બેંગલુરુ,: કર્ણાટકના રાજકારણમાં શુક્રવારે ત્યારે મોટો ભૂકંપ આવ્યો જ્યારે ચૂંટાયેલા પ્રતિનિધિઓ માટેની ખાસ અદાલતે ભાજપના નેતા યોગી ગૌદરની હત્યાના કેસમાં કોંગ્રેસના ધારાસભ્ય વિનય કુલકર્ણીને આજીવન કેદની સજા ફટકારી. સીબીઆઈ (CBI) દ્વારા રજૂ કરવામાં આવેલી ચાર્જશીટમાં કુલકર્ણીને આ જઘન્ય હત્યાના 'માસ્ટરમાઇન્ડ' તરીકે જાહેર કરવામાં આવ્યા છે.
જીમમાં કરવામાં આવી હતી ક્રૂર હત્યા
આ હૃદયદ્રાવક ઘટના 15 જૂન, 2016ના રોજ બની હતી. ધારવાડના ભાજપ જિલ્લા પંચાયત સભ્ય ગૌદર જ્યારે તેમના જીમમાં હતા, ત્યારે જ ભાડે રાખેલા હુમલાખોરોએ તેમના પર તૂટી પડીને ક્રૂરતાપૂર્વક હત્યા કરી નાખી હતી. તે સમયે વિનય કુલકર્ણી રાજ્ય સરકારમાં મંત્રી હતા અને શરૂઆતથી જ તેમના પર શંકાની સોય તાકવામાં આવી હતી. 2019માં તત્કાલીન ભાજપ સરકારે આ કેસની તપાસ સીબીઆઈને સોંપી હતી.
રાજકીય દુશ્મની બની કારણ
સીબીઆઈની તપાસમાં બહાર આવ્યું કે વિનય કુલકર્ણી ગૌદરને ધારવાડમાં પોતાના ઉભરતા રાજકીય હરીફ તરીકે જોતા હતા. પોતાની રાજકીય પકડ નબળી ન પડે તે માટે કુલકર્ણીએ ગૌદરને રસ્તામાંથી હટાવવા માટે કોન્ટ્રાક્ટ કિલર્સની મદદ લીધી હતી. આ કાવતરામાં કુલકર્ણી ઉપરાંત અન્ય 16 લોકો પણ સામેલ હતા, જેમને પણ કોર્ટે આજીવન કેદની સજા ફટકારી છે.
કોર્ટમાં દલીલોનો જંગ
ન્યાયાધીશ સંતોષ ગજાનન ભટ્ટની કોર્ટમાં સીબીઆઈએ આરોપીઓ માટે મહત્તમ સજાની માંગણી કરી હતી, જ્યારે ધારાસભ્યના વકીલે તેમની સામાજિક સેવા અને પરિવાર પ્રત્યેની જવાબદારીઓનો હવાલો આપીને સજામાં રાહતની અપીલ કરી હતી. જોકે, પુરાવાઓ અને સાક્ષીઓના આધારે કોર્ટે આ ગુનાને ગંભીર ગણીને કોઈ પણ પ્રકારની નરમાશ રાખવાનો ઈન્કાર કર્યો હતો.
ધારાસભ્ય પદ પર જોખમ
આજીવન કેદની સજા મળ્યા બાદ હવે વિનય કુલકર્ણીએ પોતાનું ધારાસભ્ય પદ ગુમાવવું પડે તેવી પૂરેપૂરી શક્યતા છે. કાયદા મુજબ, બે વર્ષ કે તેથી વધુ સજા પામેલા જનપ્રતિનિધિનું સભ્યપદ તાત્કાલિક અસરથી રદ કરવામાં આવે છે. આ ચુકાદાથી કર્ણાટક કોંગ્રેસને મોટો ફટકો પડ્યો છે, જ્યારે ન્યાયિક પ્રક્રિયામાં લોકોનો વિશ્વાસ ફરી એકવાર મજબૂત થયો છે.