નવી દિલ્હી: આંતરરાષ્ટ્રીય સ્તરે ડાર્ક વેબ (Dark Web) ના માધ્યમથી ડ્રગ્સની હેરાફેરી કરવાના અને ક્રિપ્ટોકરન્સી દ્વારા કરોડો રૂપિયાના મની લોન્ડરિંગ કરવાના ગંભીર કેસમાં સુપ્રીમ કોર્ટે આજે મોટો ચુકાદો આપ્યો છે. સર્વોચ્ચ અદાલતે ઉત્તરાખંડ હાઇકોર્ટના નિર્ણયને ગ્રાહ્ય રાખતા મુખ્ય આરોપી બનમીત સિંહને જામીન આપવાનો સ્પષ્ટ ઇનકાર કરી દીધો છે. જો કે, દેશની સર્વોચ્ચ અદાલતે આરોપીને ભવિષ્ય માટે એક નાનકડી રાહત આપતા ઉમેર્યું છે કે, જો આ કેસની ટ્રાયલ (અદાલતી કાર્યવાહી) માં કોઈ એવા કારણોસર વિલંબ થાય જે આરોપીને આભારી ન હોય, તો તે ભવિષ્યમાં ફરીથી જામીન માટે નવી અરજી કરી શકશે.

જસ્ટિસ એમ. એમ. સુંદરેશ અને જસ્ટિસ નોંગમીકપમ કોટીશ્વર સિંહની બનેલી હાઈ-લેવલ બેન્ચે ઉત્તરાખંડ હાઇકોર્ટના ૪ ડિસેમ્બર, ૨૦૨૫ ના આદેશને પડકારતી બનમીત સિંહની જામીન અરજીને સંપૂર્ણપણે ફગાવી દીધી હતી. હાઈકોર્ટે અગાઉ સિંહની બીજી જામીન અરજી એ ગ્રાઉન્ડ પર ફગાવી હતી કે જાન્યુઆરી ૨૦૨૫ માં તેની પ્રથમ જામીન અરજી રદ થયા બાદ કેસની પરિસ્થિતિમાં કોઈ નોંધપાત્ર સાનુકૂળ ફેરફાર થયો નથી.

શું છે આખું ઇન્ટરનેશનલ ડ્રગ નેટવર્ક?

કેન્દ્રીય તપાસ એજન્સી એન્ફોર્સમેન્ટ ડિરેક્ટોરેટ (ED) ના સનસનાટીભર્યા આરોપ મુજબ, બનમીત સિંહ અને તેનો ભાઈ પરવિંદર સિંહ મળીને "સિંહ ડીટીઓ" (Singh DTO) નામનું એક અત્યંત સંગઠિત અને ખતરનાક આંતરરાષ્ટ્રીય ડ્રગ ટ્રાફિકિંગ નેટવર્ક ચલાવતા હતા. આ બંને ભાઈઓ સામાન્ય ઈન્ટરનેટથી દૂર ડાર્ક વેબ માર્કેટપ્લેસ પર "લિસ્ટન" (Liston) અને "લિસ્ટોનિશેર" (Listonisher) જેવા ગુપ્ત કોડ નેમનો ઉપયોગ કરીને વિદેશોમાં માદક દ્રવ્યો અને પ્રતિબંધિત ડ્રગ્સ વેચતા હતા. આ કાળા કારોબારના કરોડો રૂપિયા તેઓ ડિજિટલ કરન્સી એટલે કે ક્રિપ્ટોકરન્સી વોલેટ્સ અને વિદેશી રેમિટન્સ દ્વારા વ્હાઇટ (લોન્ડર) કરતા હતા.

બ્રિટનમાં ધરપકડ અને અમેરિકા સાથે દલીલ કરાર

આંતરરાષ્ટ્રીય સ્તરે ફેલાયેલા આ નેટવર્કની ગંભીરતાને જોતા અમેરિકા (US) ની ગુપ્તચર એજન્સીઓની ખાસ વિનંતી પર એપ્રિલ ૨૦૧૯ માં યુનાઇટેડ કિંગડમ (UK) માં બનમીત સિંહની ધરપકડ કરવામાં આવી હતી. ત્યારબાદ આ કેસમાં કાયદાકીય સકંજો કસાતા, બનમીત સિંહે ૫ જાન્યુઆરી, ૨૦૨૪ ના રોજ યુએસ સત્તાવાળાઓ સાથે સત્તાવાર રીતે એક દલીલ કરાર (Plea Agreement) પણ કર્યો હતો.

આરોપી પોતે જ ટ્રાયલમાં અવરોધ ઊભો કરતો હોવાનો EDનો આક્ષેપ:

સુપ્રીમ કોર્ટમાં સુનાવણી દરમિયાન આરોપી બનમીત સિંહ તરફથી દેશના દિગ્ગજ વકીલો સિદ્ધાર્થ લુથરા અને સિદ્ધાર્થ દવે હાજર રહ્યા હતા. તેમણે દલીલ કરી હતી કે આ તપાસ અન્યાયી છે અને ટ્રાયલ ટૂંક સમયમાં પૂર્ણ થવાની કોઈ શક્યતા નથી. જો કે, ઈડી તરફથી હાજર રહેલા એએસજી અનિલ કૌશિક અને ઝોહેબ હુસૈને આ જામીનનો સખત વિરોધ કરતા અદાલતનું ધ્યાન દોર્યું હતું કે, ટ્રાયલ કોર્ટના રેકોર્ડ મુજબ આરોપી પોતે જ બિનજરૂરી અરજીઓ દાખલ કરીને જાણીજોઈને ન્યાયિક કાર્યવાહીમાં અવરોધો અને વિલંબ ઊભો કરી રહ્યો છે. આ આકરી દલીલોને ગ્રાહ્ય રાખીને સુપ્રીમ કોર્ટે ડ્રગ માફિયાને જેલમાં જ રાખવાનો આદેશ કર્યો છે.