​ચેન્નાઈ, : ભારતીય સિનેમા, ખાસ કરીને સાઉથ સિનેમામાં પોતાના પ્રયોગાત્મક અને ક્રાંતિકારી વિચારસરણી માટે ઓળખાતા જાણીતા ફિલ્મમેકર, લેખક અને દિગ્દર્શક સિંગીથમ શ્રીનિવાસ રાવનું ૯૪ વર્ષની વયે અવસાન થયું છે. ઉંમર સંબંધિત બીમારીઓના કારણે તબિયત લથડતાં તેમને ચેન્નાઈની કાવેરી હોસ્પિટલમાં દાખલ કરવામાં આવ્યા હતા, જ્યાં શનિવારે રાત્રે તેમણે અંતિમ શ્વાસ લીધા હતા. તેમના નિધનના સમાચાર સામે આવતા જ સમગ્ર મનોરંજન જગતમાં શોકની લહેર ફરી વળી છે.

​તેમના પૌત્ર અશ્વિને પરિવાર વતી માહિતી આપતાં જણાવ્યું હતું કે, રવિવારે સાંજે ૪:૩૦ વાગ્યે ચેન્નાઈના AVM ક્રેમેટોરિયમ (શ્મશાનગૃહ) ખાતે તેમના અંતિમ સંસ્કાર કરવામાં આવશે.

​સિનેમાના ઇતિહાસમાં અનોખી છાપ

૨૧ સપ્ટેમ્બર, ૧૯૩૧ના રોજ આંધ્રપ્રદેશના ગુડુરમાં જન્મેલા સિંગીથમ શ્રીનિવાસ રાવે પોતાના છ દાયકાથી વધુ લાંબા કરિયરમાં તેલુગુ, તમિલ, કન્નડ, હિન્દી અને અંગ્રેજી ભાષાઓમાં આશરે ૬૦થી વધુ ફિલ્મોનું નિર્દેશન કર્યું હતું. તેમણે વર્ષ ૧૯૭૨માં તેલુગુ ફિલ્મ 'નીતિ નિજાયિતિ'થી ડાયરેક્ટર તરીકે ડેબ્યૂ કર્યું હતું.

​તેમણે બનાવેલી ૧૯૮૭ની મૂક ફિલ્મ (બિના ડાયલોગની ડાર્ક કોમેડી) 'પુષ્પક વિમાનમ' (કમલ હાસન અભિનીત) અને ૧૯૯૧ની ભારતની પ્રથમ ટાઈમ ટ્રાવેલ સાયન્સ ફિક્શન ફિલ્મ 'આદિત્ય ૩૬૯' આજના સમયમાં પણ સીમાચિહ્નરૂપ માનવામાં આવે છે. 'પુષ્પક વિમાનમ' માટે તેમને રાષ્ટ્રીય પુરસ્કારથી પણ સન્માનિત કરવામાં આવ્યા હતા. ૯૪ વર્ષની વયે પણ તેઓ કાર્યરત હતા અને તેમની છેલ્લી ફિલ્મ 'સિંગ ગીથમ' હાલમાં જ રિલીઝ થઈ હતી.

​દિગ્ગજ કલાકારોએ આપી ભાવાંજલિ

તેમના નિધન પર તેલુગુ અને દક્ષિણ ભારતીય સિનેમાના અનેક દિગ્ગજોએ શોક વ્યક્ત કર્યો છે:

​જૂનિયર એનટીઆર: "સિંગીથમ શ્રીનિવાસ રાવ સરના નિધનના સમાચાર અત્યંત દુઃખદ છે. તેઓ સમય કરતાં આગળ વિચારનારા દ્રષ્ટા (વિઝનરી) હતા. 'આદિત્ય ૩૬૯', 'પુષ્પક વિમાનમ' અને 'મયૂરી' જેવી ફિલ્મો પેઢીઓ બદલાયા પછી પણ તાજી લાગે છે."
​વેંકટેશ ડગ્ગુબાતી: "તેલુગુ સિનેમાના એક અદ્ભુત પ્રકરણનો અંત આવ્યો છે. સિનેમાની અસીમ શક્યતાઓમાં તેમનો વિશ્વાસ અજોડ હતો."
​આ ઉપરાંત સંગીતકાર દેવી શ્રી પ્રસાદ, સુધીર બાબુ અને કિરણ અબ્બાવરમ સહિત અનેક હસ્તીઓએ સોશિયલ મીડિયા પર તેમને શ્રદ્ધાંજલિ અર્પી હતી.