તા. ૧૨ સપ્ટેમ્બર ર૦ર૪ વિક્રમ સંવત ર૦૮૦ ભાદરવા સુદ -૯, ગુરૂવાર
૪ વર્ષ પહેલા ઘરેથી ભાગીને કર્યા હતા લવમેરેજ જમાઈએ પત્ની અને સાસુની છરીના ઘા ઝીંકીને કરી હત્યા
ઉત્તર પ્રદેશના બલિયા શહેરથી એક હચમચાવતી ઘટના સામે આવી
બલિયા તા.૨૭: ઉત્તર પ્રદેશના બલિયા શહેરથી એક હચમચાવતી ઘટના સામે આવી છે. બછઈપુર ગામમાં જમાઈએ પોતાની સાસરીમાં ઘૂસીને એવો તાંડવ મચાવ્યો કે, ઘટના જોનારા લોકો કાંપી ઉઠ્યા છે. આરોપીએ પત્નીની ચાકુ મારીને હત્યા કરી દીધી અને ત્યારબાદ સાસુને પણ મોતને ઘાટ ઉતારી દીધી છે. જ્યારે સસરાની હાલત ગંભીર છે. આરોપીએ ચાર વર્ષ પહેલા પ્રેમ લગ્ન કર્યા હતા.
આરોપીની ઓળખ અમિત ગુપ્તા તરીકે થઈ છે, જેણે પત્ની પ્રીતિ અને સાસુ સુશીલા દેવીની ક્રૂરતાપૂર્વક હત્યા કરી છે. તેણે ઝગડામાં વચ્ચે બચાવવા આવેલા સસરા અંતુ ગુપ્તા પર પણ હુમલો કર્યો હતો, જેમને ગંભીર હાલતમાં વારાણસી રિફર કરવામાં આવ્યા છે. પ્રીતિ અને અમિતે વર્ષ ૨૦૨૨માં લવ મેરેજ કર્યા હતા. શરૂઆતમાં બધું સામાન્ય દેખાતું હતું, પરંતુ સમય જતાં સંબંધોમાં તિરાડ વધતી ગઈ.
પરિવારજનોનો આરોપ છે કે, લગ્ન પછી પણ બંને વચ્ચેનો વિવાદ ખતમ થયો નહોતો અને પરિસ્થિતિ સતત બગડતી ગઈ હતી. તાજેતરમાં જ પ્રીતિ તેના પિયર આવીને રહેતી હતી. ગઈકાલે રાત્રે આરોપી અમિત અચાનક સાસરીમાં પહોંચ્યો હતો. તે સીધો રૂમમાં ઘૂસી ગયો અને તેની પત્ની પાસેથી બાળકને છીનવવાનો પ્રયાસ કરવા લાગ્યો. જ્યારે પ્રીતિએ તેનો વિરોધ કર્યો તો અમિતે ગુસ્સામાં આવીને તેના પર ચાકુથી હુમલો કરી દીધો હતો.
ચીસિયારીઓ સાંભળીને જ્યારે સાસુ અને સસરા બચાવવા આવ્યા તો આરોપીએ તેમના પર પણ હુમલો કરી દીધો. આ હુમલામાં પ્રીતિ અને સુશીલા દેવીનું ઘટનાસ્થળે જ મોત નીપજ્યું હતું, જ્યારે અંતુ ગુપ્તા ગંભીર રીતે ઘાયલ થયા હતા. ઘટનાને અંજામ આપીને આરોપી સ્થળ પરથી ફરાર થઈ ગયો હતો. ઘટના બાદ ભારે હોબાળો મચી ગયો હતો અને પડોશીઓએ પોલીસને જાણ કરી હતી, ત્યારબાદ ઘટનાસ્થળે પહોંચેલી પોલીસે તપાસ હાથ ધરી હતી. પોલીસે બંને મૃતદેહોને કબજે કરી પોસ્ટમોર્ટમ માટે મોકલી આપ્યા છે. ગંભીર રીતે ઘાયલ સસરાને હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.
(10:03 AM IST)
છેલ્લા 8 દિવસમાં સૌથી લોકપ્રિય 
