મુંબઈ, તા.૦૩: મુંબઈથી ગોરખપુર જઈ રહેલી સ્પાઈસજેટની ફ્લાઈટ (SG553) મુસાફરોને બોર્ડિંગ કરાવ્યા બાદ છેલ્લી ઘડીએ અચાનક રદ કરવામાં આવતા પ્રવાસીઓમાં ભારે રોષ ફાટી નીકળ્યો હતો અને વિરોધ સ્વરૂપે મુસાફરો પ્લેનની નીચે જમીન પર સૂઈ ગયા હોવાની ઘટના સામે આવી છે.

પ્રાપ્ત વિગતો અનુસાર, ૧લી નવેમ્બરના રોજ મુંબઈ એરપોર્ટ પર બોર્ડિંગ પ્રક્રિયા પૂર્ણ થયા બાદ મુસાફરોને એક કલાક સુધી વિમાનમાં બેસાડી રાખવામાં આવ્યા હતા અને ત્યારબાદ અચાનક ફ્લાઈટ રદ કરવાની જાહેરાત કરાતા પ્રવાસીઓએ એરલાઈનની આ લાપરવાહી સામે ઉગ્ર નારાજગી વ્યક્ત કરી હતી.

ઘટનાની વિગતવાર માહિતી આપતા આ અનોખા વિરોધમાં સામેલ ટીવી અભિનેત્રી વિજય લક્ષ્મી મલ્યાએ સોશિયલ મીડિયા પર વીડિયો શેર કરીને જણાવ્યું હતું કે જીવનમાં ક્યારેય આવો દુર્ભાગ્યપૂર્ણ અનુભવ થયો નથી જ્યાં મુસાફરોને વિમાનમાંથી ઉતારીને રનવે પર વિરોધ કરવાની ફરજ પડી હોય.

અભિનેત્રીએ સવાલ ઉઠાવ્યો હતો કે જો એરપોર્ટના સમય કે અન્ય પ્રતિબંધો હતા, તો મુસાફરોને બોર્ડિંગ કરવાની મંજૂરી જ શા માટે આપવામાં આવી હતી અને સમયસર યોગ્ય માહિતી કેમ ન આપવામાં આવી.

ભૂતકાળમાં પણ એરલાઈન્સ દ્વારા ફ્લાઈટ્સમાં વિલંબ કે છેલ્લી ઘડીએ ફ્લાઈટ રદ થવાની ઘટનાઓને કારણે મુસાફરોને પડતી મુશ્કેલીઓના અગાઉ અનેક કિસ્સાઓ સામે આવ્યા છે, જે એરપોર્ટ મેનેજમેન્ટની કામગીરી સામે અવારનવાર પ્રશ્નાર્થ ચિન્હ મૂકે છે.

આગામી સમયમાં આ ગંભીર બેદરકારી સામે સક્ષમ ઉડ્ડયન અધિકારીઓ દ્વારા યોગ્ય તપાસ કરવામાં આવે અને પ્રવાસીઓને વિલંબ કે રદ્દીકરણના કિસ્સાઓમાં યોગ્ય વળતર તથા સુવિધાઓ પૂરી પાડવા અંગે કડક નિયમોનું પાલન સુનિશ્ચિત થાય તેવી માંગ ઉઠી રહી છે.