નવી દિલ્હી: દિલ્હીમાં સ્પેશિયલ ઇન્ટેન્સિવ રિવિઝન પ્રક્રિયા હેઠળ મતદારોને મોકલવામાં આવી રહેલી નોટિસો સામે સુપ્રીમ કોર્ટે અત્યંત કડક વલણ અપનાવ્યું છે. ચૂંટણી પ્રક્રિયાની પારદર્શિતા પર ગંભીર સવાલો ઉઠાવતા સર્વોચ્ચ અદાલતે ભારતના ચૂંટણી પંચને નોટિસ જારી કરીને તાત્કાલિક વિગતવાર સ્પષ્ટતા રજૂ કરવાનો આદેશ આપ્યો છે. ચીફ જસ્ટિસ સૂર્યકાંતની આગેવાની હેઠળની બેન્ચે અવલોકન કર્યું હતું કે, મતદારોને પાઠવવામાં આવેલી કેટલીક નોટિસો સંપૂર્ણપણે 'મશીન-જનરેટેડ' લાગે છે, જે પ્રક્રિયામાં ગંભીર ખામીઓ અને યાંત્રિક ભૂલો દર્શાવે છે.

સુપ્રીમ કોર્ટે સ્પષ્ટ શબ્દોમાં જણાવ્યું છે કે લોકશાહી પ્રક્રિયામાં નિષ્પક્ષતા જાળવવા માટે નોટિસો જારી કરવાની આખી પ્રક્રિયાની ઊંડાણપૂર્વક અને સ્વતંત્ર તપાસ થવી અનિવાર્ય છે. કોર્ટે ભારપૂર્વક કહ્યું કે, નોટિસ જારી કરવામાં સંપૂર્ણ પારદર્શિતા હોવી જોઈએ જેથી સામાન્ય નાગરિકોના બંધારણીય મતાધિકાર પર કોઈ ત્રાપ ન વાગે.

બીજી તરફ, સુનાવણી દરમિયાન ચૂંટણી પંચે કોર્ટને ખાતરી આપી હતી કે માત્ર નોટિસ મળવા માત્રથી જ કોઈ પણ મતદારનું નામ મતદાર યાદીમાંથી આપમેળે કમી (ડિલીટ) થશે નહીં. પંચે વધુમાં જણાવ્યું હતું કે જે મતદારોને નોટિસો મોકલવામાં આવી છે તેમની સંપૂર્ણ યાદી તથા નોટિસ આપવાના ચોક્કસ કારણો અગાઉથી જ સાર્વજનિક કરી દેવામાં આવ્યા છે.

ચૂંટણી પંચ પોતાનો સત્તાવાર અને વિગતવાર પ્રતિભાવ દાખલ કરશે તે પછી સુપ્રીમ કોર્ટ આ કેસની આગામી સુનાવણી હાથ ધરશે, જેમાં કાનૂની પાસાઓની સંપૂર્ણ અને આખરી ચકાસણી કરવામાં આવશે.