નાશિક : મહારાષ્ટ્રના નાશિક જિલ્લાના માલેગાંવ શહેરમાં ટીપુ સુલતાનને લઈને એક નવો રાજકીય સંગ્રામ છેડાઈ ગયો છે. ડેપ્યુટી મેયર શેન હિંદની કચેરીમાં ટીપુ સુલતાનની તસવીર લગાવવાના વિવાદ વચ્ચે, મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે યોજાયેલી વિરોધ કૂચ દરમિયાન સ્થિતિ વધુ વણસી હતી. 'બંધારણ બચાવો સમિતિ' અને સમાજવાદી પાર્ટીના નેતૃત્વમાં નીકળેલી આ કૂચમાં કેટલાક વિરોધકર્તાઓએ "અમે સ્વતંત્રતા ઇચ્છીએ છીએ, ટીપુની સ્વતંત્રતા" જેવા આક્રમક નારા લગાવતા સમગ્ર રાજ્યના રાજકારણમાં ગરમાવો આવી ગયો છે.

આ ઘટના બાદ મહારાષ્ટ્ર કોંગ્રેસના વરિષ્ઠ નેતા વિજય વાડેટ્ટીવારે ટીપુ સુલતાનનો બચાવ કરતા નિવેદન આપ્યું હતું, જેણે બળતામાં ઘી હોમવાનું કામ કર્યું છે. નાગપુરમાં પત્રકારો સાથે વાતચીતમાં વડેટ્ટીવારે દાવો કર્યો હતો કે ટીપુ સુલતાનના સાચા ઇતિહાસને ખોટી રીતે રજૂ કરવામાં આવી રહ્યો છે. તેમણે પ્રશ્ન ઉઠાવ્યો હતો કે માત્ર કોઈનો ફોટો લગાવવાથી કે વિરોધ પ્રદર્શનમાં ભાગ લેવાથી કોઈ વ્યક્તિ દેશદ્રોહી કે નક્સલવાદી કેવી રીતે બની જાય? લોકશાહી અને બંધારણીય મૂલ્યોનો ઉલ્લેખ કરીને તેમણે ભારપૂર્વક કહ્યું કે દરેક નાગરિકને પોતાનો વિરોધ નોંધાવવાનો અધિકાર છે.

કોંગ્રેસ નેતાના આ નિવેદન સામે શાસક ભાજપ અને શિવસેના (શિંદે જૂથ) એ કડક વાંધો ઉઠાવી મોરચો ખોલ્યો છે. શિવસેના નેતા શૈના એનસીએ ટીપુ સુલતાનને સ્વાતંત્ર્ય સેનાની તરીકે માનવાનો સ્પષ્ટ ઇનકાર કરતા તેમને "ખલનાયક" ગણાવ્યા હતા અને આરોપ લગાવ્યો હતો કે ટીપુ સુલતાને ધાર્મિક આક્રમણ કરીને દેશને નુકસાન પહોંચાડ્યું હતું. મહાયુતિના નેતાઓએ કોંગ્રેસ પર તુષ્ટિકરણની રાજનીતિ કરવાનો આરોપ લગાવતા કહ્યું કે વિપક્ષ ઇતિહાસને ટ્વિસ્ટ કરીને જનતાને ગેરમાર્ગે દોરી રહ્યો છે, જેનાથી માલેગાંવ સહિત સમગ્ર મહારાષ્ટ્રમાં રાજકીય વાતાવરણ અત્યંત તંગ બની ગયું છે.