નવી દિલ્હી:  ભારતના સેટેલાઇટ કોમ્યુનિકેશન  ક્ષેત્રે વૈશ્વિક અને દેશી ટેલિકોમ કંપનીઓ વચ્ચે જામી રહેલી તીવ્ર સ્પર્ધા વચ્ચે કેન્દ્ર સરકારે પોતાનું વલણ સ્પષ્ટ કરી દીધું છે. સરકારે મજબૂત સંદેશ આપ્યો છે કે ભારતીય બજારમાં તમામ સેટેલાઇટ ઇન્ટરનેટ કંપનીઓનું સ્વાગત છે અને આ ક્ષેત્રમાં આખરે ગ્રાહક જ સાચો 'રાજા' પૂરવાર થશે. ગ્રાહકો પોતાની સુવિધા, વાજબી કિંમત, ગુણવત્તા અને સેવાની જરૂરિયાત મુજબ પોતે જ નક્કી કરશે કે તેમને કઈ કંપનીનું સેટેલાઇટ કનેક્શન લેવું છે. આ ક્ષેત્રમાં કોઈ એક કંપનીનો એકાધિકાર નહીં રહે પરંતુ ગ્રાહકોને મુક્ત પસંદગીનો અધિકાર મળશે.

સરકારી સૂત્રોના જણાવ્યા અનુસાર, દેશમાં સેટકોમ લાઇસન્સિંગની પ્રક્રિયા સંપૂર્ણપણે પારદર્શક અને કડક નીતિ-નિયમો હેઠળ હાથ ધરવામાં આવી છે. અત્યાર સુધી દેશમાં Jio, OneWeb અને એલોન મસ્કની Starlink ને લાઇસન્સ પ્રક્રિયા હેઠળ આવરી લેવામાં આવ્યા છે. જોકે, સરકારે એક મહત્વપૂર્ણ માહિતી શેર કરતા જણાવ્યું હતું કે સ્થાપિત સુરક્ષા ધોરણો અને આવશ્યક દસ્તાવેજો પૂર્ણ કરવામાં OneWeb સૌથી પ્રથમ ક્રમે રહી હતી, ત્યારબાદ Reliance Jio એ પાલન કર્યું હતું, જ્યારે એલોન મસ્કની કંપની Starlink આ સુરક્ષા આવશ્યકતાઓને પૂર્ણ કરવામાં અને લાઇસન્સિંગ પ્રક્રિયામાં સૌથી છેલ્લી પૂરવાર થઈ હતી.

હવે દેશમાં મોટા પાયે સેટેલાઇટ ઇન્ટરનેટ સેવાઓ વિધિવત રીતે શરૂ થાય તે પહેલાં માત્ર બે મુખ્ય તબક્કા બાકી રહ્યા છે. પ્રથમ તબક્કામાં કેન્દ્ર સરકારે સ્પેક્ટ્રમની ફાળવણી અને તેની કિંમત નક્કી કરવાની પ્રક્રિયા પૂર્ણ કરવાની રહેશે. બીજા તબક્કામાં ત્રણેય લાઇસન્સ ધરાવતી કંપનીઓએ દેશની રાષ્ટ્રીય સુરક્ષા સાથે જોડાયેલી તમામ આકરી શરતોનું શત-પ્રતિશત પાલન કરીને મંજૂરી મેળવવાની રહેશે. એકવાર આ સુરક્ષા ચકાસણી પૂર્ણ થઈ ગયા પછી સમગ્ર ભારતમાં દૂરદૂરના ગ્રામીણ અને દુર્ગમ વિસ્તારો સુધી હાઇ-સ્પીડ સેટેલાઇટ ઇન્ટરનેટ પહોંચાડવાનો માર્ગ મોકળો થઈ જશે.