નવી દિલ્હી:  મતદાર યાદીઓના સ્પેશિયલ ઇન્ટેન્સિવ રિવિઝન મુદ્દાને લઈને દેશના રાજકારણમાં ગરમાવો આવી ગયો છે. ભારતીય જનતા પાર્ટીના રાષ્ટ્રીય મહાસચિવ સ્મૃતિ ઈરાનીએ કોંગ્રેસના સાંસદ અને વિપક્ષી નેતા રાહુલ ગાંધી પર આકરા પ્રહારો કર્યા છે. સોશિયલ મીડિયા પ્લેટફોર્મ 'X' (ટ્વિટર) પર એક AI-જનરેટેડ વિડીયો ક્લિપ શેર કરીને સ્મૃતિ ઈરાનીએ રાહુલ ગાંધી અને વિપક્ષી ગઠબંધનના આરોપોનો સણસણતો જવાબ આપ્યો છે.

વિડીયો પોસ્ટ કરતા સ્મૃતિ ઈરાનીએ લખ્યું હતું કે, "તમે ખરેખર ઊંઘી રહેલા વ્યક્તિને જગાડી શકો છો, પરંતુ એવા વ્યક્તિને ક્યારેય નહીં જગાડી શકો જે દેશને ગેરમાર્ગે દોરવા માટે આંધળા હોવાનો ડોળ કરી રહ્યો છે."

સ્મૃતિ ઈરાની દ્વારા શેર કરવામાં આવેલી AI વિડીયો ક્લિપ સદીના મહાનાયક અમિતાભ બચ્ચન અભિનીત એક લોકપ્રિય બોલિવૂડ ફિલ્મના દ્રશ્ય પર આધારિત છે. આ વિડીયોમાં અમિતાભ બચ્ચનનું પાત્ર વિગતવાર સમજાવે છે કે કેવી રીતે એક ભ્રષ્ટ અધિકારીની બેદરકારીના કારણે મૃત્યુ પ્રમાણપત્ર જારી ન થયું અને પરિણામે મૃતકનું નામ મતદાર યાદીમાંથી દૂર થતું અટકી ગયું.

આ ક્ષતિનો ફાયદો ઉઠાવીને એક ચોક્કસ રાજકીય પક્ષે મારગાંવ વિસ્તારમાં મૃતકના નામે નકલી વોટ  આપવા માટે આ નામનો ઉપયોગ કર્યો હતો. સ્મૃતિ ઈરાનીએ આ વ્યંગાત્મક ક્લિપને "SIR Explained" શીર્ષક આપીને રાહુલ ગાંધીના દાવાઓ સામે કટાક્ષ કર્યો છે.

આ રાજકીય વિવાદ એવા સમયે સામે આવ્યો છે જ્યારે રાહુલ ગાંધી અને તમામ વિપક્ષી પક્ષોએ SIR પ્રક્રિયા સામે પોતાનો પ્રચાર અને વિરોધ પ્રદર્શન વધુ તીવ્ર બનાવ્યા છે. વિપક્ષી નેતાઓનો આરોપ છે કે SIR ની આ કામગીરીમાં મોટા પાયે અનિયમિતતાઓ આચરવામાં આવી રહી છે.

પોતાના વિરોધના ભાગરૂપે રાહુલ ગાંધીએ અન્ય વિપક્ષી નેતાઓ સાથે મળીને સંસદ ભવનથી સુપ્રીમ કોર્ટ સુધી માર્ચ કાઢી હતી અને મુખ્ય ચૂંટણી કમિશનર જ્ઞાનેશ કુમારના તાત્કાલિક રાજીનામાની માગણી કરી છે. વિપક્ષના આ આક્રમક વલણ સામે ભાજપે સ્મૃતિ ઈરાનીના આ વિડીયો દ્વારા પલટવાર કરીને મતદાર યાદી સુધારણાની પ્રક્રિયાનું સમર્થન કર્યું છે.