નવી દિલ્હી, : મેદાન પર દુનિયાભરના બોલરોને ધ્રુજાવનાર વિરાટ કોહલીને દિલ્હીની એક શાળામાં વિદ્યાર્થીઓના જોરદાર ઉત્સાહ સામે નમતું જોખવું પડ્યું હતું. દિલ્હી પબ્લિક સ્કૂલ (DPS), આર.કે. પુરમ ખાતે વેસ્ટ દિલ્હી પબ્લિક એકેડેમીના ઉદ્ઘાટન પ્રસંગે પહોંચેલા કોહલીને જોવા માટે વિદ્યાર્થીઓની ભીડ ઉમટી પડી હતી અને વાતાવરણ એટલું ગુંજી ઉઠ્યું હતું કે વિરાટને પોતાની સ્પીચ અધવચ્ચે રોકવી પડી હતી.
'બોલને દો યાર પ્લીઝ!': કોહલીની રમુજી વિનંતી
જેવો વિરાટ સ્ટેજ પર આવ્યો, વિદ્યાર્થીઓએ 'RCB, RCB' ના નારા લગાવવાનું શરૂ કરી દીધું હતું. ઘોંઘાટ એટલો વધી ગયો કે કોહલી કંઈ પણ બોલી શકતો નહોતો. અંતે, હસતા ચહેરે વિરાટે માઈક પર વિનંતી કરતા કહ્યું, "બોલને દો યાર પ્લીઝ!" (ભાઈ, મને બોલવા તો દો!). કોહલીનો આ અંદાજ જોઈને ત્યાં હાજર સૌ કોઈ હસી પડ્યા હતા અને આ વીડિયો અત્યારે સોશિયલ મીડિયા પર જોરદાર ટ્રેન્ડ થઈ રહ્યો છે.
સપનાઓ પ્રત્યે પ્રામાણિક રહેવા આપી સલાહ
ગઈકાલે મંગળવારે યોજાયેલા આ કાર્યક્રમમાં કોહલીએ વિદ્યાર્થીઓને જીવનમાં સફળ થવા માટે મહત્વનો મંત્ર આપ્યો હતો. તેણે કહ્યું, "તમારા સપનાઓ પ્રત્યે પ્રામાણિક રહો. તમે શું કરવા માંગો છો તે નક્કી કરો અને પૂરી પ્રતિબદ્ધતા સાથે તેને અનુસરો. તમે 100% પ્રામાણિક છો કે નહીં તે માત્ર તમે જ જાણી શકો છો. મેં પણ ખૂબ નાની ઉંમરે ક્રિકેટ પસંદ કર્યું હતું, પરંતુ તે નિર્ણય પાછળ મારી મહેનત અને પરિવાર તથા શિક્ષકો પ્રત્યેની પ્રામાણિકતા હતી."
પગ સ્પર્શ કરવા ગયેલા વિદ્યાર્થીને અટકાવ્યો
આ સમારોહ દરમિયાન એક ભાવુક દ્રશ્ય પણ જોવા મળ્યું હતું. જ્યારે કોહલી એક વિદ્યાર્થીને ટ્રોફી એનાયત કરી રહ્યો હતો, ત્યારે તે યુવાન છોકરો આદરભાવ સાથે વિરાટના ચરણ સ્પર્શ કરવા નીચો નમ્યો હતો. 37 વર્ષીય કોહલીએ તરત જ તેને અટકાવ્યો અને સામે હાથ જોડીને અભિવાદન કર્યું હતું. વિરાટની આ નમ્રતાએ ફરી એકવાર સાબિત કરી દીધું કે તે શા માટે કરોડો લોકોનો આદર્શ છે.
દિલ્હીના આંગણે પોતાના મનપસંદ ક્રિકેટરને આટલી નજીક જોઈને વિદ્યાર્થીઓ માટે આ દિવસ હંમેશા યાદગાર બની રહેશે. વિરાટે પણ જૂની યાદો તાજી કરતા શાળાના વાતાવરણનો આનંદ માણ્યો હતો.