષ્ટતા કરતા જણાવ્યું હતું કે લોકશાહી પ્રક્રિયામાં આવા સંવેદનશીલ કેસોનો નિકાલ નિર્ધારિત સમયમર્યાદામાં થવો અનિવાર્ય છે.

ભારતના મુખ્ય ન્યાયાધીશ સૂર્યકાંત, ન્યાયાધીશ જોયમલ્યા બાગચી અને ન્યાયાધીશ વી. મોહનાની બનેલી પીઠે તૃણમૂલ કોંગ્રેસના ધારાસભ્ય સોહંદેબ ચટ્ટોપાધ્યાય દ્વારા દાખલ કરવામાં આવેલી રિટ અરજીનો આખરી નિકાલ કરતી વખતે આ આદેશ આપ્યો હતો. અરજીમાં માંગ કરવામાં આવી હતી કે સ્પીકર સમક્ષ પેન્ડિંગ ગેરલાયકાતના કેસોનો ઝડપી ઉકેલ લાવવામાં આવે. સુપ્રીમ કોર્ટે મણિપુર વિધાનસભાના સ્પીકર કેશમ મેઘચંદ્ર સિંહ કેસના પોતાના ઐતિહાસિક ચુકાદાનો ઉલ્લેખ કરતાં યાદ અપાવ્યું હતું કે, ગેરલાયકાતની અરજીઓ પર સામાન્ય રીતે ત્રણ મહિનાના વાજબી સમયગાળામાં વિધિવત નિર્ણય લેવાવો જોઈએ.

આ કેસમાં ૮ જુલાઈના રોજ ગેરલાયકાતની અરજીઓ દાખલ કરવામાં આવી હતી, જેનો ત્રણ મહિનાનો સમયગાળો ૮ ઓક્ટોબરના રોજ પૂર્ણ થઈ રહ્યો છે. ખંડપીઠે નોંધ્યું કે, "અમારી પાસે એવું માનવાને પૂરતું કારણ છે કે રાજ્ય વિધાનસભાના સ્પીકર આ કોર્ટ દ્વારા નિર્ધારિત સિદ્ધાંતોથી સંપૂર્ણપણે વાકેફ છે અને તેઓ સમયમર્યાદામાં યોગ્ય આદેશ જારી કરવાનો પૂરતો પ્રયાસ કરશે." આ કેસમાં ઋતબ્રત બેનર્જી, અરૂપ રોય, ફિરાદ હકીમ અને સબીના યેસ્મીન સહિતના ૧૦ અગ્રણી ધારાસભ્યોનું ભવિષ્ય દાવ પર લાગેલું છે.

અન્ય એક સુનાવણી દરમિયાન પણ સુપ્રીમ કોર્ટે બળવાખોર સાંસદોના કેસમાં નિર્ણય લેવામાં થઈ રહેલા વિલંબ અંગે "રેડ ફ્લેગ" (ચેતવણી) દર્શાવતા સ્પીકરની ભૂમિકા સામે ગંભીર પ્રશ્નો ઉઠાવ્યા હતા. સુપ્રીમ કોર્ટે ભારપૂર્વક જણાવ્યું હતું કે, દેશની લોકશાહી પ્રક્રિયા અને રાજકીય સ્થિરતા પર આવી કાર્યવાહીની મોટી અસર પડે છે, જેથી સમયસર નિર્ણય લેવો સ્પીકરની બંધારણીય ફરજ બની રહે છે.