મુંબઈ : ભારતીય શેરબજારમાં આગામી સપ્તાહ આઈપીઓ રોકાણકારો માટે ખૂબ જ વ્યસ્ત અને ઉત્સાહજનક રહેવાનું છે. 4 મેથી શરૂ થતા નવા અઠવાડિયામાં ત્રણ નવા પબ્લિક ઈશ્યૂ સબસ્ક્રિપ્શન માટે ખુલશે, જેમાં બે SME સેગમેન્ટની કંપનીઓ અને એક મોટા કદના રિયલ એસ્ટેટ ઈન્વેસ્ટમેન્ટ ટ્રસ્ટ (REIT) નો સમાવેશ થાય છે. વેલ્યુ 360 કોમ્યુનિકેશન્સ ₹41.69 કરોડ એકત્ર કરવાના લક્ષ્ય સાથે 4 મેના રોજ મેદાનમાં ઉતરશે, જ્યારે રિકોડ સ્ટુડિયો ₹44.59 કરોડના ઈશ્યૂ સાથે 5 મેના રોજ એન્ટ્રી કરશે. આ બંને કંપનીઓ અનુક્રમે NSE અને BSE ના SME પ્લેટફોર્મ પર લિસ્ટ થવાની તૈયારીમાં છે.

આ સપ્તાહનું સૌથી મોટું આકર્ષણ 'બાગમને પ્રાઇમ ઓફિસ REIT' નો આઈપીઓ છે, જેનું કદ ₹3,405 કરોડ જેટલું વિશાળ છે. 5 મેના રોજ ખુલનારા આ ઈશ્યૂની પ્રાઇસ બેન્ડ ₹95 થી ₹100 નક્કી કરવામાં આવી છે. આ ઉપરાંત, અગાઉથી ખુલેલો ઓનઇએમઆઇ ટેકનોલોજીનો ₹925 કરોડનો મેઇનબોર્ડ આઈપીઓ પણ 5 મેના રોજ બંધ થશે. બજારના વિશ્લેષકોના મતે, રિયલ એસ્ટેટ અને ટેકનોલોજી ક્ષેત્રના આ ઈશ્યૂઓ રોકાણકારોને આકર્ષવામાં સફળ રહી શકે છે, જોકે લિસ્ટિંગના દિવસે બજારની અસ્થિરતા જોવી મહત્વની રહેશે.

નવા લિસ્ટિંગની વાત કરીએ તો, આગામી અઠવાડિયામાં બે કંપનીઓના શેર શેરબજારમાં ડેબ્યૂ કરશે. અંબા ઓટો સેલ્સના શેર 5 મેના રોજ NSE SME પર લિસ્ટ થશે, જ્યારે ઓનઇએમઆઇ ટેકનોલોજીના શેર 8 મેના રોજ લિસ્ટ થવાની ધારણા છે. પ્રાઇમ ઓફિસ REIT નું લિસ્ટિંગ 15 મેના રોજ થવાની શક્યતા છે. આમ, મે મહિનાની શરૂઆત શેરબજારમાં નવા ફંડ અને લિસ્ટિંગના ધમધમાટ સાથે થશે, જે નાના અને મોટા એમ બંને પ્રકારના રોકાણકારો માટે વૈવિધ્યસભર વિકલ્પો પૂરા પાડશે.