રુદ્રપ્રયાગ, તા.૨૨: દેવભૂમિ ઉત્તરાખંડના હિમાલયી ક્ષેત્રમાં સ્થિત પવિત્ર પંચ કેદાર સર્કિટના અત્યંત મહત્વપૂર્ણ એવા ‘શ્રી મધ્યમહેશ્વર મંદિર’ (મદ્મહેશ્વર ધામ) ના દ્વાર શુક્રવાર, ૨૧ મે ના રોજ પરંપરાગત વૈદિક મંત્રોચ્ચાર, વિશેષ પૂજા-અર્ચના અને ધાર્મિક વિધિઓ સાથે શ્રદ્ધાળુઓ માટે સત્તાવાર રીતે ખોલી દેવામાં આવ્યા છે. શિયાળાના છ મહિના સુધી ભારે હિમવર્ષા અને હાડથીજવતી ઠંડીના કારણે બંધ રહ્યા બાદ, હવે આગામી છ મહિના સુધી દેશ-વિદેશના શિવભક્તો આ દિવ્ય ધામના દર્શનનો લાભ લઈ શકશે. પવિત્ર કપાટ ખૂલવાની પ્રથમ ક્ષણે જ દર્શન કરવા માટે ૧,૧૩૫ જેટલા ઉત્સાહી ભક્તો હાજર રહ્યા હતા અને આખું પરિસર ‘હર હર મહાદેવ’ અને ‘બમ બમ ભોલે’ ના ગગનભેદી નારાઓથી ગુંજી ઉઠ્યું હતું.
ચૌખંભ શિખરોની ગોદમાં આવેલું છે આ અલૌકિક ધામ
સમુદ્ર સપાટીથી ૩,૪૯૭ મીટરની અદભુત ઊંચાઈ પર ઉત્તરાખંડના રુદ્રપ્રયાગ જિલ્લાના ગૌંદર ગામમાં આવેલું આ મંદિર પંચ કેદાર સર્કિટ (કેદારનાથ, તુંગનાથ, રુદ્રનાથ, કલ્પેશ્વર અને મધ્યમહેશ્વર) નો એક અભિન્ન હિસ્સો છે. આ મંદિર ચારેય બાજુથી બરફથી ઢંકાયેલા ભવ્ય ચૌખંભ શિખરોથી ઘેરાયેલું છે. અહીં ખાસ કરીને સૂર્યોદય અને સૂર્યાસ્તના સમયે પ્રકૃતિનું જે અલૌકિક સ્વરૂપ જોવા મળે છે, તે ભક્તો અને ટ્રેકર્સને એક અલગ જ દુનિયામાં લઈ જાય છે. કઠોર શિયાળા દરમિયાન જ્યારે અહીં બરફની ચાદર પથરાઈ જાય છે, ત્યારે મધ્યમહેશ્વર ભગવાનની પવિત્ર મૂર્તિને વિધિવત રીતે નીચે ઉખીમઠના ઐતિહાસિક ઓમકારેશ્વર મંદિરમાં સ્થાનાંતરિત કરવામાં આવે છે, જ્યાં શિયાળા દરમિયાન તેમની પૂજા થાય છે.
મુખ્યમંત્રી પુષ્કર સિંહ ધામીએ સોશિયલ મીડિયા પર શેર કરી દિવ્ય ઝલક
મધ્યમહેશ્વર ધામના કપાટ ખૂલવાના શુભ અવસરે ઉત્તરાખંડના મુખ્યમંત્રી પુષ્કર સિંહ ધામીએ સોશિયલ મીડિયા પ્લેટફોર્મ X (અગાઉ ટ્વિટર) પર મંદિરના સુંદર ફોટોગ્રાફ્સ શેર કરીને ભક્તોને શુભકામનાઓ પાઠવી હતી. તેમણે લખ્યું, “પંચ કેદારમાં પ્રમુખ એવા શ્રી મદ્મહેશ્વર ધામના દ્વાર આજે યોગ્ય ધાર્મિક વિધિઓ સાથે ભક્તો માટે ખોલવામાં આવ્યા છે. શ્રદ્ધા, ભક્તિ અને આધ્યાત્મિક ઉર્જાથી સભર દેવભૂમિમાં આ દિવ્ય યાત્રા પર આવતા તમામ શ્રદ્ધાળુઓનું હાર્દિક સ્વાગત છે.” આ સાથે જ તેમણે ઉમેર્યું કે, તેમની સરકાર ચારધામ અને પંચ કેદારની યાત્રાએ આવતા દરેક ભક્તની સુરક્ષા, સુવિધા અને સુખદ પ્રવાસ માટે સંપૂર્ણપણે કટિબદ્ધ છે.
મહાભારત કાળ અને પાંડવો સાથે જોડાયેલી છે અનોખી કથા
પૌરાણિક માન્યતાઓ અનુસાર, મહાભારતના ભીષણ યુદ્ધ બાદ પાંડવો પોતાના જ ભાઈઓ (કૌરવો) ની હત્યાના પાપમાંથી મુક્તિ મેળવવા અને ભગવાન શિવના આશીર્વાદ લેવા માટે હિમાલય આવ્યા હતા. પરંતુ શિવજી પાંડવોથી નારાજ હોવાથી તેમણે એક બળદ (મહિષ) નું રૂપ ધારણ કર્યું અને જમીનમાં અદ્રશ્ય થઈ ગયા. ત્યારબાદ હિમાલયના પાંચ અલગ-અલગ સ્થળોએ ભગવાન શિવના શરીરના ભાગો પ્રગટ થયા, જે આજે 'પંચ કેદાર' તરીકે પૂજાય છે. આ પવિત્ર મધ્યમહેશ્વર ધામ ખાતે ભગવાન શિવ મધ્ય ભાગ એટલે કે પોતાની ‘નાભિ’ (ઉદર) ના સ્વરૂપમાં બિરાજમાન થયા હોવાનું માનવામાં આવે છે, તેથી જ આ સ્થાનનું આધ્યાત્મિક મહત્વ અનંત ગણાય છે.