નવી દિલ્હી : કોંગ્રેસ સંસદીય દળના અધ્યક્ષ સોનિયા ગાંધીએ સોશિયલ મીડિયા પર એક વિશેષ વીડિયો શેર કર્યો છે, જેમાં તેમણે ભૂતપૂર્વ વડાપ્રધાન ઈન્દિરા ગાંધીના જૂના નિવાસસ્થાન એક સફદરજંગ રોડ પર મનાવવામાં આવતી દીવાળીના દિવસોને યાદ કર્યા છે. ઘરના બગીચામાં પોતાની પુત્રી પ્રિયંકા ગાંધી વાડ્રા અને પૌત્રી મિરાયા વાડ્રા સાથે બેસીને સોનિયા ગાંધીએ જણાવ્યું કે તેમને દીવાળીનો તહેવાર ખૂબ ગમતો હતો અને તે દિવસોની ઉજવણી અત્યંત અદભુત હતી.

આ વીડિયોમાં સોનિયા ગાંધી એ વાતને યાદ કરે છે કે પ્રવેશદ્વાર પર આવેલી ગણેશજીની પ્રતિમાને સુંદર રીતે શણગારવામાં આવતી હતી, જ્યારે ઘરના રસ્તાઓ પર અને છત પર દીવા પ્રગટાવવામાં આવતા હતા. દીવાળીની ઉજવણીની પરંપરાઓ અને તે ખાસ ક્ષણોને યાદ કરતા તેમણે જણાવ્યું કે તે દિવસોમાં લોકો ફટાકડા ફોડવા માટે ખૂબ ઉત્સાહી રહેતા હતા અને તેમને ખાસ કરીને ફૂલઝડી પસંદ હતી. તેમણે તે સમયના આસમાનના ખુશનુમા વાતાવરણને પણ યાદ કર્યું.

પ્રિયંકા ગાંધી વાડ્રાએ પણ પોતાના પિતા અને ભૂતપૂર્વ વડાપ્રધાન રાજીવ ગાંધી સાથે જોડાયેલી યાદો તાજી કરી હતી. તેમણે જણાવ્યું કે રાજીવ ગાંધી તેમને અને તેમના ભાઈ રાહુલ ગાંધીને ફટાકડા ખરીદવા માટે જૂની દિલ્હી લઈ જતા હતા. સોનિયા ગાંધીએ ઉમેર્યું કે તહેવારો દરમિયાન તેમના પરિવારમાં કશ્મીરી ભોજન બનતું હતું. સોનિયા ગાંધીએ પોતાના ઈન્સ્ટાગ્રામ હેન્ડલ પર આ વીડિયો શેર કરતા લખ્યું કે તેઓ દીવાળી ઉજવવાની પોતાની જૂની યાદો અને પરંપરાઓને ફરીથી જીવી રહ્યા છે અને સૌને દીવાળીની શુભકામનાઓ પાઠવી છે.

ઉલ્લેખનીય છે કે સોનિયા ગાંધીએ તાજેતરમાં જ સોશિયલ મીડિયા પર પ્રવેશ કર્યો છે અને તેઓ ઈન્સ્ટાગ્રામ તેમજ એક્સ પર સક્રિય થયા છે. તેમના જીવન પર આધારિત સંસ્મરણ પુસ્તક 'બિલોંગિંગ: અ જર્ની ઓફ લવ' પણ ટૂંક સમયમાં લોન્ચ થવા જઈ રહ્યું છે, જેને લઈને રાજકીય અને સાહિત્યિક વર્તુળોમાં ભારે ઉત્સાહ જોવા મળી રહ્યો છે.