નવી દિલ્હી: તા.14 કોર્પોરેટ વિવાદોમાં 'સેટલમેન્ટ' (સમાધાન) થયા પછી જવાબદારીઓમાંથી છટકી જવાનો પ્રયાસ કરતા પ્રમોટર્સને સુપ્રીમ કોર્ટે કડક પાઠ ભણાવ્યો છે. રોકલેન્ડ હોસ્પિટલ્સ (હવે મેડિયોર હોસ્પિટલ્સ) ના પ્રમોટર્સ પ્રભાત અને ઋષિ શ્રીવાસ્તવને સુપ્રીમ કોર્ટે મોટો આદેશ આપતા જણાવ્યું છે કે, સંમતિ દ્વારા લેવાયેલા આર્બિટ્રલ એવોર્ડની શરતો તાત્કાલિક લાગુ થશે અને તે માટે સુપ્રીમ કોર્ટની અંતિમ પુષ્ટિ સુધી રાહ જોવાની જરૂર નથી.
શું હતો સમગ્ર વિવાદ?
આ વિવાદ વર્ષ 2016 માં શરૂ થયો હતો જ્યારે VPS હેલ્થકેરે રોકલેન્ડ હોસ્પિટલ્સમાં 100% હિસ્સો ખરીદ્યો હતો. વ્યવહાર દરમિયાન એક વ્યાવસાયિક સેવા કરાર હેઠળ 'EY' (Ernst & Young) સાથે વિવાદ થયો હતો. 2019 માં સિંગાપોર ઇન્ટરનેશનલ આર્બિટ્રેશન સેન્ટર ખાતે પક્ષકારો વચ્ચે સમાધાન થયું, જેમાં પ્રમોટર્સે ખાતરી આપી હતી કે 'EY' ના દાવાથી ઉદ્ભવતી કોઈપણ જવાબદારી તેઓ પોતે ભોગવશે અને ખરીદનાર કંપની (VPS/Medeor) ને નુકસાન નહીં થવા દે.
હાઈકોર્ટનો 'વિરોધાભાસી' અભિગમ
ત્યારબાદ 'EY' ના પક્ષમાં ચુકાદો આવતા મેડિયોર હોસ્પિટલે અંદાજે ₹15.86 કરોડ કોર્ટમાં જમા કરાવવા પડ્યા હતા. જ્યારે કંપનીએ આ રકમ પ્રમોટર્સ પાસેથી વસૂલવા હાઈકોર્ટના દ્વાર ખટખટાવ્યા, ત્યારે દિલ્હી હાઈકોર્ટે એવો તર્ક આપ્યો કે જ્યાં સુધી 'અંતિમ અપીલ અદાલત' દ્વારા ચુકાદો પાકો ન થાય ત્યાં સુધી પ્રમોટર્સની જવાબદારી પાકતી નથી.
સુપ્રીમ કોર્ટના જસ્ટિસ એસ.વી.એન. ભટ્ટી અને પ્રસન્ના બી. વરાલેની બેન્ચે હાઈકોર્ટના આ તર્કને "વિરોધાભાસી" ગણાવ્યો હતો. કોર્ટે કહ્યું કે, જો આવું અર્થઘટન કરવામાં આવે તો પ્રમોટર્સ જાણીજોઈને અપીલ ન કરે અને સામે પક્ષે ક્યારેય રકમ મળે જ નહીં, જે સમાધાનના મૂળ હેતુની વિરુદ્ધ છે.
30 દિવસનું અલ્ટિમેટમ
સુપ્રીમ કોર્ટે સ્પષ્ટ કર્યું કે એકવાર જવાબદારી સ્ફટિકીકૃત (Crystalized) થઈ જાય અને કંપનીએ રકમ જમા કરાવી દીધી હોય, પછી પ્રમોટર્સે કરાર મુજબ તરત જ વળતર આપવું પડે. કોર્ટે પ્રમોટર્સને આદેશ આપ્યો છે કે તેઓ આગામી 30 દિવસની અંદર ₹15,86,17,808 ની રકમ ચૂકવે.
આ ચુકાદાથી એ સ્પષ્ટ થઈ ગયું છે કે આર્બિટ્રેશન અને સમાધાન કરારમાં પક્ષકારોએ આપેલી 'ગેરંટી' કે 'બાંયધરી' માત્ર કાગળ પરની વાત નથી, પરંતુ તે તાત્કાલિક અમલી બને તેવી કાયદાકીય જવાબદારી છે.