પુણે : સાંસ્કૃતિક નગરી પુણેમાં તહેવારો દરમિયાન વાગતા કાનફાડ ડીજે સિસ્ટમ અને હાઇ-ડેસિબલ લાઉડસ્પીકરોના દૂષણ સામે બુલંદ અવાજ ઉઠાવનારા જાણીતા સામાજિક કાર્યકર્તા વિદ્યાનંદ બાપટ પર ગુરુવારે સવારે ૧૧ વાગ્યાના સુમારે જાહેરમાં હિંસક હુમલો થતાં સમગ્ર શહેરમાં ભારે સસંગઠિત રોષ વ્યાપી ગયો છે. શહેરના વ્યસ્ત તિલક રોડ વિસ્તારમાં જ્યારે બાપટ માધ્યમોના પ્રતિનિધિઓ સાથે વાતચીત કરી રહ્યા હતા, ત્યારે જ સંતોષ ચવાણ નામના શખ્સે અચાનક આવીને તેમના પર હુમલો કરી દીધો હતો.

આ ઘટના કેમેરામાં કેદ થઈ ગઈ હતી અને વિડીયો સોશિયલ મીડિયા પર વાયરલ થતાં જ સ્થાનિક પોલીસ દોડતી થઈ ગઈ હતી. પોલીસે તાત્કાલિક ઘટનાસ્થળે પહોંચીને વિદ્યાનંદ બાપટને સુરક્ષિત રીતે પોલીસ વાનમાં ખસેડ્યા હતા અને હુમલાખોર સંતોષ ચવાણને કસ્ટડીમાં લીધો હતો. પુણેના પોલીસ કમિશનર અમિતેશ કુમારે આ અંગે સ્પષ્ટતા કરતાં જણાવ્યું હતું કે, "આરોપીને તાબામાં લઈને તેની સઘન પૂછપરછ હાથ ધરવામાં આવી રહી છે. કાયદો હાથમાં લેનારા કે આ ઘટના પાછળ સંડોવાયેલા કોઈપણ અસામાજિક તત્વોને બક્ષવામાં આવશે નહીં."

નોંધનીય છે કે, આગામી ગણેશોત્સવ અને અન્ય તહેવારોમાં અતિશય ઘોંઘાટ કરતા ડીજે અને સાઉન્ડ સિસ્ટમ પર મર્યાદા નક્કી કરવા માટે વિદ્યાનંદ બાપટ લાંબા સમયથી લડત ચલાવી રહ્યા છે. હાલમાં જ પુણે મહાનગરપાલિકા દ્વારા ગણેશોત્સવની તૈયારીઓ અંગે યોજાયેલી સમીક્ષા બેઠકમાં તેમણે આ મુદ્દો જોરશોરથી ઉઠાવ્યો હતો. આ હુમલા બાદ બાપટની આ ઝુંબેશ માત્ર એક વ્યક્તિનો વિરોધ ન રહેતા હવે એક મોટા 'સંગઠિત જનઆંદોલન'નું રૂપ ધારણ કરી રહી છે, અને સામાન્ય નાગરિકો પણ શાંતિપૂર્ણ તહેવારો ઉજવવાની આ માંગ સાથે જોડાઈ રહ્યા છે.