બેંગલુરુ: કેમ્પેગૌડા આંતરરાષ્ટ્રીય એરપોર્ટ પર આજે એક મોટી વિમાન હોનારત થતાં થતાં સહેજમાં અટકી ગઈ હતી. બેંગલુરુથી ચેન્નાઈ જવા માટે તૈયાર થયેલી ઇન્ડિગોની ફ્લાઇટ 6E 6017 ટેકઓફ માટે રનવે તરફ આગળ વધી રહી હતી, બરાબર એ જ સમયે વિમાનની અંદર અચાનક રહસ્યમય ધુમાડો દેખાવા લાગ્યો હતો. પાયલટે સમયસૂચકતા વાપરીને તરત જ વિમાનને ત્યાં જ બ્રેક મારી રોકી દીધું હતું અને એરપોર્ટ પર તાત્કાલિક ઇમરજન્સી (કટોકટી) જાહેર કરી દેવામાં આવી હતી.
આ અણધારી આફત આવતાની સાથે જ પ્લેનની અંદર ચીસાચીસ અને ભારે નાસભાગ મચી ગઈ હતી. એરપોર્ટ સ્ટાફ અને ઇમરજન્સી ફાયર બ્રિગેડની ટીમોએ તાબડતોડ ઘટનાસ્થળે દોડી જઈને વિમાનમાં સવાર ૨૩૦ થી વધુ મુસાફરો અને ક્રૂ મેમ્બર્સને તાત્કાલિક સુરક્ષિત રીતે બહાર કાઢ્યા હતા. ઇન્ડિગોના પ્રવક્તાએ સત્તાવાર નિવેદનમાં પુષ્ટિ કરી છે કે તમામ પ્રવાસીઓ સંપૂર્ણપણે સુરક્ષિત છે અને કોઈને પણ ઈજા થઈ નથી. તમામ મુસાફરોને એરપોર્ટના ટર્મિનલ બિલ્ડિંગમાં પરત ખસેડીને તેમના માટે નાસ્તા અને વૈકલ્પિક ફ્લાઇટની વ્યવસ્થા કરવામાં આવી હતી.

જો કે, એરક્રાફ્ટની કેબિન કે કોકપીટમાં આ ધુમાડો કઈ ટેકનિકલ ખામીના કારણે નીકળ્યો હતો, તેનું ચોક્કસ કારણ હજુ સુધી સામે આવ્યું નથી. ડાયરેક્ટોરેટ જનરલ ઓફ સિવિલ એવિએશન  અને ઇન્ડિગોની ટેકનિકલ ટીમ આ ગંભીર ઘટનાની ઊંડાણપૂર્વક તપાસ કરી રહી છે. મુસાફરો માટે આ આખો અનુભવ અત્યંત ડરામણો હતો અને તેઓ માંડ માંડ બચ્યા હોવાનો અહેસાસ કરી રહ્યા છે, જ્યારે એરલાઇને જણાવ્યું છે કે તેમના ગ્રાહકોની સુરક્ષા તેમની સર્વોચ્ચ પ્રાથમિકતા છે.