કોઝીકોડ : કેરળના થિરુવંબડીમાં ૧૯૯૦માં બંદૂકની અણીએ KSRTC બસના કંડક્ટરને લૂંટનારા ૭૧ વર્ષીય વી.કે. જોસની ૩૬ વર્ષ બાદ મૈસુરુથી ધરપકડ કરવામાં આવી છે. આ આરોપી છેલ્લા ત્રણ દાયકાથી મૈસુરુમાં 'શિવકુમાર' નામે નવી ઓળખ ધારણ કરીને પરિવાર સાથે રહેતો હતો. ૮ જુલાઈના રોજ ઘરેલુ વિવાદને પગલે મૈસુરુ પોલીસે તેના ઘરે તપાસ કરી ત્યારે પલંગ નીચેથી બંદૂક અને શંકાસ્પદ દસ્તાવેજો મળી આવ્યા હતા, જેના આધારે પૂછપરછ કરતા વર્ષો જૂના લૂંટના કેસ પરથી પડદો ઉઠી ગયો હતો.

ઘટનાની વિગત મુજબ, ૧૯૯૦માં જોસે થિરુવંબડી-કુમ્બારા રૂટ પર દોડતી બસમાં કંડક્ટર પર બંદૂક તાકીને ટિકિટ કલેક્શનની રોકડ લૂંટી લીધી હતી અને ત્યારબાદ તે ફરાર થઈ ગયો હતો. કોર્ટે તેની ધરપકડ માટે વોરંટ પણ જારી કર્યું હતું, પરંતુ આરોપી પોલીસને ચકમો આપવામાં સફળ રહ્યો હતો. તે મૈસુરુ પહોંચી ગયો, ત્યાં લગ્ન કર્યા અને પોતાનું નવું જીવન શરૂ કર્યું હતું. જોકે, તાજેતરના ઘરેલુ ઝઘડાએ તેની વર્ષોની છૂપાવાની રમતનો અંત લાવી દીધો હતો.

મૈસુરુ પોલીસે જપ્ત કરેલા હથિયાર અને દસ્તાવેજો વિશે વધુ તપાસ કરતા તે કેરળમાં વોન્ટેડ હોવાનું સામે આવ્યું હતું. મૈસુરુ પોલીસે તરત જ કેરળ પોલીસ સાથે માહિતી શેર કરી, ત્યારબાદ તિરુવંબડી પોલીસની એક ટીમ મૈસુરુ પહોંચી અને આરોપીની ધરપકડ કરી. આરોપી જોસને હવે તિરુવંબડી લાવી ન્યાયિક કસ્ટડીમાં મોકલી દેવામાં આવ્યો છે અને કાયદાકીય પ્રક્રિયા હાથ ધરવામાં આવી છે.

૩૬ વર્ષ સુધી કાયદાની આંખમાં ધૂળ નાખીને ભાગતા ફરતા આ ગુનેગારની ધરપકડ એ પોલીસની સતર્કતાનું મોટું ઉદાહરણ છે. આ મામલામાં હવે પોલીસે આરોપીના ભૂતકાળના તમામ પાસાઓની તપાસ શરૂ કરી છે, જેમાં લૂંટના તે સમયના કેસની વિગતો અને આટલા વર્ષો દરમિયાન તેણે ક્યાંય અન્ય ગુના કર્યા છે કે કેમ તેની તપાસ થશે. લાંબી કાયદાકીય લડાઈ બાદ હવે આરોપીને તેના કુકર્મની સજા ભોગવવી પડશે.