મુંબઈ:  વૈશ્વિક બજારમાં યુએસ ડોલર સામે ભારતીય રૂપિયો સતત નબળો પડીને ૯૬ની ઐતિહાસિક સપાટીને પાર કરી જતાં દેશના આર્થિક જગતમાં ચિંતાનો માહોલ છે. આ જળસંકટ જેવા માહોલ વચ્ચે પ્રખ્યાત વૈશ્વિક બ્રોકરેજ ફર્મ જેફરીઝ ના એક અહેવાલે મ્યુચ્યુઅલ ફંડ અને સિસ્ટમેટિક ઇન્વેસ્ટમેન્ટ પ્લાન્સ (SIP) રોકાણકારો પર સવાલો ઉઠાવી નવી ચર્ચા છેડી છે. જેફરીઝે દાવો કર્યો છે કે સ્થાનિક રોકાણકારો તરફથી આવતા રેકોર્ડબ્રેક એસઆઈપી પ્રવાહને કારણે વિદેશી સંસ્થાકીય રોકાણકારો (FII) ભારતીય શેરબજારમાંથી ખૂબ જ સરળતાથી પોતાના પૈસા પાછા ખેંચીને બહાર નીકળી રહ્યા છે, જેના કારણે રૂપિયા પર આડકતરું દબાણ વધી રહ્યું છે.

બ્રોકરેજ ફર્મના આ આક્ષેપો સામે જાણીતા માર્કેટ એક્સપર્ટ અને હેલિયોસ કેપિટલના સ્થાપક સમીર અરોરાએ એસઆઈપી રોકાણકારોનો જોરદાર બચાવ કર્યો છે. તેમણે જડબાતોડ દલીલ કરતા પૂછ્યું કે, જો દેશના સામાન્ય નાગરિકોએ એસઆઈપીમાં પૈસા ન રોક્યા હોત, તો એ નાણાં ક્યાં ગયા હોત? કાં તો લોકોએ વિદેશી બજારોમાં રોકાણ કરીને ડોલરની માંગ વધારી હોત, અથવા સોનાની ખરીદી વધારી હોત જેની ભારત મોટાપાયે આયાત કરે છે. જો આ પૈસા લક્ઝરી ચીજો, મોંઘા મોબાઈલ કે બહાર જમવા પાછળ ખર્ચાયા હોત, તો તેનાથી દેશના અર્થતંત્રને કોઈ કાયમી મજબૂતી મળી ન હોત. એસઆઈપીએ તો ઉલટાનું વિદેશીઓના વેચાણ સામે ભારતીય શેરબજારને પતનની ખાઈમાં જતા બચાવ્યું છે.

જેફરીઝના રિપોર્ટ અનુસાર, ચાલુ ખાતાની ખાધ કરતાં નબળો મૂડી પ્રવાહ રૂપિયાના ઘસારા માટે વધુ જવાબદાર છે, કારણ કે વિદેશી રોકાણકારોએ છેલ્લા બે વર્ષમાં ભારતીય ઇક્વિટી બજારમાંથી આશરે ૭૮ બિલિયન ડોલર પાછા ખેંચી લીધા છે. તેની સામે એસોસિએશન ઓફ મ્યુચ્યુઅલ ફંડ્સ ઇન ઇન્ડિયાના ડેટા દર્શાવે છે કે માર્ચ અને એપ્રિલ ૨૦૨૬માં સ્થાનિક રોકાણકારોએ દર મહિને ₹૩૮,૦૦૦ કરોડથી વધુનો ચોખ્ખો પ્રવાહ બજારમાં ઠાલવ્યો છે. નિષ્ણાતો માને છે કે જો આગામી સમયમાં હોર્મુઝ સ્ટ્રેટ સંબંધિત વૈશ્વિક તણાવ ઓછો થાય અને ભારતીય બજારનું મૂલ્યાંકન આકર્ષક બનશે, તો આ જ નબળા રૂપિયાનો લાભ લેવા વિદેશી રોકાણકારો ફરી ભારત તરફ દોડી આવશે.