સિઓલ, દક્ષિણ કોરિયા, તા. 04 જૂન, 2026 દક્ષિણ કોરિયા હવે પોતાની ટેકનોલોજીકલ અને સંશોધન ક્ષમતાઓને નવી ઊંચાઈઓ પર લઈ જવા માટે સજ્જ બન્યું છે. દક્ષિણ કોરિયાની સરકારે પોતાના 'ટોપ-ટાયર વિઝા' પ્રોગ્રામમાં મોટો ફેરફાર જાહેર કર્યો છે. અત્યાર સુધી આ વિઝા ફક્ત અદ્યતન ઉદ્યોગોમાં કામ કરતા કોર્પોરેટ કર્મચારીઓ પૂરતા જ મર્યાદિત હતા, પરંતુ હવે તે વિજ્ઞાન અને ટેકનોલોજી ક્ષેત્રના પ્રોફેસરો અને સંશોધકો માટે પણ ખુલ્લા મૂકવામાં આવ્યા છે. આ પગલાનો મુખ્ય ઉદ્દેશ્ય વિશ્વભરમાંથી શ્રેષ્ઠ બૌદ્ધિક પ્રતિભાઓને પોતાના દેશમાં લાવીને એક વૈશ્વિક 'થિંક ટેન્ક' તૈયાર કરવાનો છે.

શું છે નવો માળખું અને પાત્રતા?

નવી નીતિ મુજબ, દક્ષિણ કોરિયાની યુનિવર્સિટીઓ, સરકારી સંશોધન સંસ્થાઓ અને કોર્પોરેટ લેબ્સ વિદેશી સંશોધકોને સ્પોન્સર કરી શકશે. વિજ્ઞાન અને ICT મંત્રાલય દ્વારા ભલામણ કરવામાં આવ્યા બાદ ન્યાય મંત્રાલય દ્વારા અરજદારોનું સ્ક્રીનીંગ કરવામાં આવશે. લાયકાત મેળવવા માટે, અરજદારોએ વૈશ્વિક સ્તરે માન્ય પુરસ્કારો, સંશોધન પ્રકાશનો, પેટન્ટ્સ અથવા ટેકનોલોજી વ્યાપારીકરણ જેવી નોંધપાત્ર વ્યાવસાયિક સિદ્ધિઓ સાબિત કરવી પડશે. એટલું જ નહીં, અપવાદરૂપ ક્ષમતા ધરાવતા વ્યક્તિઓ માટે સરકાર અલગ સમીક્ષા પ્રક્રિયા પણ હાથ ધરશે.

2,000 નિષ્ણાતોનું લક્ષ્ય અને પ્રાથમિકતા સહાય

દક્ષિણ કોરિયાનું લક્ષ્ય વર્ષ 2030 સુધીમાં 2,000 ઉચ્ચ-ક્ષમતાવાળા નિષ્ણાતોને આકર્ષવાનું છે. સરકાર માત્ર વિઝા જ નહીં, પરંતુ આ નિષ્ણાતોને દક્ષિણ કોરિયામાં સ્થાયી થવા માટે 'પ્રાથમિકતા સહાય' (Priority Support) પણ આપશે. આનો અર્થ એ છે કે, આગમનથી લઈને લાંબા ગાળાના એકીકરણ (Integration) સુધીની તમામ વહીવટી પ્રક્રિયાઓમાં તેમને વિશેષ સહયોગ મળશે, જેથી તેઓ કોઈ પણ અવરોધ વિના પોતાનું સંશોધન કાર્ય શરૂ કરી શકે.

નવીનતાનું નવું કેન્દ્ર બનશે કોરિયા

ન્યાય મંત્રી જંગ સુંગ-હોએ આ અંગે જણાવ્યું હતું કે, આ સુધારા માત્ર વિઝા નીતિ નથી, પરંતુ તે દેશની સંશોધન ક્ષમતાઓને મજબૂત બનાવવાની વ્યૂહરચના છે. વધતી જતી વૈશ્વિક સ્પર્ધા વચ્ચે, દક્ષિણ કોરિયા પોતાની જાતને સંશોધન અને નવીનતા (Research & Innovation) ના વૈશ્વિક કેન્દ્ર તરીકે સ્થાપિત કરવા માંગે છે. આ નિર્ણયથી ભારતના તેજસ્વી વૈજ્ઞાનિકો અને પ્રોફેસરો માટે પણ દક્ષિણ કોરિયામાં કામ કરવાની નવી અને સુવર્ણ તકો ઉભી થઈ છે.

દક્ષિણ કોરિયાનું આ પગલું દર્શાવે છે કે આવનારા સમયમાં જે દેશ શ્રેષ્ઠ 'બૌદ્ધિક મૂડી' (Intellectual Capital) ધરાવશે, તે જ વિશ્વનું નેતૃત્વ કરશે. શું આ પહેલ દક્ષિણ કોરિયાને આવનારા દાયકામાં વૈજ્ઞાનિક ક્રાંતિનું કેન્દ્ર બનાવશે? તે જોવું હવે ખૂબ જ રસપ્રદ રહેશે.