વોશિંગ્ટન | તા. 27: ટીવી જગતની સૌથી લોકપ્રિય એનિમેટેડ શ્રેણી 'ધ સિમ્પસન્સ'માં ડોનાલ્ડ ટ્રમ્પના રાષ્ટ્રપતિ બનવાની વર્ષો પહેલા કરવામાં આવેલી આગાહીએ દુનિયાભરના લોકોને ચોંકાવી દીધા હતા. હવે તે જ શ્રેણીના એમી-વિજેતા લેખક અને 'પ્રબોધક' તરીકે ઓળખાતા ડેન ગ્રેનીએ ફરી એકવાર ચર્ચા જગાવી છે. તેમણે સત્તાવાર રીતે ૨૦૨૮ની યુએસ રાષ્ટ્રપતિ પદની ચૂંટણી લડવાની જાહેરાત કરી છે. એક રમુજી વિડિયોમાં લાંબા વાદળી ટોગા અને વિશાળ દાઢી સાથે દેખાયેલા ગ્રેનીએ પોતાને 'પ્રગતિશીલ રિપબ્લિકન' ગણાવતા ટ્રમ્પ, જેડી વાન્સ અને બંને પક્ષના અબજોપતિઓ પર આકરા પ્રહાર કર્યા છે.
રાજકારણમાં સંવાદ અને શિષ્ટાચાર લાવવાનો દાવો
પોતાના અભિયાનને "વહેંચાયેલા રાષ્ટ્રીય હેતુની ભાવના" તરીકે વર્ણવતા ગ્રેનીએ જણાવ્યું હતું કે, તેઓ અબ્રાહમ લિંકન અને ટેડી રૂઝવેલ્ટની પરંપરાને અનુસરવા માંગે છે. તેમણે સ્પષ્ટ કર્યું કે તેમનું પ્લેટફોર્મ 'બધા માટે અમેરિકા'ના સૂત્ર પર આધારિત છે. ગ્રેનીની ઉમેદવારીના મુખ્ય મુદ્દાઓમાં યુનિવર્સલ હેલ્થકેર, ગ્રીન ન્યૂ ડીલ અને સુપ્રીમ કોર્ટમાં ન્યાયાધીશોની સંખ્યા ૯ થી વધારીને ૧૩ કરવાની માંગણીઓનો સમાવેશ થાય છે. તેમણે કહ્યું કે, "રિપબ્લિકન પક્ષે ટ્રમ્પને સક્ષમ બનાવ્યા અને ડેમોક્રેટ્સ તેમને રોકવામાં નિષ્ફળ રહ્યા, તેથી હવે હું આ સ્થિતિ તેમના હાથમાં છોડી શકું નહીં."
માત્ર નાટક કે ગંભીર રાજકીય દાવ?
શરૂઆતમાં ઘણા લોકોને આ માત્ર એક મનોરંજન અથવા 'સિમ્પસન્સ' જેવો કોઈ પ્રયોગ લાગ્યો હતો, પરંતુ વાસ્તવિકતા કંઈક અલગ છે. અહેવાલો મુજબ, ગ્રેનીએ ફેડરલ ચૂંટણી પંચ (FEC) સમક્ષ પોતાની સત્તાવાર મુખ્ય ઝુંબેશ સમિતિનું નિવેદન પણ દાખલ કરી દીધું છે, જે દર્શાવે છે કે તેઓ આ ચૂંટણીને લઈને ગંભીર છે. જોકે, ગ્રેનીએ વિનોદમાં ઉમેર્યું કે, "હું મદદ કરવા માંગું છું, પરંતુ હું વકીલ નથી, હું માત્ર એક સ્વ-ઘોષિત ભવિષ્યવેત્તા છું જેણે લો-સ્કૂલનો અભ્યાસ કર્યો છે."
હવે જ્યારે અમેરિકી રાજકારણ ગરમાયું છે, ત્યારે આ 'ભવિષ્યવેત્તા' ઉમેદવાર મતદારોને કેવી રીતે આકર્ષે છે તે જોવું રસપ્રદ રહેશે. શું ડેન ગ્રેનીની આ રાજકીય ઈનિંગ માત્ર એક પ્રચારની રણનીતિ છે કે પછી તે ખરેખર અમેરિકાના રાજકીય માળખામાં કોઈ મોટું પરિવર્તન લાવવાની ક્ષમતા ધરાવે છે? આ પ્રશ્ન અત્યારે અમેરિકાના રાજકીય વર્તુળોમાં સૌથી વધુ ચર્ચાનો વિષય બન્યો છે.