કોલકાતા : પશ્ચિમ બંગાળના કોલકાતામાં કેમેક સ્ટ્રીટ ખાતે આવેલા તૃણમૂલ કોંગ્રેસના સાંસદ અભિષેક બેનરજીની ઓફિસમાં ગુરુવારે વહેલી સવારે કેટલાક અસામાજિક તત્વો દ્વારા તોડફોડ કરવામાં આવી હતી. આ અત્યંત સંવેદનશીલ મામલામાં પોલીસે ત્વરિત કાર્યવાહી કરીને કુલ છ શખ્સોની ધરપકડ કરી લીધી છે. પકડાયેલા આરોપીઓની ઓળખ શંકર રાવ, અવિનાશ શૉ, સુખદેવ ગુપ્તા, સુરજ શૉ, ભોમ્બોલ મોંડોલ અને રોહિત પોરલ તરીકે થઈ છે, જેઓ મુખ્યત્વે હાવડા વિસ્તારના રહેવાસી છે. ક્રાઇમ વિંગના વધારાત્મક પોલીસ કમિશનર કુણાલ અગ્રવાલે આ અંગે વિગતો આપતા જણાવ્યું કે સ્થાનિક પોલીસ સ્ટેશનને સવારે છ વાગ્યાની આસપાસ તોડફોડની માહિતી મળી હતી, જેના પગલે પોલીસ કાફલો તાત્કાલિક ઘટનાસ્થળે પહોંચી ગયો હતો અને છ જણને રંગે હાથ ઝડપી લીધા હતા.

આ ઘટના બાદ સાંસદ અભિષેક બેનરજીએ સોશિયલ મીડિયા પ્લેટફોર્મ એક્સ પર એક સીસીટીવી ફૂટેજ પણ જારી કર્યું હતું, જેમાં કેટલાક અજાણ્યા લોકો તેમની ઓફિસની અંદર ભારે તોડફોડ કરતા નજરે પડે છે. આ ઘટનાને લઈને રાજ્યમાં રાજકીય વાતાવરણ ગરમાયું છે. મુખ્યમંત્રી મમતા બેનરજીએ ભારતીય જનતા પાર્ટીને આ કૃત્ય માટે સીધી જવાબદાર ઠેરવતા ભાજપ સામે આકરા પ્રહારો કર્યા હતા. મમતા બેનરજીએ જણાવ્યું કે ભાજપ માત્ર લૂંટફાટ કરવાનું જ જાણે છે અને સત્તામાં આવવા માટે અગાઉ મત લૂંટ્યા હતા અને હવે તેઓ ઓફિસો પર હુમલા કરી રહ્યા છે. તેઓએ કોઈ શરમ નથી અને અમારા ચાર કર્મચારીઓને ફસાવીને તેમને યાતના આપી છે.

મમતા બેનરજીએ આ મામલે દેશની સર્વોચ્ચ અદાલત એટલે કે સુપ્રીમ કોર્ટને પણ અપીલ કરી છે કે તેઓ આ સમગ્ર વિવાદની ગંભીરતાથી નોંધ લે. બીજી તરફ, તૃણમૂલ કોંગ્રેસ દ્વારા લગાવવામાં આવેલા આ તમામ ગંભીર આરોપોને ફગાવી દેતા ભારતીય જનતા પ્રદેશ અધ્યક્ષ તેમજ રાજ્યસભાના સાંસદ સમિક ભટ્ટાચાર્યએ જણાવ્યું કે આ આક્ષેપોમાં કોઈ તથ્ય નથી અને તે કોઈ પણ કસોટી પર ખરા ઉતરતા નથી. પોલીસે આ મામલે તટસ્થ તપાસ કરવી જોઈએ જેથી વાસ્તવિક હકીકત બહાર આવી શકે.