શ્રીનગર : જમ્મુ અને કાશ્મીરના બડગામ જિલ્લાના જંગલ વિસ્તારમાં શુક્રવારે સૈન્ય, પોલીસ અને સીઆરપીએફ દ્વારા ચલાવવામાં આવેલા સંયુક્ત 'ઓપરેશન અશદર' દરમિયાન સુરક્ષા દળોએ આતંકવાદીઓની હિલચાલને નિષ્ફળ બનાવતા પાકિસ્તાન સ્થિત લશ્કર-એ-તોયબા સંગઠનના યાસીર નામના કુખ્યાત આતંકવાદીને ઠાર માર્યો હતો.

શ્રીનગર સ્થિત ૧૫ કોર્પ્સ અને જમ્મુ-કાશ્મીર પોલીસના સત્તાવાર નિવેદન અનુસાર, બડગામના જંગલોમાં આતંકવાદીઓ છુપાયા હોવાની બાતમી મળતા જ સુરક્ષા દળોએ તાત્કાલિક વિસ્તારને ઘેરી લઈને સર્ચ ઓપરેશન શરૂ કર્યું હતું, જે દરમિયાન આતંકવાદીઓ તરફથી ગોળીબાર થતા જવાબી કાર્યવાહીમાં આ પાકિસ્તાની નાગરિક ઠાર થયો હતો.

આ ઓપરેશનની સફળતા બાદ જમ્મુ-કાશ્મીર પોલીસે સોશિયલ મીડિયા પ્લેટફોર્મ 'એક્સ' પર કડક શબ્દોમાં ચેતવણી આપતા જણાવ્યું હતું કે "તમે ભાગી શકો છો પણ છુપાઈ શકી શકતા નથી," અને આ એન્કાઉન્ટર દ્વારા ખીણમાં સુરક્ષા વ્યવસ્થાની મજબૂતાઈનો પુનઃ પરિચય આપ્યો છે.

ઉલ્લેખનીય છે કે કાશ્મીર ખીણમાં છેલ્લા કેટલાક મહિનાઓથી શાંતિનો માહોલ જોવા મળ્યો હતો, જોકે આ અગાઉ આ વર્ષે ૮ જુલાઈએ શોપિયાંના ચાનાપોરામાં પણ ૫૫ રાષ્ટ્રીય રાઈફલ્સ અને સુરક્ષા દળો દ્વારા એક સફળ ઓપરેશન પાર પાડવામાં આવ્યું હતું, અને હવે આ તાજા એન્કાઉન્ટર બાદ સુરક્ષા એજન્સીઓ દ્વારા વધુ સતર્કતા દાખવીને સમગ્ર વિસ્તારમાં સઘન તપાસ અભિયાન જારી રાખવામાં આવ્યું છે.