નવી દિલ્હી: ભારતીય સરહદોની સુરક્ષાને વધુ મજબૂત કરવા અને વાયુસેના (IAF)ની પ્રહાર ક્ષમતામાં ઘાતક વધારો કરવા માટે સંરક્ષણ મંત્રાલયે બુધવાર, ૨૩ સપ્ટેમ્બર ૨૦૨૬ના રોજ એક મોટો ઐતિહાસિક સોદો આખરી કર્યો છે. દેશની રાજધાની નવી દિલ્હી ખાતે સંરક્ષણ સચિવ રાજેશ કુમાર સિંહની વિશેષ હાજરીમાં સંરક્ષણ મંત્રાલય અને જાહેર ક્ષેત્રની અગ્રણી કંપની ભારત ડાયનેમિક્સ લિમિટેડ (BDL) વચ્ચે ₹૮૧૦.૭૯ કરોડ (આશરે ₹૮૧૧ કરોડ)ના મહત્વપૂર્ણ કરાર પર હસ્તાક્ષર કરવામાં આવ્યા હતા. આ કરાર હેઠળ ભારતીય વાયુસેના માટે ૧૬૦ અત્યાધુનિક ‘સેટેલાઇટ સ્માર્ટ એન્ટી-એરફિલ્ડ વેપન્સ’ અને તેને સંબંધિત આનુષંગિક સાધનો ખરીદવામાં આવશે. સંપૂર્ણ ખરીદી શ્રેણી હેઠળ કરવામાં આવી છે, જે દેશી સંરક્ષણ ઉત્પાદનમાં માઇલસ્ટોન સાબિત થશે.

ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશન  દ્વારા ખાસ ડિઝાઇન કરાયેલું આ SAT-SAAW હવાથી જમીન પર અત્યંત ચોકસાઈથી ત્રાટકતું ગ્લાઇડ બોમ્બ છે. ૧૨૫ કિલોગ્રામ વજન ધરાવતું આ દેશી સ્માર્ટ હથિયાર હવામાં તરતું રહીને ૯૦ થી ૧૦૦ કિલોમીટર દૂર રહેલા લક્ષ્યને સચોટ રીતે નષ્ટ કરવાની ક્ષમતા ધરાવે છે. તેની સૌથી મોટી વિશેષતા એ છે કે તેની લાંબી 'સ્ટેન્ડ-ઓફ રેન્જ'ના કારણે ભારતીય ફાઇટર પાયલોટોએ દુશ્મન દેશની એર ડિફેન્સ મિસાઇલ સિસ્ટમની રેન્જમાં કે તેમના હવાઈ ક્ષેત્રમાં ઊંડે સુધી જવું પડશે નહીં. વાયુસેના પોતાના સરહદી વિસ્તારમાંથી જ આ ગ્લાઇડ બોમ્બ છોડીને દુશ્મનના રનવે, ટેક્સીવે, રડાર સ્ટેશનો, બંકરો અને ફ્યુઅલ ડેપોને સંપૂર્ણપણે તબાહ કરી શકશે.

આ સ્માર્ટ બોમ્બ સિસ્ટમમાં ૬૦ ટકાથી વધુ સ્થાનિક સામગ્રીનો ઉપયોગ કરાયો છે, જેમાં ઇનર્શિયલ મેઝરમેન્ટ યુનિટ , લોંગ ઇમ્પેક્ટ ડિલે ફ્યુઝ અને ટ્વીન સ્ટોર કેરિયર જેવા મુખ્ય સબસિસ્ટમ પણ ભારતમાં જ બનાવવામાં આવ્યા છે. આ ઘાતક હથિયારને વાયુસેનાના અગ્રણી ફાઇટર જેટ્સ જેવા કે સુખોઈ (Su-30MKI), જગુઆર અને હોક (Hawk) પર સરળતાથી તૈનાત કરી શકાશે. BDL દ્વારા ૨૦૨૭-૨૮ અને ૨૦૨૮-૨૯ના નાણાકીય વર્ષો દરમિયાન તેની ડિલિવરી પૂરી કરવામાં આવશે. આ નવતર ઇન્ડક્શનથી ભારતીય વાયુસેના કોઈપણ યુદ્ધની સ્થિતિમાં દુશ્મનના વિમાનોને ટેક-ઓફ કરતા પહેલા જ રનવે પર જ ઠપ્પ કરી દેશે, જેનાથી દેશની સંરક્ષણ સજ્જતા વધુ મજબૂત બનશે અને વિદેશી શસ્ત્રો પરની નિર્ભરતા ઘટી જશે.