કોલંબો: તા.૨૦ શ્રીલંકાના અર્થતંત્રની કરોડરજ્જુ સમાન પ્રવાસન ઉદ્યોગ પર પશ્ચિમ એશિયા (મધ્ય પૂર્વ)માં ચાલી રહેલા યુદ્ધની સીધી અસર જોવા મળી રહી છે. શ્રીલંકા ટુરિઝમ ડેવલપમેન્ટ ઓથોરિટી (SLTDA) ના તાજેતરના આંકડા મુજબ, માર્ચ મહિનામાં પ્રવાસીઓના આગમનમાં આશ્ચર્યજનક ઘટાડો નોંધાયો છે. જાન્યુઆરી અને ફેબ્રુઆરીમાં પ્રવાસીઓનો પ્રવાહ તેજીમાં હતો, પરંતુ યુદ્ધના કારણે મુસાફરી યોજનાઓ ખોરવાતા માર્ચમાં પ્રવાસન ક્ષેત્રે ફટકો પડ્યો છે.
યુદ્ધે કેવી રીતે બગાડી રમત?
જાન્યુઆરીમાં ૨.૭૭ લાખ અને ફેબ્રુઆરીમાં ૨.૭૯ લાખ પ્રવાસીઓ શ્રીલંકા આવ્યા હતા, પરંતુ માર્ચમાં આ આંકડો ઘટીને માત્ર ૧,૮૩,૯૭૯ પર આવી ગયો છે. પશ્ચિમ એશિયામાં ચાલી રહેલા સંઘર્ષને કારણે ગલ્ફ પ્રદેશના મુખ્ય ટ્રાન્ઝિટ હબ (કનેક્ટિંગ એરપોર્ટ્સ) પર અસર પડી છે. યુરોપથી આવતા પ્રવાસીઓ સામાન્ય રીતે મધ્ય પૂર્વના દેશો થઈને શ્રીલંકા પહોંચતા હોય છે, પરંતુ યુદ્ધના ભય અને ફ્લાઈટ્સ રદ થવાને કારણે વિદેશી પ્રવાસીઓએ તેમની મુસાફરી મોકૂફ રાખી છે.
ભારત બન્યું શ્રીલંકાનું સૌથી મોટું માર્કેટ
આ સંકટના સમયમાં ભારતે શ્રીલંકાના પ્રવાસનને મોટી રાહત આપી છે. માર્ચ મહિનામાં કુલ પ્રવાસીઓમાં ૨૫.૮% હિસ્સા સાથે ભારત સૌથી મોટું સોર્સ માર્કેટ રહ્યું છે. માર્ચમાં ૪૭,૫૩૩ ભારતીય પ્રવાસીઓએ શ્રીલંકાની મુલાકાત લીધી હતી. ભારતની નિકટતા અને સીધી ફ્લાઈટ કનેક્ટિવિટીને કારણે ભારતીય પ્રવાસીઓને મધ્ય પૂર્વના દેશોના ટ્રાન્ઝિટ રૂટ પર આધાર રાખવો પડતો નથી, જે શ્રીલંકા માટે આશીર્વાદરૂપ સાબિત થયું છે.
અન્ય દેશોની સ્થિતિ
ભારત પછી બ્રિટન બીજા ક્રમે (૧૮,૦૯૨ પ્રવાસીઓ) રહ્યું છે, જ્યારે રશિયા અને ચીન અનુક્રમે ત્રીજા અને ચોથા ક્રમે રહ્યા છે. SLTDA ના મતે, ભારત હવે શ્રીલંકા માટે એક ‘સ્ટેબલ એન્કર’ સમાન છે. યુરોપથી થતા પ્રવાસીઓના ઘટાડાને ભારતીય પ્રવાસીઓનો ધસારો આંશિક રીતે સરભર કરી રહ્યો છે. વાર્ષિક ધોરણે ભારતીય પ્રવાસીઓની સંખ્યામાં ૨૧% થી વધુનો ઉછાળો જોવા મળ્યો છે.
પર્યટકો માટે સ્વર્ગ છે શ્રીલંકા
શ્રીલંકા તેના વારસા, વન્યજીવન અને મનોહર દરિયાકિનારા માટે વિશ્વભરમાં પ્રખ્યાત છે. કોલંબોની ઝાકઝમાળ, કેન્ડીના ઐતિહાસિક સ્થળો અને પહાડી પ્રદેશોની ટ્રેન મુસાફરી પ્રવાસીઓને મંત્રમુગ્ધ કરે છે. જોકે, હાલની ભૌગોલિક-રાજકીય સ્થિતિને જોતા શ્રીલંકા સરકાર હવે એશિયન દેશોના પ્રવાસીઓને આકર્ષવા પર વધુ ધ્યાન કેન્દ્રિત કરી રહી છે.
 
માર્ચ ૨૦૨૬ના પ્રમુખ આંકડા:
•    કુલ પ્રવાસીઓ: ૧,૮૩,૯૭૯ (ફેબ્રુઆરીની સરખામણીએ ૩૪% ઘટાડો)
•    ભારતીય પ્રવાસીઓ: ૪૭,૫૩૩ (૨૫.૮% હિસ્સો)
•    બ્રિટિશ પ્રવાસીઓ: ૧૮,૦૯૨ (૯.૮% હિસ્સો)
•    ઘટાડાનું કારણ: પશ્ચિમ એશિયા યુદ્ધ અને ટ્રાન્ઝિટ રૂટમાં વિક્ષેપ