નવી દિલ્હી : દેશની આર્થિક સરહદોની સુરક્ષા કરતી અગ્રણી તપાસ સંસ્થા ડિરેક્ટોરેટ ઓફ રેવન્યુ ઇન્ટેલિજન્સ (DRI) એ દેશભરમાં એક મોટું ગુપ્તચર આધારિત સર્ચ ઓપરેશન હાથ ધરીને આંતરરાષ્ટ્રીય સોનાની દાણચોરી કરતી ટોળકીની કમર તોડી નાખી છે. ડીઆરઆઈએ દેશવ્યાપી દરોડા દરમિયાન અંદાજે ૧૫ કિલોગ્રામ વિદેશી મૂળનું દાણચોરી કરેલું સોનું અને ૨૦ કિલોગ્રામ ચાંદી જપ્ત કરી છે, જેની આંતરરાષ્ટ્રીય બજારમાં કુલ કિંમત આશરે ₹૨૨ કરોડ થવા જાય છે. આ સાથે જ સંસ્થાએ સ્મગલરોના અડ્ડાઓ પરથી ₹૨ કરોડથી વધુની બિનહિસાબી ભારતીય ચલણી નોટો પણ રિકવર કરી છે.

એરપોર્ટથી લઈને નેશનલ હાઇવે સુધી સપાટો, ૧૩ સ્મગલરો ગિરફ્તાર:

કેન્દ્રીય નાણા મંત્રાલય દ્વારા જારી કરાયેલા સત્તાવાર નિવેદન અનુસાર, આ ચકચારી કાળા કારોબારમાં સંડોવાયેલા અત્યાર સુધીમાં ૧૩ જેટલા રીઢા ગુનેગારોની ધરપકડ કરવામાં આવી છે. ડીઆરઆઈની ટીમે દિલ્હીના ઇન્દિરા ગાંધી આંતરરાષ્ટ્રીય વિમાનમથક પર બાગડોગરાથી આવેલા એક શંકાસ્પદ ભારતીય મુસાફરને આંતરીને તેની પાસેથી આશરે ૧ કિલોગ્રામ વિદેશી સોનું પકડી પાડ્યું હતું, જેની કડીઓ મેળવીને નવી દિલ્હીમાં ગેરકાયદેસર રોકડ અને કિંમતી ધાતુઓ છુપાવવાના મોટા રેકેટનો પર્દાફાશ કરાયો હતો.

મીણના સ્વરૂપમાં સોનાની ધૂળ લાવતી ગેંગનો સફાયો:

બીજી તરફ, મુંબઈ એરપોર્ટ પર ડીઆરઆઈએ અદભુત કોઠાસૂઝ વાપરીને સંગઠિત સોનાની દાણચોરી કરતી આખી સિન્ડિકેટનો નાશ કર્યો છે. અહીં સ્મગલરો દ્વારા કસ્ટમ્સની નજરમાંથી બચવા માટે અપનાવાયેલી નવી મોડસ ઓપરેન્ડીનો પર્દાફાશ થયો હતો, જેમાં મીણના (Wax) સ્વરૂપમાં છુપાવીને લાવવામાં આવેલી અંદાજે ૫ કિલોગ્રામ શુદ્ધ ૨૪ કેરેટ સોનાની ધૂળ જપ્ત કરવામાં આવી હતી.

પશ્ચિમ બંગાળમાં ફિલ્મી ઢબે ગાડીઓ આંતરી:

આ મેગા ઓપરેશનના તાર પૂર્વ ભારતમાં પણ જોડાયેલા હતા. પશ્ચિમ બંગાળમાં બે અલગ-અલગ સફળ ઓપરેશન પાર પાડીને ડીઆરઆઈના અધિકારીઓએ વિધાનનગર અને બર્ધમાન ખાતે નેશનલ હાઇવે પરથી પસાર થઈ રહેલા બે શંકાસ્પદ વાહનોને ફિલ્મી ઢબે અટકાવ્યા હતા. આ ગાડીઓની સઘન તલાશી લેતા તેમાંથી વિદેશી મૂળના સોનાના ૩૨ બિસ્કિટ મળી આવ્યા હતા, જેનું કુલ વજન ૪ કિલોગ્રામ જેટલું થાય છે. નાણા મંત્રાલયે ઉમેર્યું હતું કે, આ આકરી કાર્યવાહી સરહદ પારથી થતી આર્થિક આતંકવાદ સમાન દાણચોરીને રોકવા માટે સરકારની અડગ પ્રતિબદ્ધતા દર્શાવે છે.