વિજય વસાણી દ્વારા, ગાંધીનગર : રાજ્યમાં ચાલુ વર્ષે ચોમાસા બાદ ઊભી થયેલી વર્તમાન પરિસ્થિતિ અને પાણીની અછતને ધ્યાનમાં રાખીને રાજ્ય સરકારે એક મોટો અને મહત્વનો નિર્ણય લીધો છે. મુખ્યમંત્રી ભૂપેન્દ્રભાઈ પટેલે ગાંધીનગર ખાતે યોજાયેલી એક વિશેષ પત્રકાર પરિષદમાં રાજ્યના ચાર મહત્વના જિલ્લાઓને દુષ્કાળગ્રસ્ત જાહેર કર્યા છે. આ જાહેરાત આજથી આગામી છ મહિના સુધી અમલમાં રહેશે.

પ્રાપ્ત વિગતો અનુસાર, નવી દુષ્કાળ માર્ગદર્શિકા મુજબ કચ્છ, પોરબંદર, જામનગર અને દેવભૂમિ દ્વારકા જિલ્લાને સત્તાવાર રીતે દુષ્કાળગ્રસ્ત જાહેર કરવામાં આવ્યા છે. આ વિસ્તારોમાં ખેડૂતોને આર્થિક સંકટમાંથી બહાર લાવવા માટે મહત્તમ બે હેક્ટરની મર્યાદામાં પ્રતિ હેક્ટર ૮,૫૦૦ રૂપિયાની આર્થિક સહાય ચૂકવવામાં આવશે.

પશુપાલકોની મુશ્કેલીઓને ધ્યાનમાં રાખીને સરકારે જાહેરાત કરી છે કે અત્યાર સુધી વિનામૂલ્યે ઘાસચારાનું વિતરણ કરવામાં આવ્યું છે અને હવે પશુદીઠ બે મહિના માટે દૈનિક ૮૦ રૂપિયાની સહાય પણ આપવામાં આવશે. આ ઉપરાંત, ગ્રામીણ વિસ્તારોમાં શ્રમિકો અને પરિવારો માટે રોજગારીની પૂરતી તકો ઊભી કરવાના હેતુસર ૧૫૦ માણસ દિવસની રોજગારી આપવાનો નિર્ણય લેવાયો છે.

આ મહત્વપૂર્ણ જાહેરાત સમયે મુખ્યમંત્રી સાથે રાજ્ય મંત્રી જીતુભાઇ વાઘાણી, વહીવટી તંત્રના ઉચ્ચ અધિકારીઓ પણ ઉપસ્થિત રહ્યા હતા. મહેસૂલ વિભાગના અધિક મુખ્ય સચિવ ડૉ. જયંતી રવિ અને રાહત કમિશનર ગૌરાંગ મકવાણાની ઉપસ્થિતિમાં આ રાહત પગલાંઓની સત્તાવાર વિગતો જાહેર કરવામાં આવી હતી. સરકારના આ સત્વર નિર્ણયોથી દુષ્કાળગ્રસ્ત વિસ્તારોની જનતાને મોટી રાહત મળી રહેશે.