તિરુવનંતપુરમ: પાંચ રાજ્યોના ચૂંટણી જંગનું ચિત્ર સ્પષ્ટ થયાને છ દિવસ જેટલો સમય વીતી ગયો હોવા છતાં કેરળમાં કોંગ્રેસ શાસનની ધૂરા કોણ સંભાળશે તે પ્રશ્ન હજુ વણઉકેલ્યો રહ્યો છે. પશ્ચિમ બંગાળમાં ભાજપે ગણતરીના દિવસોમાં સરકાર રચી શપથ વિધિ પૂર્ણ કરી દીધી છે, જ્યારે આસામમાં પણ મુખ્યમંત્રીનું નામ લગભગ નક્કી થઈ ગયું છે. તેની સામે કેરળમાં ૧૦૨ બેઠકો સાથે પ્રચંડ બહુમતી મેળવનાર કોંગ્રેસ ગઠબંધન હજુ પણ કોઈ એક નામ પર સર્વસંમતિ સાધી શક્યું નથી. રાજકીય વિશ્લેષકો માની રહ્યા છે કે ૨૦૧૧માં આસામમાં થયેલી જૂથવાદની ભૂલ કોંગ્રેસને ફરી નડી રહી છે, જેના કારણે સત્તા હાથમાં હોવા છતાં વહીવટી તંત્ર અનિશ્ચિતતાના મોજા પર સવાર છે.

મુખ્યમંત્રી પદની આ હાઈપ્રોફાઈલ રેસમાં હાલ કે.સી. વેણુગોપાલ ૪૩ ધારાસભ્યોના સમર્થન સાથે સૌથી આગળ ચાલી રહ્યા હોવાનું મનાય છે. તેમની પાછળ વી.ડી. સતીસન ૩૫ ધારાસભ્યોના પીઠબળ સાથે મજબૂત દાવેદારી નોંધાવી રહ્યા છે, જ્યારે રમેશ ચેન્નીથલા ૨૨ ધારાસભ્યોના ટેકા સાથે ત્રીજા ક્રમે છે. આ સત્તા સંઘર્ષની ગંભીરતાનો અંદાજ એ વાત પરથી લગાવી શકાય છે કે કુદુથુરુથીમાં એક સમર્થકે પોતાના મનપસંદ નેતાને મુખ્યમંત્રી બનાવવા માટે આત્મહત્યાનો પ્રયાસ પણ કર્યો હતો. ધારાસભ્યોના અલગ-અલગ જૂથો પોતાની માંગ પર અડગ હોવાથી પાર્ટી હાઈકમાન્ડ માટે સાંધા ગૂંથવા મુશ્કેલ બની રહ્યા છે.

કોંગ્રેસ નેતૃત્વ અત્યારે એ જ ડરમાં જીવી રહ્યું છે કે જો મુખ્યમંત્રીની પસંદગીમાં વિલંબ થશે અથવા ખોટો નિર્ણય લેવાશે, તો આસામની જેમ અહીં પણ ભાજપને પગપેસારો કરવાની તક મળી શકે છે. આસામમાં ભૂતકાળમાં કોંગ્રેસ આંતરિક કલહને ડામવામાં નિષ્ફળ રહી હતી, જેના પરિણામે પાર્ટી નબળી પડી અને સત્તા ગુમાવવાનો વારો આવ્યો હતો. હવે જ્યારે કેરળની જનતાએ પરિવર્તનનો મત આપ્યો છે, ત્યારે સત્તાનું આ ઉથલપાથલ ભરેલું વાતાવરણ ગઠબંધનની છબીને નુકસાન પહોંચાડી રહ્યું છે. આગામી ૨૪ કલાકમાં જો કોઈ નક્કર નિર્ણય નહીં લેવાય, તો પક્ષમાં ભંગાણના એંધાણ પણ વર્તાઈ રહ્યા છે.